FATTOHHON.COM

“ВАҲШИЙ” ФИЛЬМИ ПРЕМЬЕРАСИДАН! КУТИЛМАГАН ФИНАЛ ВА ЖУМБОҚНИНГ КУТИЛМАГАН ЕЧИМИ! 14.05.2016 01:18

Ўзига хос мавзуни ўз ичига олган “Ваҳший” фильмининг премьераси “Алишер Навоий” киносаройида бўлиб ўтди.

Премьерани “Дизайн” гуруҳи йигитлари кўтаринки руҳда олиб боришди!

Фильм ижодкорлари саҳнага таклиф этилдилар.

Продюсер: Руслан Мирзаев

Режиссёр: Озод Шамс

Сценарий муаллифлари: Феруза Фаттохова, Саида Вахобова

Ролларда: Асал Шодиева, Мираброр Мирхалилов, Ҳамид Тошпўлатов, Шоҳида Исмоилова, Азиз Раметов, Жамила Ғофурова, Шавкат Комилов ва бошқалар...

Ижодкорлар бошқа фильмлар премьераларидаги каби узундан узоқ таништирувлар, ҳамда мақтовларга тўхталмай, саҳнада ижодкорлар таништирувини қисқароқ ўтказиб, томошабинларни фильмни кўриб, хулоса чиқаришга чорлашди.

Фильм намойиши бошланди. Дастлабки кадрлариданоқ “Ваҳший” фильми мавзу тарафлама бошқа фильмлардан ажралиб туриши яққол сезилди. Фильм севги-муҳаббат, оилавий мавзуни ҳам ўз ичига олган ҳолда, томошабинларга бир жумбоқни ҳавола этди.

Фильм якунида эса, томошабинлар мутлақо кутмаган ҳолда, жумбоқнинг ечими топилди, ҳамда ҳеч ким кутмаган финал томошабинларни ҳайрон қолдирди!

Бевақт вафот этган ота-онаси қасоси ва ноҳақ маҳрум этилган бойлиги, маҳрум бўлган болалиги учун қасос олиш туйғуси юрагини ёндирган қаҳрамон қиз, ҳамда бировларнинг оиласини барбод қилиб, бойлик орттирган ноинсоф отанинг фарзанди, аммо ўз отасидан характер тарафлама бутунлай фарқ қиладиган фарзанд бўлган қаҳрамон йигит тақдири, ҳеч кимни бефарқ қолдирмади!

Бошқаларга фақат ёмонлик истаган, қалбидаги меҳр туйғулари ўлган инсон ҳаёти қандай кечиши мумкин? Дўст хиёнатининг жазоси қандай бўлади? Қаҳр ва меҳр ёнма-ён келганда, инсон қандай йўл тутиши керак? Инсондан тақдир ҳам қасос олиши мумкинми?