FATTOHHON.COM
« Все новости
«Шод» гуруҳи аслида "Жанона" клипига клип суратга олдириш учун бир ой давомида, "Ўзбекфильм" павильонларидан бирида, 2 хил декорация қурдирган эдилар. Лекин, гуруҳ аъзолари кутилмаганда бошқа бир янги қўшиқ "Севасан-ку"га клип ишлаш ҳаракатини бошлаб, унга ўзлари ишонган клипмейкер режиссёрлардан Ёдгор Носировни таклиф этдилар.
Клипнинг энг оригинал жиҳатларидан бири унда, умуман қизларнинг иштирок этмаслигидир! Бунинг сабабини, гуруҳ йигитлари суратга олиш ишлари вақтида маълум қилишди.
Соат 17.00 да клипни суратга олиш жараёни бошланди.
Отабек: - "Севасан-ку" қўшиғимизга клипмейкер режиссёр Ёдгор Носиров билан маслаҳатлашган ҳолда, трек клип суратга оляпмиз. Клипда уч хил имиджда чиқишимиз керак. Икки хил декорация, трекда фақат ўзимиз! Тўғриси, мухлисаларимиздан кўп шикоятлар эшитдик! "Ҳали у қизни олиб чиқасизлар, ҳали бу қизни олиб чиқасизлар" деб кўп айтишди. Биз ҳам шунга охири бир қарорга келдик ва бу сафар клипимизда қизларни мутлақо суратга туширмасликни ўйладик!
Шуҳрат: - Биз ўйладик, "Севасан-ку" деганимиз, бу мухлисларимиз учун айтган сўзимиз! "Севасан-ку", яъни эшитасан-ку, севасизлар-ку бизни, эшитасизлар-ку деган маънода. Ахир мухлисларимиз, бизни севишади, эшитишади! Нафақат бу янги қўшиғимиз, балки барча қўшиқларимиз ҳам фақат ва фақат мухлисларимиз учун!
Отабек: - Қўшиғимизни маъноси ҳам қизлар ҳақида, "шаҳло кўзли, ширин сўзли" "ўзбекона"! Бу қўшиқни барча қиз бола мухлисларимизга бағишлаймиз! Қўшиқ шеъри Ирода Қурбонова қаламига мансуб, мусиқаси "Шод" гуруҳига тегишли, яъни ўзимиз ёзганмиз. Аранжировка Жасур Жавҳарназаровга тегишли. Агар эътибор берсангиз, ўзи ТВМ телеканалида ҳам эфирда кетаётган клипларимиз бир-биридан фарқ қилади. Яна янгидан янги клиплар билан мухлисларимизни хурсанд қилиш ниятидамиз.
Шуҳрат: - Ўзи ижодкор инсон ҳар куни бир хил кайфиятда юрмайди. Шунинг учун яратаётган, куйлаётган қўшиғи ҳам ўзининг кайфиятига боғлиқ бўлганлиги учун ҳам, биз доим ҳар хил услубда клиплар суратга олдиришга ҳаракат қиламиз. Шунинг учун ҳам, қўшиқларимиз ҳам ҳар хил.
Отабек: - Бу галги клипимиз учун ҳам режиссёр сифатида Ёдгор Носировни таклиф қилганимизнинг сабаби, у кишини жуда ҳам ҳурмат қиламиз ва ишонамиз! Тўғри бошида бошқа клипмейкерлар билан ҳам ишладик, ҳамма клипмейкерлар билан яхши муносабатдамиз. Ҳамма клипмейкерларни ижодларини кузатган ҳолда, бизнинг ишимизга, дидимизга мос, бизга имконият берадиган режиссёр, бизни биладиган, тушунадиган режиссёр Ёдгор Носировга мурожаат қилдик. У киши бизни гапимизни бошлашимизданоқ клипни қандай бўлишини ҳоҳлаётганимизни биладилар. Шунинг учун ҳам, Ёдгор ака билан ишлаш бизга ёқади. (самимий кулиб) Клипимизга баъзи ўзгача деталлар Ёдгор аканинг фикри билан қўшилди. Масалан, (биринчи декорацияни кўрсатиб) мана шу ерда костюм-шим билан ерга ётишимизга тўғри келди.
Дониёр: - "Жанона" қўшиғимиз бундан бироз аввал ёзилган эди. Ўша пайтларда унга клип суратга олгимиз келганди. Лекин, кейин яна янги, яхши қўшиқлар яратдик ва мана "Севасан-ку" қўшиғимизга меҳримиз кўпроқ бўлди. Мусиқасини ҳам ўзимиз ёзганимиз учунми? Қўшиғимиз шўх, рақсбоп, кайфиятни кўтарадиган қўшиқ. Клип режиссёри Ёдгор Носиров эса, ўзимизнинг акамиз! Уларга бемалол ишониш мумкин! Бу қўшиқда ҳаммамизни меҳнатимиз мужассам. Мана ҳозир маза қилиб ишлаяпмиз! Яна бир жиҳати, кўчада эмас, павильонда суратга оляпмиз. Кўча жуда ҳам иссиқ, бу ерда эса ҳаво бироз муздекроқ.
Суратга олиш ишлари бир маромда кечгани билан ўта иссиқ ҳаво павильонда ҳам ўз таъсирини ўтказмай қолмади. Грим ҳам иссиққа дош беролмаслиги табиий. Албатта, шундай иссиқда соатлаб костюм-шимларда қўшиқ куйлашнинг ўзи бўладими?
Охири гуруҳ йигитлари шартта катта вентилятор қаршисига бориб олдилар.
Ёдгор Носиров одатдагидек гоҳ жиддийлик билан камера қаршисида ўйланиб, гоҳ баъзи нарсалардан асабийлашиб, гоҳ кайфияти кўтарилиб, берилиб клипни суратга олаётган эди.
Ёдгор Носиров: - Ўзи клип бошқа қўшиққа олинмоқчи бўлган эди. Декорациялар пластинка ва шахмат шаклида қурилган. Клипни оригиналлиги унда бирорта ҳам қиз йўқ! Одатда, ҳамма клипларда қизлар кўриниши керак. Лекин, биз гуруҳ йигитлари билан келишган ҳолда, қизларсиз клип суратга олишга қарор қилдик. (ҳазил билан) Ҳозир йигитлар норози бўлишяпти, "йўқ, клипда қизлар бўлиши керак" дейишяпти.
Шуҳрат: (дарров гапни давом эттириб): - Йўқ, биз Ёдгор Носиров нима десалар, шу, деб турибмиз! Биз бу қўшиқни ўша қизлар учун айтмоқчимиз. Клипда суратга олмадик, лекин қўшиқ ва сўзларимиз улар учун!
Ёдгор Носиров: - "Шод" гуруҳи йигитлари ўзлари жуда ҳам маҳоратли, пластикаси кучли, шунинг учун улар билан саҳнада қийналиш бўлмайди. Улар ўзларини саҳнада бемалол тутишни билишади. Яна ўзига хос жиҳатлари клип декорацияда олиняпти ва имиджлар устида ҳам ишланган. Йигитлар замонавий услубда кийинишади. Клипларимда асосан, мен ўзим ошириб юбормасликка, соддаликка ҳаракат қиламан. Бу клипда ҳам, шунга интилдим. Бу трек клип ва шунинг учун ҳам узоқроқ вақт суратга олинади, деб ўйлайман. Чунки, трек клипда кўпроқ деталларга, ҳолатларга аҳамият берилади. Декорациядан ҳам максимал даражада фойдаланиш керак. Гуруҳ йигитлари ҳозир клипдаги баъзи бир ҳаракатлар учун 80 йиллардаги каби ҳаракатлар каби бир нарсалар ўйлаб топишди. Суратга олиш жараёнида, ҳали яна кўрамиз. Бу клипда асосий эътибор гуруҳга қаратиляпти!
Кутилмаганда суратга олиш майдонига, қўшни павильонда клип суратга олаётган клипмейкер режиссёр Жасур Шаметов меҳмонга кириб келди. Уни суратга олиш гуруҳидагилар хушкайфиятда кутиб олдилар. У ҳамкасбидан ҳол-аҳвол сўрагач, яна ўз павильонига чиқиб кетди.
Гуруҳ йигитлари битта имиджда суратга тушиб бўлишгач, дарҳол иккинчи имиджда, иккинчи декорацияга ўтдилар ва яна суратга олиш ишлари бошланди.
"Жанона" қўшиғининг тақдири қандай кечар экан, унга ҳам клип суратга олинадими, деб қизиққанимизда, маълум бўлдики, бу клипга Самарқандда клип суратга олиниши режалаштирилган экан.
Гуруҳ йигитлари "Севаман-ку" клипини "қанча тез тайёр бўлса, шунча яхши" деб, тез кунларда тайёр бўлишини маълум қилишди.
Клипга ҳозирги клипларда жуда кўп урф бўлган компьютер графикаси мутлақо аралаштирилмаган!
Клипда фақат "Шод" гуруҳини кўришингиз мумкин!
Клипни суратга олиш ишлари тонгги соат 04.00 га қадар давом этиши режалаштирилган экан.
Соат тунги 24.00 дан ошганларда суратга олиш павильондан чиқиб кетаётганимизда, у ерда кўтаринки муҳит ҳукмрон эди . . .
Суратга олиш жараёнига таклиф учун гуруҳ администратори Зафар акага раҳмат!
Сигаретсиз, қаҳвасиз ва энг муҳими қизларсиз клип)))))) Демак клипни кутиб қоламиз!
Феруза Фаттохова
Саида Вахобова
