FATTOHHON.COM
« Все новости
Актриса Севара Солиева 1990 йил 12 июнда туғилган, Жаҳон тиллари университети қошидаги академик лицейни инглиз тили йўналиши бўйича тамомлаган. Ҳозирда Тошкент Давлат Санъат институтида 4-босқич талабаси. Кино оламига "Амакиваччалар" ("Бойвачча 2") фильми орқали кириб келган. Кастингга сурат топширган ва шу сурат орқали уни ролга чақиришган.
Суратга тушган фильмлари: "Амакиваччалар", "Чол ва набира", "Учар қиз", "Пойма-пой", "Ўйин ичида ўйин", "Фаришта", "Сўнгги лаҳза", "Ёзсиз йил", "Тилла бува", "Вафодорим", "Суперқайнона", "Ақл ва юрак". "Пойма-пой" фильмидаги бош роль унга машҳурлик олиб келган.
- "Пойма-пой" фильмидаги бош ролингиздан кейин, ижодингизда бироз орада танаффус бўлгандек. Нима учун?
- Биринчидан институтда ўқиганлигим сабабли, айнан шу фильмдан кейин 3-курсда ўқишни бошладим ва қийинроқ бўлди. Диплом иши, спектакль қўйдик, шу орада бир-икки сценарийлар келди, ўқиб кўрдим, лекин тўғри келмади. Лекин, рад этиб, адашмабман. Барибир инсон яхши сценарий бўлишини ҳоҳлайди, шунинг учун тўғриси, сценарий тўғри келмагани учун чиқмадим.
-Сценарийни қўлга олганингизда, умуман қайси жиҳатига қараб рози бўласиз?
- Биринчи навбатда, қизиқарли бўлиши керак. Энди, бу дунёда нимаики қилинмасин, яхшиликка дейишади. Ичимданми, қанақадир бир нима, сезиш бўлади-де.
-Бу билан муваффақиятли роль бўлса, ўзим сезаман демоқчимисиз?
- (ўйланиб, жилмайиб) Бир хилларида сезаман, бир хилларида сезмаслигим ҳам мумкин. Билмадим, шунақа бўлиб қолди, баъзиларида туша олмадим. Ўтган 2011 йилда мен суратга тушган "Ёзсиз йил" ва "Тилла бува" фильмларигина катта экранга чиқди. "Ёзсиз йил" кинотасмага суратга олинган, ўзи давлат бюджети ҳисобига ишланган фильм. 2012 йил бошида эса, "Суперқайнона", "Вафодорим" фильмлари премьера бўлди. "Ақл ва юрак" фильми эса, энди катта экранга чиқади.
- Сиз давлат бюджетига суратга олинган фильмларда ҳам роль ижро этгансиз. Сиз қай биридаги ролларингизга кўпроқ меҳнат сарфлайсиз? Чунки, кўплар хусусий фильмларда, ҳаттоки ўз ролларини ёд олишмайди.
- Давлат бюджетига суратга олинган фильмлар узоқроқ муддатда суратга олинади. Масалан, "Ёзсиз йил" фильмининг ҳам суратга олиш ишлари узоқроқ давом этган. Шунинг учун, у ерда сценарий берилганда, албатта кўпроқ вақт ўқийсиз, тайёргарлик кўрасиз. Агар мен тайёр бўлсам, унақа қийналиш бўлмайди. Мен доим ўз ролларимнинг сўзларини албатта ёд оламан, тайёрланиб ҳаракат қиламан. Лекин, бир хилларида мазам бўлмай қолсагина, суфлёр ёрдамидан фойдаланишим мумкин. Бир марта "Ақл ва юрак" фильмида шундай бўлиб қолган. Чунки, суратга олиш ишлари кичик хонада бўлган, ҳам кучли прожекторлар турибди, ҳам дераза ойналари очиқ эмас эди... Ўшанда бошим айланиб қолганди. Ўзимга кела олмадим ва суфлёр ёрдам берганди. Лекин, иложи борича ҳамма фильмларда, тайёрланиб, ҳолатга кириб, ижро қилишга ҳаракат қиламан.
- "Пойма-пой" фильмида сизга дубляжда машҳур актриса Дилноза Кубаева овоз берганди. Балки, у фильмни ажралиб чиққанлигининг сабаби шу эмасмикан? Кейинги фильмларингизга у киши овоз бермадиларми ёки...
- Йўқ, менимча бу ҳаммаси Оллоҳдан! Ҳаммаси омадга боғлиқ нарса! Балки бошқалар назарида шунақадир... Дубляждаги овозга келсак, нега энди, "Ўйин ичида ўйин", "Тилла бува" ва бошқа кўп фильмларимда ҳам, менга Дилноза Кубаева овоз берганлар. Чунки, "Дилноза Кубаева овоз берсинларми" дейишади. "Албатта, улар" дейман. Сабаби, уларни овоз беришлари менга ёқади, овозлари менга мос тушса керак, деб ўйлайман ва улар овоз берсалар хурсанд бўламан. (ўйланиб) "Пойма-пой" фильми экранга чиқишидан олдин, мен орзу қилиб юрардим. "Чиқсаму, омадли бўлиб чиқсам" деб! Балки ҳозир орзу қилмаётганлигим учунми? (кулади)
- Нима учун? Орзу қилишдан тўхтадингизми? Баъзилар, орзуга етдим деб, ҳаракатни бўшаштириб юборади.
- Йўқ. (кулади) Орзу қилишдан тўхтамадим! Ҳалигача жуда орзу қиламан, фақат сал бошқачароқ! Менга Ҳолливуд фильмлари, улардаги роллар жуда ёқади. Кўпроқ жангари фильмлар! (кулиб) Лекин, бизда ундай фильмлар олинармикан? Балки олинар? Буни энди кутиш керак! Ҳали унақа сценарийлар тушмади. "Пойма-пой" омадли чиқди ва ҳаммага ёқди. Ўшанга энди "Пойма-пой" фильмидан сўнг, кўпроқ Ҳолливуддагидек фильмлар, жангари фильмларда роль ижро этишни орзу қиламан. Бизда ҳам жангари фильмлар олинармикан? Аёл киши жангари бош қаҳрамон бўладиган, актриса Анжелина Жоли каби, масалан? Кейин, яна тарихий фильмларда роль ижро этишни ҳам орзу қиламан.
- "Фаришта" фильмидаги ролингизни нимасига қараб танлагансиз?
- "Фаришта" фильмидаги ролим қийинроқ бўлган, чунки драматик роль эди. Менимча, ҳаётий бўлган, сценарийни ўқиганимда менга шу тарафи жуда ҳам ёққан. Лекин, менга одамлар "намунча хорланган қиз, сени бу ролда намунча хор қилиб қўйишган" дейишди. Тўғри, ўзим ҳам кўрганимда, ҳақиқатдан ҳам хор қилиб, кўрсатишибди. Лекин, бунақа ролларни ҳам ўйнаш керак, деб ўйлайман. Ҳар хил ролларни ўйнаб кўриш керак. Гап менинг ролимда эмас, менга умуман фильмни ўзи ёққан. Роллардан эса, менга жуда ҳам Саида Раметова ижро қилган роль жуда ҳам манзур бўлган. Ўзимнинг ролимга келсак, ҳаётда ҳар хил воқеалар бўлади. Бу фильмдаги каби ҳаёт бордир балки, ҳақиқатдан шунақадир? Балки мени "Фаришта"даги ролимни кўриб у бу қизми, ўзига "ҳақиқатдан ҳам мени ҳаётимда ҳам ёруғлик бўлади" деган фикрга келиши мумкин. Пастга тушиш керак эмас, шунақа оилалар ҳам бор. Кимдир бузилади, кимдир яхши бўлиб кетади. Айтмоқчиманки, қийналган оилаларга, қизларга, бузилмаслиги учун сабоқ бўлиши учунми, бу фильм чиқарилган, деб ўйлайман.
- Лекин, томошабинлар томонидан шу ролингизни айрим ҳатти-ҳаракатлари қораланганди ҳам, масалан, ўша йигитни таклифига рози бўлиб кетиши каби. Ўзингизни бунга муносабатингиз?
- Биласизми? (ўйланиб) Бу ҳаётда инсон баъзида жуда ҳам қийналиб, азобланиб кетади. Бир тарафдан ўйлаб кўрилса, масалан опасининг эри, унга яъни ўз хотинини синглисига бошқача қараса, бу ҳам яхши эмас-ку. Поччасини томи кетиб қолиб, уни бузиб қўйса-чи? Опасини ҳаёти бундай бўлса? Ўшанга мен, бир тарафдан у қизни шундай қилгани балки тўғридир, деб ўйлайман. Қиз у ерда бузуқлик қилмади, шароитга чидаб яшади. Ҳаракат қилди чидашга, мисол учун, ёмон иш қилмади, деб ҳисоблайман. Ўзи ҳам ёмон қиз эмасди. Шунақа вазиятлар бўлган балки, кимдир тўғри дейди, кимдир ёмон дейди. Менимча, тўғрисини айтсам, у ерда ҳам у қиз ёмон иш қилмади. У хонадонда ҳам ишларни қилиб юрди, опамга ёрдам бераман, деб шу ишларни қилди. Мен ўйлайман, одамлар кўп, фикрлар ҳам кўп. Бу режиссёрнинг ўйлаган нарсаси. Бу энди кино сценарий, рози бўлганимнинг сабаби, бачкана эмас деб ўйлайман, ҳаётий, ҳаётда ҳар хил вазият бўлиши мумкин! Бир хилларида биз, "йўқ, мен ҳеч қачон бу ишни қилмайман!" дейишимиз мумкин, лекин Оллоҳ ҳоҳласа, шунақа ишни қилиб қўйиш мумкин, вазият бўлиши мумкин. Шунинг учун, "ҳеч қачон ҳаётда бўлмайди" дейиш ҳам, нотўғри деб ўйлайман.
- Бу билан қаҳрамонингиз ҳатти-ҳаракатини бир тарафлама оқламоқчисиз?
- Йўқ! Оқламоқчи эмасман, лекин ҳаётда ҳар хил вазият бўлиши мумкин! Одамлар гапиришса ҳам, "ҳаётда бўлмайди", дейишса ҳам, бу Оллоҳнинг иши, баъзида биз ўзгартира олмаймиз. Балки, мен нотўғри гапираётгандирман, бу мени фикрим.
- Ўзингизнинг ота-онангиз фильмлардаги ролларингизга қандай муносабат билдиришади?
- Агар фильмлар яхши бўлса, албатта уларга ёқади. Лекин, (кулиб) мана ҳозир "Фаришта" фильми ҳақида айтиб ўтилди. Бу фильмда, хорланган қиз ролини ижро этганимга, ота-онамнинг жаҳллари чиққанди. Баъзи қариндошларимни ҳам, "намунча йиғлайверасан, хорланганларнинг ролини ўйнама" дейишган вақтлари ҳам бўлган. (самимий) Шундай дейишадию, лекин агар сценарий зўр бўлса, нимага ўйнамай? Фақат оддий роль ижро этайми? Бир хил сценарийларда қаҳрамон қизнинг роли яхши бўлса ҳам, сценарийнинг ўзи қизиқарли, реал, ҳаётий бўлмайди. Шунинг учун, мен "Фаришта" фильмининг сценарийсини ўқиганимда, ҳақиқатдан ҳам, қизнинг хорланганлиги кўрсатилган бўлса ҳам, сценарий қизиқарли бўлган эди. Бу фильмни кўпчилик ҳаётий дейишган. Лекин, (кулиб) тўғрисини айтаман, ота-онамни бу фильмни кўриб, жаҳллари чиққан, "намунча хорланган бу қиз" дейишган. Лекин, мен уларга тушунтирганман, "тўғри тушунинглар, бу кино. Сценарийси қизиқарли бўлган, менга ёққан. Бу кино деб, ўйланглар" деганман. Тушунишган.
- Фильм сценарийларини ота-онангизга ўқиттириб кўрасизми?
- Албатта! Ўқиб кўринглар, деб уларга бераман.
- "Фаришта" фильмининг сценарийсини-чи? Ўқишганми? Ўқиб рози бўлишганми?
- (кулиб) Тўғриси, ана шу "Фаришта"нинг сценарийсини ўқишмаган. Ҳамманинг ўз иши бўлиб қолиб, банд бўлишган ва вақтлари бўлмаган. Ўзим ўқиганман ва ҳаётийлиги учун, ўзимга ёққан.
- Маҳаллада яшайсиз тўғрими, маҳалладошларнинг сиз ҳақингизда фикрлари қандай?
- Маҳалламиздаги ҳамма қўшниларимни ҳурмат қиламан. Худога шукур, улар ҳам мени жуда ҳам қўллаб-қувватлашади. Ҳар доим суратга тушаётган фильмларим ҳақида сўраб туришади, "қанақа фильмлар чиқяпти" деб, саволлар беришади. Ҳеч қачон, унақа, актриса экан, деб ёмон фикр билдиришмаган. Аксинча, доим қўллаб-қувватлашади. Тўғриси, маҳалламга раҳмат дейман. (кулади)
- Сизни ҳаётингизда севгининг ўрни?
- Севгининг ўрни... (ўйланиб) Қанақа десам бўларкин? Мен мисол учун, ҳали турмушга чиқиш ниятим бору, лекин ҳозир эмас! (кулиб) Чунки, опам борлар, кейин ҳали ўқияпман. Шунга менимча, севгига ҳали вақтли деб ўйлайман. Худо ҳоҳласа, вақти-соати келади.
- Сиз ўзингиз севиб турмуш қурган яхши деб ўйлайсизми ёки совчи орқали?
- Шахсий фикрим, севиб турмушга чиқса, яхши деб ўйлайману, лекин, ҳар хил вазият бўлиши мумкин. Ҳаммаси Оллоҳдан, шунинг учун бир хилларида севишиб турмуш қурганларнинг ҳам кейинги ҳаётлари бўлмай қолади. Совчи орқали турмушга чиққан қизларнинг ҳам бир хилларида ҳаёти яхши бўлиб кетса, бир хилларида ёмон бўлиб қолади. Ўзимга келсак, билмадим, балки совчи орқали, балки ўзим учратиб қолишим ҳам мумкиндир? (кулиб) Тўғриси, нима дейишга ҳам ҳайронман, билмайман. Чунки, ҳар хил вазият бўлиши мумкин!
- Дейлик, бир йигит сизни қаттиқ севиб қолди, ота-онангизга ҳам жуда маъқул бўлди. Лекин сиз уни севмайсиз, ҳеч кўнглингиз бўлмаяпти. Қандай йўл тутган бўлардингиз?
- (ўйланиб, самимий) Шахсий фикрим, агар шундай вазият бўлса, "йўқ" дердим. Дарров, "ҳа, розиман" демасдим. Лекин, масалан, бир хил йигитлар бор, агар қиз бошида ёқтирмаса ҳам, у қизнинг кўнглини олишга чин дилдан интилса, ҳар тарафлама ўзини кўрсатиб, ҳаракат қилса, ўйлайманки, қиз бола ҳам рози бўлиб қолиши мумкин... Агар мени Оллоҳ учун қаттиқ севса, нияти ҳалол, пок бўлса, яхши ният билан ҳаракат қилса, яхши инсон бўлса, мен ўйлайманки, рози бўлардим.
- Агар ўзингиз ота-она розилиги билан ўзингиз севмаган инсонга турмушга чиқсангиз, кўникиб яшаб кета олармидингиз?
- Билмадим. (кулади) Ҳозир жавоб бера олмасам керак. Ҳаммаси Худодан. Бир хиллар яшаб кета олади, мен ҳали турмушга чиқмаганим учун, бу саволга жавоб бера олмасам керак, чунки, билмайман тўғриси.
- Ота-онадан севгини устун қўйганларга муносабатингиз? Фильмларда ҳозирда шу нарсани кўп кўрсатишмоқда ва ҳаётда ҳам кўп учрамоқда.
- Йўқ, мен учун ота-она биринчи ўринда! Ўйлайманки, ҳар бир инсон учун биринчи ўринда Оллоҳ, кейин ота-она бўлиши керак, менимча. Туйғуларга келсак, инсон туйғуларни ушлай билиши, ўзини назорат қила олиши керак, назаримда. Чунки, севгига берилиб, боши айланиб, ҳар хил ишлар қилиш, бу нотўғри, деб ўйлайман. Инсон ҳар қандай вазиятда ҳам ўзини ушлашга ҳаракат қилиши керак, менимча. Бу менинг фикрим.
- Журналистларнинг сизга энг кўп берадиган саволи?
- (кулади) Қандай қилиб, кинога тушиб қолгансиз? Биринчи суратга тушган кинойингиз? Буни ҳаммага айтиб берганман.
- Ўзингизни машҳур деб ҳисоблайсизми?
- Йўқ, ҳали ўзимни машҳур деб ҳисобламайман! Ҳали бор машҳурликка! (кулади)
- Суратга тушган фильмларингизда, эндиликда дубляжда ўзингиз овоз бера бошладингизми?
- Йўқ, ҳали. Лекин, ўқидим ва ҳозирда шунга ҳаракат қиляпман. Ўзим жуда ҳам эпизод ролларга, бошқаларга овоз берганман. Бир сериал ва бир фильмдаги кичик ролга. Номи эсимда йўқ, тўғриси. "Ассалому алайкум, яхшимисиз" дегандек қисқа гаплар эди. Яқинда "Ақл ва юрак" фильмида ҳам кичик бир образга овоз бердим.
- Фильмлардаги гонорар борасида режиссёрлар ёки продюсерлар билан келишув қандай бўлади?
- Одатда продюсерлар билан гаплашамиз, келишамиз. Тортишувлар бўлмаган. Лекин, мен албатта сценарийга қарайман.
- Агар сценарий зўр бўлса, ўша фильмда текинга суратга тушишингиз ҳам мумкинми?
- Ҳақиқатдан зўр сценарий бўлса ва ўша фильм зўр чиқишга кафолат бўлса, албатта! Масалан, "Пойма-пой" фильмида, маблағ борасида ўйламаганман ҳам, ажратилган маблағга рози бўлганман. Чунки, фильм сценарийси маъқул бўлганди.
- Келажакда сизни хонанда сифатида ҳам кўришимиз мумкинми?
- Хонандалик менга ёқади. Хонанда бўлиш орзуйим бор эди. Ёшлигимдан кўпроқ хонандаликка қизиққанман, "Аладдин" шоу гуруҳига қатнашганман. Ўша ерда қўшиғим, 10 ёшлардаги овозим бор эди. Лицейга ўқишга киргач, давом эттирмадим. Кейин шундай бурилиш бўлиб қолди, актрисаликка ҳаракат қилдим.
- Демак унда кейинчалик ният бор?
- Барибир инсоннинг ичида орзуси бўлади. Балки, ўзимни синаб кўриш учун (кулиб) бир марта бўлса ҳам, қўшиқ ижро қилиб кўришни ҳоҳлайман, тўғриси. Агар имконият бўлиб қолса, бир марта бўлса ҳам, ўзим учун қўшиқ айтиб кўраман.
- Суратга олиш майдонида режиссёрнинг буйруғини индамай бажарасизми, ёки ўзингиз ҳам фикр билдирасизми?
- Энди ўзимни ҳам фикрим бўлади, ичимда ўйлайман. Гапиргим келади, лекин тўғриси кутиб тураман-де, "нима бўларкин?" деб, режиссёрнинг нима қилаётганига қараб тураман. Бошида мен, кинога кириб келган пайтларимда, гапирмаганман, чунки мен кўп нарсани билмаганим учун жим турганман, фақат кузатиб турганман. Ҳозир энди-энди (кулиб) бир-бир гапириб тураман, тилим чиқиб туради. Лекин, кўп гапирмайман.
- Дейлик, ўша режиссёрнинг топшириғи, айтаётган иши, сизнинг принципларингизга тўғри келмаса, ёки сизга ёқмаса?
- (кулиб, эслаб) Бир марта гапирганман, лекин қайси режиссёрлигини айта олмайман, хафа бўлиб қолишлари мумкин. У ерда эътироз ҳам бўлмаган, мени фикримча, нотўғри олинган деб ўйлайман. Ўшанда аниқ топшириқ қўйилмаган, оператор ҳам бошқача услубда олаётган экан. Кейин экранда кўрсатишганда, нотўғрироқ ўйнаган эканмиз, юзимиз ҳам кўринмаган. (кулиб) Шунда "яхши тушунтирмабсизлар" деганман.
- Роль ижро этаётганда, нимани, қайси ҳаракатни бажаришни аниқ рад этасиз?
- Ачомлашиш саҳналарини!
- Лекин, "Пойма-пой" фильмида шундай саҳна бор эди. Ижро этгансиз.
- (кулади) Ҳа ижро этганман. Тўғрисини айтсам, у биринчи ишим бўлган, кўп нарсани билмаганман! Роль давомида, роль ҳолатидан келиб чиқиб, ижро этганман. Барибир бошида актриса сифатида, бундай ролларни рад этаман. Мана ҳозир ҳам бир сценарий ўқидим. Лекин, бизга тўғри келмайди, чунки бизни актрисалар барибир қўрқишади, уялади, айтмоқчиманки, ўзини ўйлайди, чунки одамлар у ҳақида нотўғри ўйлашлари мумкин. Ота-онаси бор, менталитетимиз бошқача. Бизнинг ўзбек қизларида ибо-ҳаё ва тарбия барибир кучли.
- Демак, рад этасизу, лекин ижро этишингиз мумкин?
- Йўқ! Биласизми қандай бўлган? Бошида гапираман, шундай жойлари бўлса, ўйнамайман дейман! Жуда бўлмаса, қўл ушлаб, ижро этиб бер дейишади. Тўғри, "Пойма-пой"да эътироз билдирмаганман, бу биринчи ишим эди! Уялганман, кейин балки ёш бўлганман! Кўп нарсани билмаганман! Ҳамма "ўзингиз йўқ дейсизу, ўзингиз ачомлаб қўйгансиз" деб, айтишади. (кулади) Ўзим ҳам билмай қолган ҳолда, ролдан келиб чиқиб шундай бўлган. Ўйнаётганимда ўйлаб қолганман, "вой, энди одамлар нима деб ўйлайди" деб роса уялганман. Балки режиссёр билган, мен норози бўлишим мумкин эди. Лекин, баъзида шу нарса бўлмаса, ўша эпизоднинг таъсир кучи қолмайди. Одамлар ҳам ҳар хил. Кимдир айтади, "йўқ, нотўғри айтяпти, бошқача қилса бўларди" дейиши ҳам мумкин. Аммо, режиссёрлар билан гаплашганда ҳам, ўзим сценарий ўқиганда ҳам, фильмлар яхши чиқиши учун, баъзи эпизодларнинг таъсир кучини ошириш учун, бир хилларида "шу нарса" ҳам керак бўлиб қолар экан. Лекин, тўғри "ачомлашиш" саҳналарини ўзим ўйнагим келмайди. Ўзим ҳоҳламайман.
- Актрисаларни клипларда суратга тушишларига қандай қарайсиз? Бу эҳтиёжми ёки янада танилиш учун ҳаракат? Сиз учун-чи?
- Муносабатим яхши. Энди, бу актрисаларнинг шахсий иши менимча, ўзи ҳоҳласа тушади.
- Хонанда Сардор Раҳимхоннинг "Қиз бола" қўшиғига ишланган клипида суратга тушишга сизни ким таклиф этди? Жараён қандай кечди? Яна бошқа клипларда ҳам тушганмисиз?
- (кулиб) Тўғрисини айтсам, кинога кириб келишимдан анча олдин, бир Хоразмлик хонанданинг клипида суратга тушган эдим. Лекин, у клип тарқалиб кетмаган, ўша Хоразмда қолиб кетган. Лекин, менда диски бор ва бу мени биринчи ишим эди. Ундан сўнг, ҳеч қандай клипда суратга тушмаганман. Кейин, фильмларда суратга тушдим. Ундан сўнг, хонанда Сардор Раҳимхоннинг "Қиз бола" қўшиғига ишланган клипида суратга тушганман. Сардор Раҳимхоннинг ижодий лойиҳаси ҳисобланган "Баён" гуруҳи йигитлари ва хонанда Дилсўз билан яхши муносабатдамиз, улар менинг курсдошларим. Улар таклиф беришган, Сардор акага суратимни кўрсатишган. Сардор ака маъқуллаганлар ва шундан сўнг, мени чақиришган. Бундан сўнг, бошқа клипларга ҳам таклифлар бўлди. Лекин, суратга тушмадим. Сабаби, мен кўпроқ кинода суратга тушишни ҳоҳлайман ва кинодан таклиф кутаман. Лекин, агар клип ғояси ва сценарийси жуда ҳам яхши бўлса, тушишим мумкин.
- Ўзингизни касбингизни кимлардан қизғанасиз? Ҳозирда Санъат институтида ўқимай туриб ҳам, роль ижро этаётганлар кўп, бу ҳақида фикрларингиз?
- Йўқ, қизғанаман дея олмайман. Агар ёшлар истеъдоди бўлиб туриб, роль ижро этса, фильмларга чиқса, яхши. Тўғри, ҳозир кинода шундай ҳолат ҳам бўлиб қолди, бошқа касб эгаси бўлиб туриб, фильмларда чиқишяпти, лекин буни ўзгартириб бўлмайди. Агар истеъдоди бўлса, бу яхши.
- Ҳозирги кунда Санъат институтида ўқиётганлар кўпроқ муваффақиятга эришишяптими ёки бошқа соҳадан кинога кириб келаётганлар?
- (ўйланиб) Энди буни мен ўйлайманки, халқ, томошабинлар аниқлашлари мумкин. Энди бизнинг Санъат институтида ўқиганлар кўпроқ спектаклларда ишлашни яхши кўришади, театрда ишлашади. Театрда ишлаганда инсонни ҳақиқатдан ҳам, актёрлик маҳорати ошади. Ҳозирги кунда, фильмларда бошқа соҳадан кириб келаётганлар кўпроқ муваффақиятга эришишмоқда, назаримда. Бунинг сабаби, бошқа соҳадан кириб келганлар режиссёр қандай ўргатса, шунақа ўйнайди. Баъзида уларда ҳам яхши чиқиши мумкин. Биласизми, менимча ҳаммасида меъёрни билиш керак, меъёр бўлиши керак.
- Ўзи умуман, театр ва кино актёрини фарқи нимада деб ўйлайсиз? Гап фақат меъёрдами?
- Театрда кўпроқ томошабин билан алоқа бўлади, бу қийин нарса. Масалан, импровизация қилиб юбориш керак, қийин, осон эмас. Кинода эса, дубль деган нарса бор. Томошабин буни кўрмайди, биринчи дублда қандай ўйнади, иккинчисида қандай, билинмайди. Театрда хатони тўғрилаб бўлмайди ҳам. Мен кинодан кўра, театрни қийин деб ўйлайман.
- Сиз ўзингиз кейинчалик театрда роль ижро этишингиз мумкинми?
- Ҳа, албатта. Шунга ҳаракат қиляпман. Лекин, агар театрга борсам, эпизод роль ўйнасам ҳам рози бўлардим. Театрга боришга, кузатишга унчалик улгурмаяпман. Чунки, ҳозирда ўқишимни битириб олишим керак, деб ўйлайман. (кулиб) Тўғриси, улгурмаяпман.
- Биров билан танишганингизда биринчи навбатда, унинг қайси жиҳатига қарайсиз?
- (кулиб) Муомаласи яхши инсон бўлса, мени ҳурмат қилса, мен ҳам яхши муносабатда бўламан. Одам ажратмайман.
- Бирга роль ижро этаётган партнёрларингизни қайси жиҳатлари сизга ёрдам бериши мумкин? Ижро маҳорати, пластикаси ёки?
- Ижро маҳорати, албатта. Ижро маҳорати яхши бўлса, мен ҳам яхши ўйнашга ҳаракат қиламан. Иккита актёр ўртасида ўзаро бир-бирини тушуниш бўлиш керак, бўлмаса қийин бўлади. Улар бир-бирини "поддержка" қилади. Бир-бирига таъсир кучи бўлади. Дейлик, партнёрим яхши ўйнаса, мен тушинтириб берсам, у актёр ҳам секин-секин тушиши мумкин. Шунинг учун, мен ҳам ҳаракат қиламан. Бизнинг актёрларимизга келсак, ҳаммаси яхши ўйнашади. Мен ҳам, бир неча актёрлар билан бирга ишладим, Адиз Ражабов, Алишер Узоқов, Умид Искандаров ижро маҳоратлари жуда ҳам яхши, мен уларни уччаласини ҳам ажрата олмайман.
- Режиссёр Жавлон Шодмоновнинг "Суперқайнона" фильмида суратга тушдингиз. Бу ролни қайси жиҳатига қараб рози бўлдингиз? Мавзуси оммабоп "қайнона-келин" бўлгани сабаб эмасми?
- Йўқ. Менга бу фильм сценарийси комедия бўлгани учун жуда ҳам ёқди! Худо ҳоҳласа, томошабинларга ҳам маъқул келса, керак деб ўйлайман. Энди, "Пойма-пой", "Фаришта" фильмларида, ҳаётда жуда қийинчиликларга дуч келган қаҳрамонлар ролини ўйнаган бўлсам, бу фильмдаги образим бошқача. Комедик тарафлари ҳам бор, келин образи. Менга таъсир қилган жойи, қайнона келинига шарт қўядиган жойлари бор. Мен балки, ҳали келин бўлмаганлигим учунми, ўша жойларида ўзим учун била олмадим, "келин нима дейди? Қанақа ўйлайди? Қанақа ўзгаради?" (кулади) Чунки, келинлар ҳам ҳар хил бўлади-ку. Шу жойларида "қандай қилсам экан, қандай келин бўлиш керак, қўрқиб турсаммикан" деб, характеримни, қандай қиз, келин бўлишим кераклигини, кўп ўйладим. Энди кимдир яхши келин бўлса ҳам, қайнонасига гапира олади, кимдир гапира олмайди! Лекин, фильмда ёмон келин бўлмайман! (кулади) Фильмда шундай бир эпизод ҳам бор, ўша қайнонасини шартига рози бўлиб, қилмаган ишини "ҳа" деб бўйнига олиши керак. Шунда кўзимга чиндан ҳам ёш келди. Суратга олиш жараёнида режиссёр Жавлон Шодмонов, кўп жойларида тўғри тушунтириб бердилар ва энг муҳими, ролимни ўзимдан келиб чиқиб, ўйнашимга имконият яратиб бердилар. Ўзларига маъқул келмаса, тушунтирдилар. Шунинг учун ҳам, бу ролни ижро этишда, қийналмадим.
- Тўғри, бу роль, лекин ўзингиз ҳаётда фильм қаҳрамони бўлган келин каби вазиятга тушиб қолсангиз, қандай келин бўлар эдингиз? Қандай йўл тутардингиз?
- (қатъий) Чидардим, сабр қилардим. Чунки, бу оила. Оила эса, бузиш осон, бир пасда бузиб ташлаш, "ажрашаман" деб кетиш жуда ҳам осон! Сабр-тоқат билан ютиш эмас, жуда ҳам қийин нарса. Мен ўзим, сабр-тоқат билан чидаган бўлардим.
-Қайси актрисаларда йўқ хислатлар менда бор деб ўйлайсиз?
- (кулади) Унақа нарсани айта олмайман ахир. Буни ташақаридан, кўрганлар айтиши керак. Йўқ, менда бунақа десам... (кулади) аксинча, мен актрисаларга қараб, уларни яхши жиҳатларини кўрсам, шунақа бўлишга интиламан, ҳавас қиламан. Менга Дилноза Кубаеванинг кулиши, шўхлиги ёқади, Гулчеҳра Эшонқулованинг ташқи кўриниши, чиройи, Феруза Собитованинг қатъияти, Жамила Ғофурованинг ижроси, Райҳон Уласенованинг маҳорати, менга кўпчилик актрисалар ёқади, ижодларини кузатиб бораман.
- Ўтган 2011 йилда нималарга улгурдингизу, нималарга улгура олмадингиз?
- Фильмларда суратга тушишга унчалик улгура олмадим! Сабаби ўқишим, фақат "Ёзсиз йил", "Тилла бува", "Вафодорим", "Суперқайнона" ҳамда, хонанда Сардор Раҳимхоннинг клипида роль ижро этдим. 2012 йил бошида эса, "Ақл ва юрак" фильмида иккинчи даражали роль ижро этдим. "Ақл ва юрак" фильмида бош ролларни Алишер Узоқов, Муниса Ризаева, Улуғбек Раҳматуллаев, Зарина Низомиддинова ижро этишди. Собиқ "Баён" гуруҳи хонандаси Маъмур Султонов ва мен иккинчи даражали роллардамиз. Бу Маъмур Султоновнинг дебют иши.
- Баъзилар иккинчи даражали ёки эпизодик роль бўлгани учун ҳам, атайлаб катта гонорар олишини айтади. Баъзилар эса, ўша ролни ёдда қоларли бирор жиҳати борлиги учун рози бўлганини билдиради. Сиз-чи, қайси жиҳати учун ижро этасиз?
- Мен сценарийсига қарайман, сценарий яхши бўлса, рози бўламан. Чунки, яхши фильм бўлса, барибир томошабинлар кўрадилар. Тўғри, бир гал ўзим ҳам, "эпизодик кичик роль экан-ку" деганман. Шунда менга, "ролни катта-кичиги бўлмайди, бундай демагин" дейишган, институтда ҳам, ўқитувчим ҳам шундай деганлар.
- Қайси фильмни кўриб, жуда ҳам таъсирлангансиз ва анча вақтгача унинг таъсирида бўлгансиз?
- Эрон фильмини кўргандим, "Тошбўрон қилинган Сурайё" фильми. Бу фильм бўлган воқеа асосида суратга олинган экан. Биласизми, у фильмда бир аёлга, эри бўлиб туриб, хиёнат йўлига кирди, деб туҳмат қилишади. Ўша пайтда Эронда шунақа қоида бўлган экан, агар кимдир эрига хиёнат қилса, эркаклар йиғилиб тош отишар экан. (фильмни эслаб) Роса бир таъсирли, ачинарли ва қўрқинчли ҳам дейиш мумкин. Ҳақиқатдан бўлган воқеа экан.
- Журналистлар билан қайси мавзуда суҳбатлашишни истардингиз?
- Мисол учун, айтишса, сизни ролингизда аниқ мана шундай камчилик бор деб, айтишса, роллар бўйича суҳбатлашгим келади.
Қисқа саволлар:
- Мухлисларингизнинг сизга нисбатан ҳатти-ҳаракатлари?
- (кулиб) Қизлар телефон қилиб туришади, ҳол-аҳвол сўрашади. Улар билан кўпинча телефонда гаплашаман.
- Рассом бўлганингизда, дунёни қайси рангда чизган бўлардингиз?
- Яшил билан оқ рангларда! (кулиб) Тўқ яшил эмас, яшнаб турган яшил рангда! Ўзим ҳам расм чизишга қизиқаман, лекин қўлимдан келмайди. Шунинг учун, уриниб кўрмаганман.
- Вақтнинг қадрига етасизми?
- Албатта. Бекор ўтказмасликка ҳаракат қиламан.
- Кунига неча соат ухлайсиз?
- Ҳар хил. Бир хилларида вақтида ухлайман, бир хилларида кеч. Съёмкадан кеч келиш мумкин, баъзида меҳмонлар келиб қолишлари мумкин. Лекин, барибир вақтлироқ туришга ҳаракат қиламан.
- Ҳеч ёмғир тагида сакраб кўрганмисиз?
- (кулиб) Йўқ. Менга қор ёқади, ёмғирда ҳўл бўлиб кетаман.
- Тиш докторидан қўрқасизми?
- Йўқ.
- Дугонангиз сизга жуда ҳам муҳим сирини айтди. Бу сирни бошқаларга айтсангиз, сизга машҳурлик олиб келиши мумкин. Нима қиласиз?
- Йўқ, мен унинг сирини сақлайман, айтмайман.
- Яқин орада сизга ёққан фильм?
- Ўзбек фильмларидан "Фарзандим", "Муқаддас бурч" фильмлари. Шунингдек, Россия сериалидан "И всё таки, я люблю" сериали.
- Қайси услубда кийинишни ёқтирмайсиз?
- Кийим танламайман. Иш бўйича, оддий кунларда ўзимга қулай услубда кийинаман, оёғимга паст пошнали оёқ кийим кияман. Концертларга борсам, албатта, бошқача ўша жойга мос кийим кияман.
- Севимли фильм қаҳрамонингиз?
- Энди, мен фильмни кўрсам, ўша бош қаҳрамон ёқса, яхши ижро этса, (кулади) яхши экан, дейман, ҳурмат қиламан. Кейин, исми эсимдан чиқиб қолади.
- Биринчи гонорарингизга нима сотиб олгансиз?
- Ота-онамга берганман.
- Ота-онангизга совға сотиб олганда, нима совға қилишни яхши кўрасиз?
- Уларга керакли нарсани сотиб олиб, совға қилишга ҳаракат қиламан. Қарайман, нима керак эканлигини кузатаман.
- Қайси ролни умуман ижро этмаган бўлардингиз?
- Йўқ, буни ҳозир айта олмайман. (кулиб) Ҳозир шунақа десам, кейин ижро этиб қўйсам-чи? Ўшанга айтолмайман.
- Онангиз қайси таомни яхши кўришларини биласизми?
- Ойижоним овқат танламайдилар.
- Суратга олиш майдонида нимадан қўрқасиз?
- Роль ижро этаётганда яхши ўйнай олмасам, яхши чиқмаса, шундан қўрқаман.
- Суратга олиш майдонида ҳамма кулиб турибди, бир кулгили ҳодиса бўлган. Сиз эса, шу пайт йиғлайдиган драматик ҳолатни ижро этишингиз керак. Улар бўлса, ҳамон кулишяпти.
- Мен кулаётганларга қўшилмайман. Бир четга бориб, ўша образ ҳақида ўйлаб, унинг ҳолатига киришга ҳаракат қиламан.