FATTOHHON.COM
« Все новости 
«Заминфильм» студиясининг яна бир фильми, шу кунларда монтаж жараёни кечаётган ишчи номи «Ўжар» бўлган фильм номи, "Бевафо" деб ўзгартирилди!
Бунга асосий сабаблардан бири, хонанда Алишер Рўзметовдир. Унинг қўшиқлари ичидан "Бевафо" қўшиғи, фильм ижодкорларига жуда ҳам маъқул бўлган ҳолда, уни фильмга саундтрек қўшиқ сифатида танлаб олдилар.
Сўнг, қўшиқ сўзлари ва фильмнинг мазмунидан келиб чиққан ҳолда, фильмга "Бевафо" деб янги ном беришди.
Мазкур саундтрекка пойтахтимиздаги «Факультет» кафесида клип ҳам суратга олинди. Яъни, бу саундтрек клипдаги Алишер Рўзметовнинг трек саҳналаридир.
Суратга олиш жараёни бир неча соат давом этди ва хонанда Алишер Рўзметов 2 хил қиёфада кўриниш берди. Ҳар икки кўриниш ҳам классик услубда.
Суратга олиш жараёнида хонанда Алишер Рўзметовнинг актёрлик қирралари ҳам намоён бўлгандек . . . У трекни ўзининг характерли ижроси билан бойитди, дейиш мумкин.
Алишер Рўзметов хонанда: - "Бевафо" қўшиғи репертуаримда бор қўшиқ бўлиб, лекин ҳали эфирга кетмаган эди. Уни фильм ижодкорларига эшиттирганимдан сўнг, фильмга саундтрек сифатида танлангач, унга янада сайқал бериб куйладим. Қўшиқ шеъри Иброҳим Жиянов, мусиқа бастакори ўзим, аранжеровкачи Жавлон Комилов. Бу ўзим мусиқа басталаган биринчи қўшиқ эмас. Бошқа яна бир нечта қўшиқларимга ҳам ўзим басталаганман, лекин улар ҳали тўлиқ тайёр эмас.
Бу қўшиғимни фильмга саундтрек сифатида танланишига сабаб, фильм мазмунига кўра, воқеалар тизимида бевафолик бор экан. Менимча, шу тарафлама фильм ижодкорларига қўшиқ маъқул келди шекилли... Мени ўзи орзуйим саундтрекда чиқиш эди. Баъзилар саундтрек куйлайди-да, кейин уни ўзи унга бошқа клип ҳам суратга олдиради. Лекин, мен ундай қилмайман. Саундтрекми, саундтрек! Фильм ҳақида менга сўзлаб беришганида, чиндан ҳам унда бевафолик борлигига амин бўлдим.
Суҳроб Ҳасанов фильмнинг бадиий раҳбари: - Мени фильмга бадиий раҳбар сифатида таклиф этилганман. Биз бу фильмда айтмоқчи бўлганимиз, шахсан менинг ўзимга ҳам маъқул бўлган жиҳати, ўзимизнинг менталитет ва дунёқарашдан узоқлашиб кетмадик. Ўзимизнинг ҳаётимиздаги оддийгина зиддиятли вазиятлар ва келиб чиқиши мумкин бўлган жиддий жанжаллар ва хурсандчиликлар, алам ва қайғу, ўзбекона оилавий муҳитдан чиқиб кетмаган ҳолда, ўзимизга яқин бўлган нарсаларни кўрсата олдик, деб ўйлайман. Ҳозирги пайтда оилавий мавзудаги фильмлар ҳам кўпайиб кетяпти, дейиш мумкин. Чунки, ҳар бир ижодкор фильм яратаётганда ҳозирги кундаги талабга қараб яратади. Шуни ҳам инобатга олмасак бўлмаяпти, ҳозирги кунда эса, оилавий мавзудаги фильмлар давр талаби бўлиб қолган, деса ҳам бўлади. Бошқа жанрларга қўл уриляпти, лекин халқимиз қабул қилмаяпти, десам ҳам бўлади. Фақатгина оилавий мавзудаги ўзимизнинг ўзбекона фильмларни кўришяпти. Мана ҳозир саундтрекка клип суратга олиняпти. Фильмнинг суратга олинишидан аввал саундтрек масаласи ҳақида ўйлаб кўрганмиз. Кўпгина қўшиқларни тинглаб кўрдик ва хонанда Алишер Рўзметовнинг дардли хонишидан бутун жамоа таъсирланган ҳолда, бир тўхтамга келдик. Бошқа фикрлар ҳам бўлди, бошқа қўшиқни саундтрек қилмоқчи ҳам бўлдик, лекин барибир яна шунга қайтдик. Фильмнинг номини ҳам шу саундтрек сўзларидан олдик. Шунингдек, фильмдаги воқеалар айнан бевафолик тўғрисида бўлиб, аёлнинг эркакка бевафолиги, ҳаётни аёлга бўлган бевафолиги ҳақида. Ҳаммамиз келишган ҳолда, фильмни бевафо деб, номладик. Кўзланган режалардан 100 фоиз бўлмаса ҳам, 90 фоизига эришдик, деб ҳисоблаймиз.
Феруза Фаттохова
Саида Вахобова
