FATTOHHON.COM
« Все новости
Ўзбекистон Республикаси Маданият ва спорт ишлари Вазирлиги ташаббуси билан шунингдек, Ўзбекистон Миллий телерадиокомпанияси, “Ўзбеккино” Миллий агентлиги, “Ўзбекнаво” эстрада бирлашмаси ҳамда, Ёшлар маданият ва санъат маркази ҳамкорлигида ташкил этилган, 18-30 ёшдаги ҳаваскорлар ва профессионал тайёргарликка эга бўлган иштирокчилар ўртасида “Янги овозлар” телетанловининг, Алишер Навоий Киносаройида ўтказилган якуний иккинчи саралаш босқичи ўз ниҳоясига етди.
3 кун давомида бўлиб ўтган саралаш босқичида ёшларнинг ижодий ишларини кўриб чиқиш учун махсус экспертлар гуруҳи жалб қилинди. Улар Ўзбекистон ва Қорақалпоғистон Халқ артисти Озодбек Назарбеков, Ўзбекистонда хизмат кўрсатган артист Равшан Намозов, “Ниҳол” мукофоти совриндори Адҳам Солиев, хонандалар Муниса Ризаева, Хуршид Иноғомов ва бошқа ижодкорлардан иборат бўлди.
Танлов жуда қизғин ва баҳсли кечди. Якуний иккинчи саралаш босқичига ўтган ёшлар жуда иқтидорли бўлиб, уларнинг орасидан янада муносибларини танлаш Экспертлар гуруҳига ҳам осон бўлмади.
Телетанловнинг иккинчи саралаш босқичида ўз иқтидорларини тўла намоён этиб, муваффақиятга эришган 40 дан зиёд ёш ижодкорлар танловнинг иккинчи босқичида қатнашиш имкониятини қўлга киритган эдилар. Айнан уларнинг 35 нафари якуний саралаш босқичида муваффақиятга эришдилар.
Эндиликда улар, 3 та ижодий жамоага бўлиниб, профессионал устозлар кўмагида қарийб 2 ой давомида тайёргарлик кўрадилар.
Саида Вахобова
