FATTOHHON.COM
« Все новости
10 январь куни «Алишер Навоий» киносаройида “Севади, севмайди” фильми премьераси бўлиб ўтди. Киносаройда шу куни жуда кўп томошабинлар келишди ва натижада 2 чи зални ҳам, бу фильм учун ажратишга тўғри келди.
Фильм премьераси анъанавий концерт, қизил поёндоз ва шу каби урф бўлиб қолган одатлардан ҳоли бўлса ҳам, жуда юқори кайфиятда ўтди!
Премьерасини Шахзода Муҳамедова ва Маъмурбек Холмедов олиб боришди.
Фильм ижодкорлари саҳнага таклиф этилдилар.
Фильм продюсери Руслан Мирзаев.
Режиссёр Озод Шамс.
Сценарий муаллифлари Феруза Фаттохова,
Саида Вахобова
Бош ролларда Сетора Алимжонова,
Умид Иргашев,
Саида Раметова.
Шунингдек, Мурод Ражабов, Санжар Шодиев,
Ҳосият Ҳусанова, Зуҳра Солиева,
Анжелика Есимбетова, ҳамда Ҳинд актёр Барун Собти ва бошқалар...
Фильм қаҳрамони бўлган ёш йигит тимсолида, оила аъзоларининг қадрига етиш, хатолардан тўғри хулоса чиқарган ҳолда масъулиятни ҳис этиш, муҳаббатга садоқат, кутилмаган қадам инсон тақдирини бутунлай бошқа йўлга буриб юбориши мумкинлиги ҳақида ҳикоя қилинган. Бир сўз билан айтганда тақдир бизга бир неча таклифлар беради, аммо қай бирини танлаш ўз ихтиёримизда!
Йигит киши авваламбор, масъулиятни ҳис қилиши, ота-онасига муносиб тиргак, уларнинг муносиб давомчиси бўлиши керак. Лекин, фильм қаҳрамонига айнан шу масъулият етишмас эди. Аммо, кутилмаган тасодиф унинг ҳаётини бутунлай ўзгартириб юборади!
Ҳаётда муҳаббатга ҳам, бахтга ҳам осонлик биларн эришиб бўлмаслиги бу фильм воқеалари давомида яна бир бор ўз исботини топади! Йигит ва унинг севгилисини тақдирнинг турфа синовлари кутаётган эди... Улар бу синовларни енга олишадими? Ҳақиқат қарор топадими?
Бош ролни актёр Умид Иргашев ишонарли ижро этган.
Актриса Сетора Алимжонованинг ҳам бу роли, унинг аввалги ролларидан фарқ қилади.
Фильм воқеалари томошабинни ҳам кулдириб, ҳам йиғлатиб, ҳам ўйлашга, ҳаётнинг бахтли лаҳзаларини қадрига етишга, хато қилмасликка, ҳамиша масъулиятни ҳис қилиш, шошма-шошарлик қилмаслик, мулоҳазали бўлишга, ҳаётда ўйлаб иш қилиш, яқин инсонларнинг, оила аъзоларининг қадрига етишга ундайди.
Фильм тарбиявий аҳамиятга ҳам эга бўлиб, айниқса, ёшларни ёшликда оилани қадрлашга, муҳаббатга садоқат ҳамда, ҳаётда ҳар бир ишга масъулият билан ёндошишга чорлайди.
“Севади, севмайди” фильми 11 январдан Юртимиз кинотеатрларида намойиш этилмоқда!
Назокат Умарова
