FATTOHHON.COM
« Все новости
Ўзбекистон Республикаси Мустақиллигининг йигирма беш йиллиги муносабати билан Ўзбекистон Республикаси Маданият ва спорт ишлари вазирлиги қошидаги Ёшлар маданият ва санъат маркази томонидан “Ўзбекнаво” эстрада бирлашмаси, “Ўзбектеатр” ижодий ишлаб чиқариш бирлашмаси, Тошкент давлат миллий рақс ва хореография олий мактаби билан ҳамкорликда,
доимий фаолият юритувчи “Миллий ва замонавий эстрада хонандалиги”, “Миллий ва замонавий рақс”, “Ёшлар театр студияси” ҳамда, “Инглиз тили” лойиҳалари, кам таъминланган ва ижтимоий ҳимояга муҳтож оила фарзандлари учун бепул тарзда ташкил этилди.
Ҳозирда, Ёшлар маданият ва санъат марказида фаолият юритаётган тўрт лойиҳанинг бири ҳисобланган, “Миллий ва замонавий эстрада хонандалиги” йўналиши фаоллари лойиҳани ноанъанавий тарзда ташкил этиш мақсадида, таниқли ва машҳур эстрада хонандалари билан ҳафтада бир маротаба маҳорат дарсларини ҳам ўтказишмоқда. Бунга биргина мисол тариқасида, куни кеча эстрада хонандаси Мустафо “Миллий ва замонавий эстрада хонандалиги” йўналиши аъзолари меҳмони бўлди ва иштирокчилар билан миллий эстрадамизга эндигина қадам қўяётган ёш хонандаларнинг таниқли санъаткорга тақлид қилмай, ўзининг йўналишини топиши, хонанданинг маънавиятини юксалтириш йўлида тинимсиз билим олиши ва албатта тарбияси, одоб-ахлоқи билан бошқаларга ўрнак бўлиш учун нималарга эътибор бериш кераклиги хақида суҳбатлашдилар ҳамда, лойиҳа иштирокчилари ўзларини қизиқтирган саволларига батафсил жавоб олдилар ва севимли хонандалари билан биргаликда қўшиқ ижро этишди.
Шунингдек, Ёшлар маданият ва санъат марказида фаолиятини бошлаган “Миллий ва замонавий рақс”, “Ёшлар театр студияси” ҳамда, “Инглиз тили” лойиҳаларининг иштирокчилари ҳам театр ва кино актёр ва актрисалари, маҳоратли раққос ва раққосалар ҳамда инглиз тили бўйича мутахассислар томонидан мунтазам тарзда маҳорат дарсларини олиб боришни режалаштиришган.
Ёшлар маданият санъат маркази
матбуот хизмати
