FATTOHHON.COM
« Все новости
"КИНОНИГОҲ" НИГОҲИДА! 11.03.2013 12:56
Тележурналист Шоира Рауфбоеванинг янги “Кинонигоҳ” кўрсатуви “Маданият ва маърифат” телеканалида энг оммабоп кўрсатувлардан бирига айланмоқда.
Кино санъати ҳақидаги информацион “Кинонигоҳ” дастурининг кино оламидаги энг янги маълумотларни мунтазам бериб боришдан ташқари, кинофильмлар ва бугунги кунда яратилаётган фильмларнинг сифати ҳақидаги таҳлилий “Жиддий саҳифа”си ҳам бор бўлиб, унда кино олами вакиллари ўз фикр-мулоҳазалари билан бўлишадилар.
“Кинонигоҳ”нинг навбатдаги сонларидан бирига биз Fattohhon.com сайти раҳбари Феруза Фаттохова ва мен журналист Саида Вахобова ҳам, тележурналист Шоира Рауфбоева томонидан таклиф қилиндик.
Мақсад, яқин кунларда катта экранга чиқиши кутилаётган режиссёр Саид Мухторнинг “Хазон” фильмининг сценарий муаллифлари сифатида, ўз фикрларимизни билдирдик.
Лекин, шу билан бир қаторда “Жиддий саҳифа”га бугунги кундаги кино оламидаги жараёнлар, фильмларнинг асосий ютуқ ва камчиликлари ҳақидаги таҳлилий фикр ва мулоҳазаларимизни, бугунги кино санъатининг эришаётган муваффақиятлари ҳақидаги фикрларимизни ҳам баён қилдик.
Ҳозирги кунда “Кинонигоҳ” дастури, ўз номига муносиб равишда, кўрсатув нигоҳида, бугунги кун ўзбек киносининг барча жараёнларини ёритиш ниятида! “Кинонигоҳ” ижодий гуруҳи бунинг учун, тиним билмай изланишдалар ва кино ихлосмандларига ўзбек киносининг энг қизиқарли жиҳатларини ўзида акс эттирган кўрсатувларни тақдим қилмоқдалар!
“Кинонигоҳ” кўрсатуви энг сўнгги русумдаги замонавий технологиялар билан жиҳозланган студияда суратга олинади ва унда катта профессионал ижодий гуруҳ меҳнат қилмоқдалар.
Ҳозирда кўрсатувга яна янги саҳифалар қўшилмоқда ва кино оламидаги суратга олинган, суратга олинаётган ва суратга олиниш арафасидаги барча янги фильмлар ҳақида маълумотлардан томошабинларни хабардор қилишга астойдил киришилган.
Саида Вахобова
Феруза Фаттохова
