FATTOHHON.COM

ХАЛҚ АРТИСТЛАРИ ХАЛҚҚА ВАЪДА БЕРИШДИ! ҒУЛОМЖОН ЁҚУБОВ “ҚАЛБИМНИ ҚАЙТАР” БАҲОРИЙ КОНЦЕРТ . . . 02.03.2013 19:24

1-2 март кунлари “Истиқлол” санъат саройида Ўзбекистон ва Қорақалпоғистон Халқ артисти, устоз санъаткор Ғуломжон Ёқубовнинг “Қалбимни қайтар” деб номланган янги концерт дастури бўлиб ўтди.

Ғуломжон Ёқубовнинг ҳар йили 1-2 марта кунлари концерт бериши анъанага айланган. Концерт дастури эса, хонанда учун эгизак байрам, чунки 1 март куни устоз санъаткор Ғуломжон Ёқубов таваллуд топган кун!

Хонанда ҳар йили ўз таваллуд кунини саҳнада, мухлислари ва томошабинлар билан биргаликда, концерт тарзида нишонлаб келмоқда. Бу куни барча мухлислари концерт чоғида хонандани гуллар ва совғалар билан табриклайдилар.

Хонанданинг ҳар йилги концерт дастури, қандайдир ўзига хослиги билан ажралиб туради. Бу йилги “Қалбимни қайтар” концерт дастури ҳам янгиликларга, янги қўшиқларга бой бўлди.

Концерт декорацияси баҳорий ҳолатга уйғунлаштирилган ҳолатда бўлиб, 3 та экран (1 та катта ва 2 икки ёнда, 2 та кичик)дан иборат.

Концерт дастури олдидан парда, доира садолари остида очилди.

Концерт аввалида биринчи қўшиқ “Обод турмуш шиор қилган Ватаним” қўшиғи билан концертни бошлаган Ғуломжон Ёқубов, қўшиқдан сўнг, барча томошабинларга “Хуш келибсизлар!” дея, концертдаги барча оналар, аёлларни 8 март байрами билан қутлади.

Концерт дастурини актриса Дилноза Кубаева ва теле-радиобошловчи Жамшид Умрзоқов олиб бордилар.

Уларнинг чиқиши, Жамшид Умрзоқов томонидан Дилноза Кубаевага гул тақдим қилиниши, томошабинларга ҳақиқий “баҳорий” кайфият тақдим қилди.

Концерт дастури режиссёри Рустам Шамсутдинов

Концерт уч блокдан иборат бўлиб, унда 20 дан ортиқ қўшиқлар куйланди. Концертдаги учта тарона аввалги хит тароналар “Кулишларинг” (яратилганига 35 йил бўлган, 35 йиллик хит қўшиқ) ва концерт номига монанд “Қалбимни қайтар” қўшиғи, ҳамда хонанда Улуғбек Раҳматуллаев билан дуэт “Шоҳиста” қўшиқлари эди.

Концертдаги қолган барча қўшиқлар янги қўшиқлар бўлди!

“Кулишларинг” қўшиғини хонанда Ғуломжон Ёқубов ўзи яхши кўришини ва бу қўшиқни ҳар концертида куйлашини маълум қилди.

Мазкур қўшиққа раққоса Саида Мансурхўжаева рақсга тушди.

1. Блок. Хонанда томонидан “Обод турмуш шиор қилган Ватаним” қўшиғи билан бошланди. Шунингдек, “Муҳаббат”, “Тугмамга илинган сочинг толаси”, “Шу қизчанинг нозлари”, “Дунё вафоси йўқдир”, “Кел ёнимга малагим”, “Келгим келди” (ёш хонанда Ильмира Эгамбердиева билан дуэт), “Дук-дук уриб юрагим” қўшиқлари ижро қилинди.

2. Блок. “Болаликка қайтгим келяпти, она” қўшиғи билан бошланди. Сўнг, “Кулишларинг”, “Сендан нима кетади”, “Бергим келмайди”, “Гўзаллар”, “Кўргим келар эҳтимол”, “Шайдосиман”, “Сен келсанг” (дуэт ёш хонанда Сарвиноз билан), “Ноз-ноз” қўшиқлари куйланди.

3. Блокда, хонанда “Шоҳиста” (Улуғбек Раҳматуллаев билан дуэт), “Кеча-кундуз хаёлимда туради”, “Қизлар”, “Сен мени боримсан, йўғимсан!”, “Дунё” қўшиқларини ижро қилди.

Концерт давомида, Ғуломжон Ёқубов жами 3 та дуэт тарона куйлади.

1 ва 2 блоклар орасидаги танаффусда тақлид усталари, сухандон Ўткир Сиддиқов, актёрлар Афзал Рафиқов, Эркин Комилов ва бошқаларнинг овозларига тақлид қилиб, саҳна чиқиши намойиш қилдилар.

2 ва 3 блоклар орасидаги танаффусда сўз усталари Ўткир Муҳаммадхўжаев ва Шукурулло Исроилов ҳам, ҳазиломуз саҳна чиқиши тақдим қилдилар. (лекин, бу саҳна чиқиши бошқа бир концертда ҳам намойиш қилинган эди)

Концертдаги қўшиқларнинг ҳар бирига алоҳида рақслар саҳналаштирилган эди. Рақсларни “Хумор” рақс гуруҳи ижро қилишди.

Концертдаги энг таъсирли қўшиқ, шубҳасиз “Болаликка қайтгим келяпти, она” қўшиғи бўлди!

“Қалбимни қайтар” қўшиғида эса, хонанда Ғуломжон Ёқубов ўзи қўлида тор билан саҳнага чиқиб, уни бироз чалиб, сўнг қўшиқ бошлади.

Хонанда концерт учун, 3 та блокка мослаб, дид билан уч хил костюм-шим танлаган бўлиб, булар

оқ,

кўк

ва учинчиси ёшлар услубига яқинроқ, оқ шим, кўк кўйлак ва кўк чизиқли оч кулранг костюм эди.

Концертнинг махсус ажратилган вақтида, томошабинлар хонандани табриклаб гуллар ва совғалар билан тақдим қилдилар.

Совғаларнинг энг антиқаси, бу санъаткорнинг бухоролик мухлисларидан бири тақдим қилган, унинг тасвири туширилган катта гилам ва

шоир Шукур Дадаш томонидан ёзилган “Санъатга султонсан” шеър бўлди!

Ғуломжон Ёқубовнинг ҳар бир қўшиғи ўзига хос бўлиб, ҳар бирида ўзига хос жозиба ва мазмун бор эди. Лекин, концертда кўплар кутган қўшиқ, яъни Ўзбекистон Халқ артисти Муножот Йўлчиева билан куйланган “Во ажаб” дуэти янграмади. Бу ҳақида, хонандадан сўрашни лозим топмадик. Сабаби, хонандадан бу дуэт ҳақида концертдан олдин олинган интервьюда сўралганида, “Бу дуэт астойдил жиддий куйланган дуэт эмас. Бу дуэтни биз “Ошга марҳамат” кўрсатувига ҳазил тариқасида тайёрлаган эдик! Биздан бир кунда қўшиқ тайёрлаб ижро эта оласизми дейишганида, қолаверса, шунда қўшиқларни куйлай оласизми, дейишганда, “Биз бундай қўшиқларни ҳам бемалол ижро эта оламиз, улар ҳам бизнинг қўшиғимизни айта оладими?” деб куйланган қўшиқ. Яъни, ёши катта қўшиқчилар, ёшларнинг ҳам қўшиқларини бемалол ижро эта олишларини кўрсатиш мақсадида куйланди. Ҳазил қўшиқ эди. Уни бунчалик оммалашиб кетишини, ўйлаганимиз ҳам, хаёлимизга ҳам келтирганимиз йўқ! деган эдилар.

Концерт вақтида Ғуломжон Ёқубовнинг Ўзбекистон Халқ артисти Озодбек Назарбеков келиб саҳнада табриклади ва келгусида биргаликдаги қўшиқ ваъда қилди.

Натижада, саҳнада икки Ўзбекистон Халқ артистлари Ғуломжон Ёқубов ва Озодбек Назарбеков келгусида биргаликда дуэт куйлашга ваъда беришди!

Теле ва радио журналист Жамшид Умрзоқов: - Устоз санъаткорнинг концерт репертуаридаги қўшиқлар, кўпроқ ёшларга мўлжалланган, қўшиқлардаги сўз ўйинлари кучлилиги билан ҳам! Лекин, репертуарда ёши биздан улуғроқ бўлган қўшиқ ҳам бор экан. Яъни, 35 йил аввал яратилган “Сенинг кулишларинг” қўшиғи. Лекин, концертда кўпчилик кутган “Во ажаб” дуэти янграмади. Бу дуэт аудиториянинг 50-52 фоизини қамраб олган эди. Кўпчилик бу нарсани тўғри қабул қилди. Чунки, замонавий аудитория нима кутаётганлигини пайқаб олишнинг ўзи, тезлашув глобализм даврида қийин, деб ўйлайман. Шуни инобатга олганда, бу санъат аҳли учун нормал ҳолат, назаримда. Концертнинг биринчи куни, залдагиларни концерт тугаганидан сўнг ҳам кетмаганлиги бизни илҳомлантирди! Концерт якуни жуда қизиқ бўлди, концерт дастури ўз ниҳоясига етди. Лекин, ҳеч ким ўрнидан турмаяпти. Бирор томошабин ўрнидан турсаки, бошқалар ҳам кета бошлашса. Лекин, биз хайрлашдик, концерт тугади. Аммо, ҳеч ким кетишни исташмади. Мана шу ҳолат бизни жуда ҳам руҳлантирди! Бундай ҳолатлар, концертларда аудитория томонидан камдан-кам дефицит ҳолат!

Концерт жуда мазмунли ва файзли ўтди! Ғуломжон Ёқубов концерт ниҳоясида, барча томошабинларга, мухлисларига миннатдорчилик билдирди ва ўзининг энг самимий тилакларини изҳор этди.

Биз ҳам ўз навбатида шундай ажойиб концерт дастури учун, хонанда устоз санъаткор Ғуломжон Ёқубовга миннатдорчилик билдирамиз ва яна узоқ йиллар давомида, ҳар баҳорнинг илк кунларида, шундай чиройли концерт дастурлари билан барчанинг кўнглига баҳор нафасини олиб киришда давом этишларини тилаймиз!

Саида Вахобова

Феруза Фаттохова

КОНЦЕРТДАН ЭКСКЛЮЗИВ ФОТОСЕССИЯ