FATTOHHON.COM

“ТАСОДИФИЙ” ЖАРОҲАТЛАР, ЁКИ АТАЙЛАБ ОЁҚҚА ТЕПИШ? 13.03.2013 13:00

13 март куни Актёрларнинг «Хижолат» гуруҳи, “Ҳаёт учун!” футбол шоусига навбатдаги тайёргарлик жараёнларини амалга оширдилар. Шуни эътироф этиш керакки, бу гуруҳ об-ҳаво ноқулайликларига яъни ёмғир, совуқларга ҳам қарамай, тайёргарликларни тўхтатмаяптилар.

Гуруҳ иштирокчиларидан кўплари суратга олиш ишлари, тадбирларда банд бўлсалар ҳам, тайёргарлик жараёнларини қолдирмасликка ҳаракат қиляптилар. Майдонда ҳаттоки ўйин вақтида жароҳат олсалар ҳам, кўпинча тайёргарликни тўхтатмай, ёки кейинги тайёргарликларни кузатиб бўлса ҳам, майдондан четлашмайдилар.

Рустам Қурбонбоев гуруҳ мураббийси: - Тайёргарлик жараёнлари жадал кетмоқда! Гуруҳда ҳамма йигитлар фаол! Чин дилдан ҳаракат қилишмоқда! Белгиланган куни ўйин зўр ўтади, деган фикрдаман.

Лекин, тайёргарлик жараёнлари давомида, афсуски, жароҳат олиш ҳолатлари кўп юз бермоқда.

Масалан, ўтган ўйинда режиссёр, актёр Жавлон Шодмонов оёқ бармоғидан жароҳат олгани туфайли, бу галги тайёргарликда иштирок эта олмай кузатишига тўғри келди.

Актёр ва шу билан бирга маҳоратли футболчи Ёқуб Аҳмедов эса, бир неча марта жароҳат олганига қарамай, тайёргарлик жараёнларида фаол қатнашаётган бўлса ҳам, бу гал оёғидан янада оғирроқ жароҳат олди!

Шунингдек, яна бир кучли ўйинчилардан ҳисобланган Отабек Мирзахолов ҳам оёғидан иккинчи марта қаттиқ жароҳат олди!

Тележурналист Даврон Кабулов эса, олинган жароҳатдан сўнг, мана энди фаол қатнашмоқда! Лекин, жароҳатнинг битишига узоқ вақт кетди!

Гуруҳ сардори Жаҳонгир Позилжонов ҳам, аввалги ўйинларда бир неча марта оёғидан жароҳатлар олганди.

Афсуски, тайёргарлик ўйинлари давомида фақат негадир энг кучли ва яхши футбол ўйнайдиган ўйинчиларгина кучли жароҳат олишмоқда! Тайёргарлик жараёнларидаги ўйинларга тўлдирувчи сифатида қабул қилинган баъзи “ўйинчилар” томонидан, асосий таркибдаги кучли ўйинчиларнинг оёғига “тасодифан”, (балки атайлабми?) бехосдан тепиб юбориш ҳолатлари содир бўлмоқда, назаримизда. Балки, “тўлдирувчилар” бу фақат “тайёргарлик ўйини” эканлигини тушуна олмаётгандирлар? Лекин, кучли ўйинчиларнинг ҳар ўйинда оёғидан “тасодифан” жароҳатланишлари ва бехосдан қалтис, нотўғри ҳаракат қилган жавобгарлар эса, бир оғиз “узр” билан жавобгарликдан чиқиш ҳолатларига эътибор қилинса, балки ўйинчиларни ҳар ўйинда жароҳат олишлари камаярмиди, деб ўйлаймиз.

Саида Вахобова

Феруза Фаттохова