FATTOHHON.COM
« Все новости 
Фарғонада “Универсиада-2016” да иштирок этаётган бир гуруҳ санъаткорлар Фарғона Давлат Университети қайта таъмирланганидан сўнг, унинг таърифини эшитиб, Ўзбекистон ва Қорақалпоғистон Халқ артисти Озодбек Назарбеков бошчилигида, бу ўқув даргоҳига бориб,
ёшлар учун яратилган юқори даражадаги шароитлар ва имкониятлар билан яқиндан танишдилар.
Чиндан ҳам, Фарғона Давлат Университетида, нафақат ўқув бинолари, балки талабалар турар-жойларигача капитал таъмирланган.
Ҳар бир ётоқхонада компьютер ва бошқа замонавий техникалар билан жиҳозланган залларгача мавжуд бўлиб, кутубхона ва спорт залларигача зарур анжомлар билан таъминланган.
Олий ўқув юрти ҳовлисида боғ, гулзорлар ташкил қилинган.
Бу ерда очиқ ҳавода талабалар бемалол китоб ўқишлари, дам олишлари ҳам мумкин.
Санъаткорлар бу Олий ўқув даргоҳидаги имкониятларни, талаба ёшлар кўзларидаги қувонч ва фахр, миннатдорчилик туйғуларини кўриб, Юртимиз Раҳбаридан ёшларга кўрсатилаётган юқори даражадаги эътибор учун миннатдор бўлишди!
Ўзбекистон ва Қорақалпоғистон Халқ артисти Озодбек Назарбеков: - Фарғона Давлат Университетида қайта таъмирланганидан кейинги шароитлар ва у ерда талабалар учун яратилган имкониятларни кўриб, яна қайтадан талаба бўлгим келди! Ёшларга Давлатимиз Раҳбари томонидан берилаётган шундай юқори эътибор ва юксак имкониятларни кўриб, жуда қувондим! Бу нафақат Фарғона ёшларини, балки бутун Ўзбекистон Ёшларини руҳлантирмоқда! Бошқа давлатларда нотинчлик бўлаётган бир вақтда, юртимиздаги тинчлик-фаровонлик, ёшларимизда шундай юқори даражадаги ўқув даргоҳларида таълим олиш имконияти мавжудлигидан, дилимизда фахр ва шукроналик ҳисси мужассам! Президентимизга Ёшларга бўлган юксак эътиборлари ва ғамхўрликлари учун чин дилдан миннатдорчилик билдираман! Фарғона халқига янги қиёфадаги Фарғона Давлат Университети муборак бўлсин!
"Ниҳол" мукофоти совриндори Гуласал Абдуллаева: - Фарғона Давлат Университети таърифини эшитиб, кўргани келдик ва тўғриси бу ердаги шароитларни кўриб қойил қолдим! Барча жиҳозлар янгиланган, Университет ҳовлисидаги кўкаламзорлаштириш ишлари кўзни қувонтиради. Ҳаттоки, фонтанларгача бор, кириб хиёбон деб ўйлайсиз, кўриб одамнинг баҳри-дили очилади. Бу ерда таҳсил оладиган ёшларга ҳавас қилса арзийди!
"Ниҳол" ва “Эътироф” мукофотлари совриндори Малика Эгамбердиева:- Фарғона Давлат Университетидаги шароитлар ва ёшлар учун яратилаётган имкониятлар, пойтахтдагидан асло кам эмас! Ёшларни замонавий компьютер технологияларидан фойдаланишлари, спорт билан шуғулланишларигача ҳам, ҳамма зарур шароитлар яратилган! Ёшларимиз бу имкониятлардан фойдаланиб, келажакда ўз соҳалари бўйича юртимизга керакли мутахассислар бўлиб етишишларига ишонамиз!
Келажакда, шундай билим даргоҳларида таълим олган ёшлардан, юртимиз равнақига муносиб ҳисса қўшадиган маънан етук инсонлар етишиб чиқишлари шубҳасиз!
Саида Вахобова
Феруза Фаттохова
Фотолар учун Жасур Суннатуллаевга ташаккур!
