FATTOHHON.COM

УЧ ЖОЙДА ЎТКАЗИЛГАН РЕПЕТИЦИЯ! 07.12.2012 05:39

Ҳозирда ҚВЗ терма жамоасининг концертга тайёргарлик жараёнлари кетаётган Ўзбекистон Миллий университетининг Маданият саройининг катта зали, концерт иштирокчилари билан гавжум.

Маълум бўлишича, ҚВЗ тарихида биринчи марта репетиция жараёнлари учта жойда олиб борилган ва яқинда мана шу учинчи репетиция жойида тайёргарлик қилишга ўтилган.

Маданият саройига кириб келганимизда, тайёргарлик жараёнлари авжида эди.

Даврон Кабулов бир вақтнинг ўзида ҳам ташкилотчи, ҳам иштирокчи ва яна бошқа кўплаб ишларга масъул.

Даврон Кабулов: - Ҳам ташкилий масалалар, ҳам репетиция жараёнларига улгуриш тўғриси бироз қийин бўлмоқда. Ҳозир концертни томошабинлар қандай қабул қиладилар, буни билмайман. Чунки, ҳеч бир концертдан олдин бу нарсани айта олмаганмиз. Лекин, бу сафарги концертга ҳар қачонгидан кўра жиддийроқ, узоқроқ ва яхшироқ тайёргарлик кўрдик. Бу нарса саҳнада мухлисларга қанчалик сезилади ёки сезилмайди, буни аниқ айта олмайман. Лекин, бу йилги концертга таклиф қилинадиган хонандаларнинг рейтингидан тортиб, концертда қўйилаётган ҳазилларни сифати ва савиясига имкони борича жиддийроқ эътибор бердик. Концертга келиб, кўриб ўзингиз баҳо берасизлар, деган фикрдаман! Биз ҳозир профессионалликка даъво қилмаймиз. Чунки, бу ерда кўпчилик бошқа соҳа вакиллари ва аксарияти, турли ўқув даргоҳларида билим олаётган ёшлар. Шунинг учун улардан ҳозир профессионалликни талаб қилиш нотўғри бўлса керак. Лекин, уларни шу нарсага яқинлаштиришга ҳаракат қилдик. Менимча, уларнинг ижроси ёмон бўлмаяпти.

Терма жамоа аъзолари навбатдаги янги бир саҳна чиқишини репетиция қила бошлашди.

Албатта, репетиция баҳсларсиз ўтмаётгани кўриниб турарди.

Отабек, Миркомил ва Умиднинг баҳси авжида.

Беҳзод Комилжонов терма жамоа сардори, жараёнларни кузатиш билан банд.

Беҳзод Комилжонов: - Мана бугун концерт бошланишига оз вақт қолган. Ўзимизни қадрдон масканимиз Ўзбекистон Миллий университети Маданият саройидамиз. Ҳар доим энг сара ғоялар, ўйланадиган фикрлар шу ерда дунёга келади. Бу ердан олдин “TRIA MEDIA” продюсерлик марказида босқичма–босқич саҳнавий кўринишларни ижродаги репетиция жараёнлари бўлиб ўтди. Ҳаммаси ҳамжиҳатликда, маслаҳат билан бўляпти. Маданият саройида, умумий концерт дастури асосида ишланмоқда! Ҳадемай концерт, албатта ҳаяжон бор, аввал ҳам бўлган. Барчани концертимизга таклиф этамиз!

Концертда меҳмон сифатида қайси хонандалар иштирок этишларини ўзимиз учун билсак ҳам, яхшиси ошкор этмаганимиз маъқул, деб ўйлаймиз. Лекин, фақат шуни билдирамизки, бу хонандалар ҳозирги кунда ёшларнинг энг севимли хонандаларидан эканлиги ҳам сир эмас! Бу билан биз концертни ўта бир реклама қилиш фикридан йироқмиз, лекин тайёргарлик жараёнларини ва концертдаги янги саҳна чиқишлари ҳеч бир томошабинни бефарқ қолдирмаслиги аниқ!

Ҳамма тайёргарликлар ва иштиёқ ҳам бу гал бутунлай ўзгача!

Бу галги концерт “Каbulov Group” томонидан ташкиллаштирилган.

Демак, 9-10 декабрь кунлари “Истиқлол” санъат саройида!

ҚВЗ ТЕРМА ЖАМОАСИНИНГ ЯНГИ КОНЦЕРТ ДАСТУРИГА МАРҲАМАТ!

Феруза Фаттохова

Саида Вахобова