FATTOHHON.COM
« Все новости
30 март куни актёр, режиссёр ва хонанда Алишер Узоқовнинг катта орзуси амалга ошди!
Алишер Узоқов “Истиқлол” футбол клубига 10 рақамдаги ўйинчи сифатида қабул қилинди!
У энди биринчи лигада профессионал футболчи сифатида тўп суриш имкониятига эга бўлди! Шартнома 2 йиллик муддатга имзоланди.
Алишер Узоқов (самимий кулиб): - Журналистлар ҳам, бошқалар ҳам умуман бундан ҳайратдалар! Бу ҳақиқатдан ҳам жиддий бўлиб ўтган ҳодиса! (Бунга 1 апрелни умуман дахли йўқ!) Футболга эндиликда жуда жиддий киришмоқдаман! “Истиқлол” жамоамиз энг яхши жамоа сифатида, олий лигага чиқишини истайман!
- Футбол машғулотлари кўп вақт талаб қилади. Эндиликда бутун вақтингизни футболга бағишлаб актёрликдан воз кечиш ниятида эмасмисиз?
Алишер Узоқов: - (самимий) Балки...? Санъатдан оооозгина четланишга тўғри келиши ҳам мумкин. (чуқур хўрсиниб олиб) Лекин, футболни жуда ҳам яхши кўрганлигим сабабли, эндиликда футбол билан шуғулланмоқчиман!
- “Ҳаёт учун!” футбол тайёргарликларида сизнинг футбол борасидаги маҳоратингизга гувоҳ бўлган эдик! Эндиликда бу ҳолат қандай содир бўлди? Бу жамоа сизнинг футбол борасидаги маҳоратингиздан қандай хабар топди ва қандай қилиб сизни футбол жамоасига ўйинчи сифатида таклиф қилишди?
Алишер Узоқов: - Бунга “Ҳаёт учун!” футбол тайёргарликлари сабаб бўлди! “Истиқлол” жамоасидагилар, футбол клубининг вице-президенти, “Ҳаёт учун!” футбол тайёргарликларига келишди. Улар бутунлай бошқа масала билан келишган эди. Ўшанда менинг майдондаги ўйинларимни кўриб, ўзаро маслаҳатлашишди ва жамоага таклиф қилишди! Менга бу таклиф чиққанидан кейин, албатта жуда ҳам хурсанд бўлиб кетдим! Анча ўйладим ҳам! Сўнг, 2 йил муддатга жамоа билан шартнома имзоладик.
- Демак, эндиликда “Истиқлол” футбоол жамоасининг 10 рақамли ўйинчиси Алишер Узоқов, десак бўлади?
Алишер Узоқов: - Ҳа! Бемалол!
- Жамоа сафида тўп суришга улгурдингизми? Ёки ҳали ўйин ўтказилмадими?
Алишер Узоқов: - Янгиер билан футбол учрашувини ўтказдик. 3:1 ҳисобида кубокда ғалаба ҳам қозондик!
- Нима учун айнан “Истиқлол” жамоаси? Бу футбол жамоаси сизни қайси жиҳатлари билан ўзига тортди?
Алишер Узоқов: - Бу жамоада айнан ёшларга эътибор берилади! Шиори ҳам, “Ёшлар келажагимиз”! Янги жамоа, келажаги порлоқ жамолардан биттаси, деб ўйлайман! Мана ҳозир мен билан бирга? яна 3 та ўйинчи ҳам жамоага қабул қилинди. Бу жамоа келажакда ёш ва иқтидорли футболчиларни кашф этадиган ва етиштириб чиқариб берадиган жамоа бўлади, деб ўйлайман!
- Сизни футбол тайёргарликларида кун ора учратар эдик. Энди-чи? Спорт машғулотларига қанча вақт ажратасиз?
Алишер Узоқов: - Аввал кун ора бўлса, энди ҳар куни 2-3 соатдан вақт ажратишга тўғри келади!
Сўзимиз бошида айтганимиздек, Алишер Узоқовга таъриф берилганида, актёр, режиссёр, хонанда сўзлари ёнига, эндиликда профессионал футболчи сўзи ҳам қўшилди!
Санъат ва спортни уйғунлаштира олган, бу икки соҳадаги иқтидорни ўзида мужассам қилган Алишер Узоқовга омадлар тилаймиз! Келажакда, футболда ҳам актёрлик, режиссёрликдаги каби улкан муваффақиятларга эришади, деган умиддамиз.
Саида Вахобова
Феруза Фаттохова
