FATTOHHON.COM
« Все новостиХонанда, актёр ва режиссёр, “Шуҳрат” медали соҳиби Жаҳонгир Позилжонов ўзининг янги “Жамила” қўшиғига видеоклип суратга олдирди. Клип режиссёри Жонрид Сагдиев.
Клип сюжет йўналишида, аммо хонанданинг треклари ҳам бор. Клипда Жаҳонгир Позилжоновнинг ўзи, дўсти актёр ва режиссёр Жавлон Шодмонов, актёр Шуҳрат Нуралиев, “Дизайн” жамоаси вакиллари ва бошқалар суратга тушишди.
Жаҳонгир Позилжонов: - Клип ғояси ўзимизни ижодий гуруҳга тегишли! Қўшиқнинг ўзи ҳазиломуз бўлганлиги билан, суратга олинаётган клип жиддийроқ мазмунда! Юморлар ҳам жиддий бўлмоқда. Клипда аниқ асосий бир қаҳрамон йўқ! Воқеалар Кинотеатрда кечади, ҳаёт билан кино уйғунлашади. Қўшиқни ўзида эса, “Жамила” бу бир образ! Қўшиқ тўғрироғи унинг уришқоқ акаси ҳақида! Хуллас, клип тайёр бўлгач, бирга тақдим этамиз, мухлислар қўшиқни тинглаб, клипни кўриб, баҳо беришади.
Жавлон Шодмонов: - Клипда ўзбек шоу бизнеснинг таниқли инсонларини кўриш мумкин. Абдулла Қурбонов, Шукурилло Исроилов, Дилшодбек Каттабеков, “Дизайн” гуруҳи ва бошқалар... Айнан ҳозир бир нечта йўналишни суратга оляпмиз. Бу ҳам сюжетдан ўрин олган. Яъни, ҳиндча йўналиш, вестерн, замонавий ва миллий йўналиш! Клипда комедия билан жиддий мавзу уйғунлашади. Воқеалар бир-бири билан узвий боғлиқ. Бир нечта объектларда суратга олинмоқда. Бу клип бошқа клипларимиздан фарқ қилади. Яна бир жиҳати, бу клип учун қаҳрамонларни кийимлари, ўша сюжетга мос бўлишига ҳам алоҳида аҳамият беряпмиз. Клип томошабинлар эътиборини жалб эта олади, деб ўйлайман. Томошабинлар бу клипни кўришганда зерикиб қолишмайди, чунки динамикаси кучли, юморга ҳам бой.
Клип режиссёри Жонрид Сагдиев: - Бу клипга 15-20 кун тайёрландик. Ўйлашимча, бу клип ҳар тарафлама янгилик бўлади! Чунки, янгича йўналишда суратга олиняпти. Сюжет бўйича, ҳар хил йўналиш бўлганлиги учун ҳам, “Ўзбекфильм” киностудиясида алоҳида кийимлар танланди. Чунки, битта чиққан образ, бошқа қайтарилмайди! Жаҳонгир Позилжонов билан шу кунгача ижодий ҳамкорлик қилинган клипларнинг сони эсда ҳам йўқ, саноқсиз, десам ҳам бўлади. 7-8 йилдан буён бирга ишлаяпмиз. Жаҳонгир акам билан ишлаш жуда ҳам осон, чунки жуда ҳам масъулиятли инсон!
Клип суратга олиш жараёнлари ижодкорлар учун осон кечгани йўқ!
Маълум бир эпизодни суратга олиш учун, ҳаттоки иссиқда автобус томида ҳам куйлашга тўғри келди!
Ижодкорлар ҳар бир эпизод устида яхшилаб ўйлаб, одатларига кўра, албатта юмор қўшган ҳолда, суратга олишга ҳаракат қилишди!
Демак, тез кунда, Жаҳонгир Позилжонов ва “Божалар”дан “Жамила” видеоклипи!
Саида Вахобова
Феруза Фаттохова
Фотолар учун Ижодий гуруҳга миннатдорчилик билдирамиз