FATTOHHON.COM

ПРЕМЬЕРА! "СЕНСИЗ" ФИЛЬМИ: НАФРАТДАН МУҲАББАТГАЧА! 06.01.2013 07:01

Бугун 6 январь куни соат 17.00 да, Алишер Навоий номли (собиқ Панорама) киносаройда «Сенсиз» фильмининг премьераси бўлиб ўтди.

Премьерада кўплаб машҳурларни кўриш мумкин эди.

Режиссёрлар Аюб Шахобиддинов, Иброҳим Расулов, Дилмурод Масаидов, Нозим Жумаев, актёрлар Акбархўжа Расулов, Умид Искандаров, спортчи Одил Аҳмедов, телебошловчи журналистлар Даврон Кабулов, “Тасвир” газетаси муҳаррири Шаҳноза Бозорова, Fattohhon.com сайти вакиллари ва бошқалар...

Фильм ижодкорларини саҳнада актёр Акбархўжа Расулов таништирди.

Фильм продюсери ва бош рол ижрочиси Ёқуб Аҳмедов

Режиссёр Дилмурод Турдибоев

Бош ролларда Райҳон Уласенова, Дилноза Кубаева, Алишер Узоқов, шунингдек Улуғбек Абзалов, Мунаввара Абдуллаева, Саид Мухторов, Дилдора Ҳошимова, Анжелика Есимбетова, Ёрқиной Ғозиева ва бошқалар...

Фильм мелодрама жанрида суратга олинган бўлиб, асосий мавзуси оила ҳақидадир.

Фильмдаги актёрлар ижро профессионал даражада, деб ўйлаймиз. Айниқса, Дилноза Кубаева ва Ёқуб Аҳмедовлар ижроси таъсирли чиққан. Фильм сюжетлари қизиқарли, юморлардан ўз ўрнида фойдаланилган. Актёр Алишер Узоқов бир вақтнинг ўзида ҳам комик ва жиддий ҳолатларни ролида уйғунлаштира олган. Дилноза Кубаева ҳам қувноқ саҳналар билан бирга дардли саҳналарни маҳорат билан ижро этди. Ёқуб Аҳмедовнинг бу илк бош роли ва унинг актёрлик маҳорати ошганлигини сезиш қийин эмас.

Фильм бошиданоқ комедик саҳналари билан томошабинни ўзига қарата олди ва сўнг таъсирли саҳналари билан ниҳоясигача кўришларини таъминлади, деб ўйлаймиз.

Лекин, шу билан бирга иш бор жойда камчилик бўлади, дейилганидек баъзи бир камчиликлардан ҳам ҳоли эмас, назаримизда. Масалан, Райҳон Уласенова қаҳрамонининг икки фарзанди, онасининг вафотидан сўнг, бирор марта ҳам онаси ҳақида сўрамасликлари, болаларни онасининг йўқлигига мутлақо бефарқлиги ҳайрон қолдиради. Негаки, ёш бола онасига ва отасига жуда ўрганган бўлиши бу табиий ҳолат бўлиб, бирор марта бўлса-да, онаси ҳақида сўрашлари керак эди, назаримизда.

Фильмнинг асосий муваффақияти ундаги актёрлар ансамбли ва уларнинг таъсирли ижроси, деб ўйлаймиз. Фильмда бош қаҳрамон Дилноза Кубаева талқинида, радио DJ лар ҳаётига назар солинган.

Фильмдан ёдда қолган жумлалар:

- Уйга кетсак-чи?

- Қаҳва ичсак-чи?

- Узугингиз яна бир кунга занглайдиган бўлди!

- Лицензия чет эл хонандаларининг мусиқаларини ўғирлаш учун берилмайди!

100 марта эшитгандан, фильмни кинотеатрда бир бор кўрган афзал!

“Сенсиз” 7 январдан кинотеатрларда намойиш қилинмоқда!

Репортаж: Саида Вахобова

Феруза Фаттохова

ФОТОЛАР: