FATTOHHON.COM

АКТРИСАЛАР ОИЛА ҲАҚИДА . . . 06.11.2012 10:33

– Оила мустаҳкамлиги учун ким маъсул деб ўйлайсиз?
– Ҳар бир оилада уриш–жанжал, ёки баҳс–мунозара, аразлашлар бўлиб туради. Масалан, сизнинг оилангизда ҳам шундай ҳолатлар юз берганми ва сиз буни қандай бартараф этгансиз?
– Оилада сиз ўзингиз жорий этган, бирор чиройли одат борми?
– Оилада бозор–ўчарни оилада ким қилади?
– Тўйингиз бўлган кун, ой, йил ва сиз бу кунни ҳар йили нишонлайсизми?
– Оилада кимда рашк кучли?

РАЙҲОН УЛАСЕНОВА, АКТРИСА M&TVA МУКОФОТИ СОВРИНДОРИ

1.- Ҳалқимизда “қарс икки қўлдан чиқади” деган гап бор. Оила мустаҳкам бўлиши учун, нафақат эркак киши, балки аёл кишининг ва шу билан биргаликда, оилада тарбияланаётган фарзандларнинг ҳам ҳиссаси катта. Масъулиятни, фақат ота–онанинг бўйнига юкламасдан, балки фарзандларни ҳам тарбияси, бир–бирига бўлган меҳр–оқибати, оиланинг шароити ҳам, оила мустаҳкам бўлиши учун, катта роль ўйнайди, деб ўйлайман.

2.–Ҳар бир аёл кишининг характери қанчалик кучли бўлмасин, барибир оилада аёл кишининг ўрни ўзгача. Бекорга аёлларни гўзаллик салтанатининг маликаси, дейишмаган. Мана шу гўзалликни сақлаб қолиш учун, оиладаги тинчлик–хотиржамликни сақлаб қолиш учун ҳам, аёл киши эрига нисбатан, сал бир поғона пастроқда туриши керак. Чунки, оилани боши, бу эркак киши! Албатта, шуни эсдан чиқармайлик. Аёл кишини бўйинга қиёслайман, у уни у ёқ–бу ёққа буриб туради, лекин фикрловчи ва ҳаммаёқни жамулжам қилиб турувчи, бу эркак киши! Шунинг учун ҳам, оилада эркак кишининг гапига кириш, вақти келганда, агар у нохақ бўлса, аёлларга яраша озгина эркалик ва меҳр билан чиройли қилиб тушунтириш керак. “Йўқ, сизни гапингиз нотўғри, мен хақман” деган нарса, эркак кишини янада қаттиқроқ важоҳатга олиб келади. Шунинг учун, жаҳли чиққан пайтда, яхшиси унга тегмаган, қарши гапирмаган маъқул деб ўйлайман. (самимий кулиб) Аёл киши, битта гапдан қолгани яхши–да, барибир. Шунда оилада тинч-тотувлик ҳам бўлади.

3.– Бизни оиламизда шундай одат бор. Қанчалик ишга берилган бўлмайлик, бўш вақтимизни фарзандларимиз билан биргаликда ўтказишга ҳаракат қиламиз. Одатда, мен ўзим кундузи кўпроқ бўшроқман. Чунки, кечқурун спектакль, съёмкалар бор. Шунинг учун, якшанба кунини иложи борича биргаликда, оила даврасида ўтказишга ҳаракат қиламиз. Бу куни ўзимизга сал эрк бериб, эрталаб соат тонгги 6.00 да эмас, балки, 8.00 ларда уйқудан туриб, оилавий нонуштадан сўнг, бирор бир жойга айланишга борамиз. Бу бизда одат тусига кирган.

4.– Бозор-ўчарни оилада эркак киши қилгани яхши, чунки аёл киши ошхонани эпласа, катта гап. Сабаби, бир хилларида гоҳи турмуш ўртоғим, хизмат сафарларига кетганларида, ҳаттоки нонга ҳам ўғлимни чиқараман. (самимий кулиброқ) Чунки, эркак киши бундай ишларга болалигидан ўргангани яхши. Эркак киши қилиб келган бозорлик ҳам, баракали бўлади, барибир. Аёл киши бозорга чиқса, ҳамма нарсани олгиси келиб кетади ва шу билан барибир бирор нарса эсидан чиқиб қолади. Шунинг учун ҳам оилада бозорликни эркак киши қилса, менимча тўғри, деб ўйлайман. Аёл киши эса, ўша олиб келинган маҳсулотлардан тўғри фойдаланса, у энг яхши одатлардан бири!

5.– Биз нафақат, тўйимиз бўлган кун яъни, 2003 йилнинг 11 октябрини, балки танишган кунимизни ҳам нишонлаймиз! Танишган кунимиз 20 март! Мана турмуш қурганимизга бу йил 9 йил тўладиган бўлса, танишганимизга 14 йил бўлар экан. (самимий кулиб). Биз бу иккита байрамни ҳам нишонлаймиз! Чунки, нафақат никоҳимиз қонуний бўлган кун, балки танишган кунимиз ҳам биз учун алоҳида байрам!

6.– Рашк, оилада иккаламизда ҳам кучли! Чунки, биз, бир–биримизни кўриб–билиб, севиб турмуш қурганмиз. Шунинг учун, бу албатта кўпроқ эркакларга хос бўлса ҳам, лекин орада мен ҳам рашк қилишим мумкин! Лекин, ҳали кўз тегмасин, бирор марта ҳам биз рашкни, қаттиқроқ уришиш даражасига олиб келганимиз йўқ. Чунки, оиладаги бир– биримизга ишонч, бу энг катта, энг муҳим нарса! Сабаби, ишончсиз оила қуриб бўлмайди. Чунки, ҳамма нарса, бир–бирига ишонмасликдан келиб чиқади. Шунинг учун, янги оила қураётганларга шуни айтардимки, биринчи навбатда бир–бириларини кўпроқ билиб, синаб кўриб, ишонч ҳосил қилганлардан кейин турмуш қуришлари керак. Чунки, эртага “эй, бу нарсани билмаган эканман” дегандан кейин, кеч бўлган бўлади. Негаки, қонуний никоҳдан ўтиб бўлган бўлади (жилмайиб). Ажрашиб кетиш осон, лекин оилани сақлаб қолиш қийин.

Турмуш қуриш арафасида турган қизларимиз оилада энг муҳими, сабрли бўлишлари, ишонч қозона олишлари керак. Ҳеч қачон бир–бирига бўлган меҳр–оқибатни йўқотиш керак эмас ва келин бўлиб тушаётган оилани кўриб–билиб, унга тайёр бўлиб, ўша оилага келин ҳам эмас, қиз бўлиб борса, менимча яхши бўлади. Қайноналарнинг гапларига қайнона эмас, балки ўз онаси айтгандек қаралса, чунки ҳеч қачон ота–она ҳам ёмон бўлсин, деб уришишмайди. Қайноналар ҳам атайлаб уришишмайди, шунчаки кичкинагина танбеҳ бериб қўйишади. Уларни фақат тўғри қабул қилиш керак. Энг асосийси сабр–тоқатли бўлиш керак. Чунки, оила муқаддас.

МУЯССАР БЕРДИҚУЛОВА АКТРИСА

1. – Оила мустаҳкам бўлиши учун, эру хотин тенг муъсул бўлиши керак, барибир. Кўпроқ аёл киши сабр-тоқатли бўлиши керак. Оилани мустаҳкамлиги учун, эр ва хотин тенг ҳаракат қилиши керак. Уйда фарзандларга тарбия беришда, уйдаги барча нарсаларни кам-кўстларни бошқаришда кейин аёл киши сабр тоқатли бўлиши керак. Ақлли-ҳушли бўлиш керак барибир.

2. – Мен ҳар доим ўзимга сабр-тоқатлиликни ва ақл билан иш кўришни шиор қилиб олганман. Айтишади–ку, “етти ўйлаб, бир кес” деб, ўша нарсага жуда ҳаракат қиламан. Ҳар бир оилада келишмовчилик бўлиши мумкин. Ҳаммасига сабр–тоқатлилик, оғир-босиқлилик, ақл билан ҳаракат қилиш керак. Эр-хотин бир– бирини тушуниб яшаши керак. Бир– бирига қанақадир тўғри маслаҳат бериши керак. Аёл кишини ҳам, эркак киши тушуна олиши керак, фақат мен ҳақман деб юравериши керак эмас. Аёлда ҳам, эркакда ҳам барибир, ҳамма инсонда ҳам хато бўлади. Ўшанда эр ва хотин, бир–бирини хатоларини айтиб, тўғрилаб турса, қанақадир бир–бирини тўлдириб яшаса, оилада доим тинчлик бўлади.

3. – Қизларга, фарзандларимга кўп нарсаларни ўргатганман. Билмадим, тартиб- қоидага риоя қилган ҳолатда, ҳамма нарса қилинади. Уйда тартиб ва одоб-аҳлоққа, жуда ҳам катта эътибор бераман. Фарзандларим қиз бола бўлгани учун ҳам уй тутишига, муомалага ҳам эътибор бераман. Адалари билан гаплашганда жуда ҳам катта ҳурмат билан гаплашишади. 3 та қизим бор, энг каттаси 17 ёшга тўлган.

4. – Оилада турмуш ўртоғим. Олдин биргалашиб қилардик. Ҳозир энди турмуш ўртоғим қиладилар.

5. – 1993 йил 19 сентябрь тўйимиз бўлган кун! Баъзан, тўғриси ишлар билан ёдимиздан кўтарилиб кетади. Чунки, вақт бўлмай қолади. Лекин, ўтгандан кейин эслаб қўямиз. Баъзан, “вой, ўтиб кетиб қолибди” деб қўямиз.

6. – Рашк энди ёшликда кўпроқ бўлган. Айниқса, жуда кўп бўлган. Янги турмуш қурган пайтимизда, мен барибир санъат соҳасида бўлганим учун рашк бўлган. Шу нарсани тушунтиришга, бартараф этишга йиллар керак экан. Ҳозир яхши, бир–биримизга нисбатан кучли ишонч бор. Ёшликда менда ҳам рашк бўлган, лекин турмуш ўртоғим ўзлари рашк қилишга олиб келадиган ишлар қилмайдилар. Улар рашк қилишга йўл қўймайдилар, жуда ҳам тарбияли, намунали инсонлар. Шунинг учун ҳам унақа нарсага ўзлари йўл қўймайдилар.

Саида Вахобова