FATTOHHON.COM
« Все новости
“ТУШУН ВА КЕЧИР” ФИЛЬМИ ПРЕМЬЕРАСИДАН! 15.02.2013 14:31
15 февраль куни соат 18.00 да “Алишер Навоий” (собиқ Панорама) киносаройида дебютант режиссёр Дмитрий Шеховцевнинг “Тушун ва кечир” фильми премьераси бўлиб ўтди.
Фильмда бош ролни актриса Шодия Тўхтаева ижро қилган.
Асосий ролларда, Рустам Каримов, Азиза Бегматова, ҳамда Гавҳар Шариповалар суратга тушишган.
Фильм ижодкорлари саҳнада таништирилгандан сўнг, фильм режиссёри Дмитрий Шеховцевга сўз берилди.
Режиссёр ўз ижодий гуруҳига миннатдорчилик билдириб, уларни бу фильмда бепул ишлаганликларини айтиб, уларга чексиз раҳматлар айтди.
Маълум бўлишича, фильмнинг суратга олиш ишларига, турли сабаблар билан 3 йил вақт кетибди.
Фильм драма жанрида суратга олинган. Фильмнинг асосий ютуқлари, бу унинг мазмуни бўлиб, унда “Ота-онанинг қадрига етиш”, ҳақида фикр юритилган. Шунингдек, инсон ўз муаммоларига бировларни айбдор қилмасдан, хатоларни ўзидан излаши кераклиги, ҳамда дилида бошқаларга нисбатан нафрат сақламаслиги кераклиги ҳақида ҳам, мулоҳаза қилинади. Шунингдек, актёрлар ижроси ҳам фильмнинг асосий ютуғини ташкил қилади. Чунки, актёрлар гуруҳи ўз ролларини ишонарли ва табиий ижро қилишган. Айниқса, Шодия Тўхтаева ва Рустам Каримовлар ўз қаҳрамонининг драматик ҳолатини жуда ҳам ишончли талқин этишган!
Лекин, режиссёрнинг илк иши бўлганлиги учунми, фильмда анчагина хатолар кўзга ташланган. Масалан, техник сабаблар, кадрлар хиралиги, ортиқча ва кераксиз кадрлар, шунингдек дубляждаги баъзи камчиликлар, сюжетлардаги баъзи саёзликлар етарли, назаримизда. Балки, шу тарафдан ҳам, режиссёр ўзи ўйлаган ғояни томошабинга тўлиқ етказа олмагандир, деб ўйлаймиз.
Ҳозирги кунда фильм суратга олаётган ёш ижодкорлар, ўзларига тажрибали режиссёрларни бадиий раҳбар қилиб олсалар, фильмлардаги турли хатоликлар ва саёзликлар камайиб, мақсадга мувофиқ бўларди, деган фикрдамиз.
Саида Вахобова
Феруза Фаттохова
Ижодий ҳамкорлик учун Сардор Ариповга ва
Фотосуратлар учун Мурод Лапасовга миннатдорчилик билдирамиз.
