FATTOHHON.COM
« Все новостиБУЮК АКТЁР НАБИ РАҲИМОВ 100 ЁШДА!
17 сентябрь соат 18.00 да Ўзбек Миллий Академик драма театрида буюк актёр Наби Раҳимовнинг 100 йиллиги муносабати билан, у кишини хотирлаб ижодий кеча бўлиб ўтди. Мазкур кечада Ўзбек Миллий Академик драма театрининг барча актёр ва актрисалари иштирок этдилар. Ижодий кеча “Мафтунингман” фильми қўшиғи садолари остида, Наби Раҳимовни ёд этишдан бошланди.
Биринчи бўлиб, Ўзбек Миллий Академик театри директори Ёқуб ака Аҳмедов сўзга чиқиб, устоз Наби Раҳимов хотирасига бағишланган кечани очиб бердилар.
Сўнг, сўз навбати Маданият ва спорт ишлари вазири Турсунали Қўзиевга берилди.
Шундан сўнг, Наби Раҳимов хотирасига, у роль ижро этган “Отелло”, “Ревизор”, “Қутлуғ қон”, “Бухоро”, “Ғариблар” каби спектакллардан парчалар йиғилган ролик намойиш қилинди. Мазкур роликдан сўнг, кечанинг асосий қисми бошланди, десак адашмаймиз.
Мазкур ижодий кечани актёр Рихситилла Абдуллаев ва актриса Дилноза Кубаевалар олиб боришди.
Наби Раҳимовнинг шогирдлари у киши роль ижро этган спектакллардан парчалар қўйиб беришди.
“Отелло” спектаклидан Турғун Азизов монолог ўқигач, Наби Раҳимов ҳақидаги хотираларни сўзлаб бериб, саҳнага Яйра Абдуллаевани таклиф қилдилар.
Яйра Абдуллаева ҳам Наби Раҳимовни ёд олиб, хотирасига ҳурмат бажо келтирдилар.
Актриса Рихси Иброҳимова ҳам ўз хотираларини сўзлаб бердилар.
Сўнг, “Ғариблар” (эндиликда “Омон бўлинг азизим”) спектаклидан Теша Мўминов ва Малика Иброҳимова ижросида саҳна кўриниши ижро этилди.
Ёш томошабинлар театри вакиллари ҳам устозни хотирладилар.
“Ўзбеккино” Миллий агентлиги Раҳбари Аъзам Ғиёсович Исҳоқов сўзга чиқдилар.
Сўнг, сўз навбати, режиссёр ва актёр Исамат Эргашев ҳамда, актёр Санъат Девоновларга берилди.
“Ўзбеккино” миллий агентлиги томонидан тақдим қилинган, Наби Раҳимов роль ижро этган фильмлар лавҳаларидан иборат видеоролик намойиши ҳам бўлиб ўтди.
Сўнг, Наби Раҳимовнинг шогирдларидан Теша Мўминов, Эркин Комилов, Ёдгор Саъдиев, Тоҳир Саидов, Абдураим Абдуваҳобовлар Наби Раҳимов билан бўлиб ўтган қизиқарли ҳодисаларни сўзлаб беришди. Ёдгор Саъдиев Наби Раҳимов у кишини хатна тўйида иштирок этганларини ҳам сўзлаб берди.
Айниқса, Ёдгор Саъдиев раҳматли Наби Раҳимов у кишига совға қилган бош кийимини кийиб, у кишининг сўзлаши ва ҳаракатларини ўзидек кўрсатиб беришга ҳаракат қилдилар.
Хонанда Насиба Сатторова Наби Раҳимов ҳаётлигида ёқтириб, хиргойи қилиб юрган қўшиқни куйлаб берди.
Ўз навбатида актёр Ёдгор Саъдиев ҳам, Наби Раҳимов ёқтирган яна бир қўшиқни куйлаб, ҳамкасбларини рақсга таклиф қилди.
Шундан сўнг, Мусиқали комедия оперетта театри вакиллари “Ашир мололон” спектаклидан саҳна кўриниши намойиш этдилар.
Алишер Навоий номидаги опера ва балет театри вакиласи ўз қўшиғини тақдим этди.
Муқимий театридан театр директори, актёр Мурод Ражабов ҳам Наби Раҳимов билан бўлиб ўтган қизиқарли ҳодисаларни сўзлаб бергач, Муқимий театри солистлари “Машраб” ғазалини жонли ижрода куйлаб бердилар.
Мурод Ражабов, “қўрқманглар мен қўшиқ куйламайман” дея ҳаммани кулдирдилар.
Сўнг, Наби Раҳимов хотирасига бағишланган яна бир ролик, (сўзларини актёр Муҳаммадали Абдуқундузов ўқиган) намойиши билан ижодий кеча якунланди.
Инсон бу дунёда яхши ном қолдирса, унинг номи йиллар давомида ўчмайди. Ўзи эса, инсонлар қалбида мангу барҳаёт яшайверади. Наби Раҳимов ана шундай барҳаёт сиймолардан бири эди...
Феруза Фаттохова
Саида Вахобова
