FATTOHHON.COM
« Все новости
Режиссёр Саид Мухторовнинг “Хазон” фильми катта экранларга чиқиш арафасида!
Фильм премьераси 5 апрель куни Алишер Навоий киносаройида бўлиб ўтади. Фильм ҳақида, фильмда кўтарилган мавзу, ўзига хос ечим юзасидан режиссёр Саид Мухторовнинг фикрлари билан қизиқдим.
- “Хазон” фильмини суратга олиш ғояси қаердан пайдо бўлди?
Саид Мухторов: - Шохрух Ёдгоров деган бир укамиз келиб, бизга ўзининг ҳаёти ҳақида гапириб берганда, оператор, сценаристлар билан бирга ўтириб, унинг ғоясини эшитганмиз. У ўз онаси ҳақида изтиробларни гапириб берган. Биз уни эшитиб таъсирландик. Бундай ғояларни кино қилиб олиб чиқиш ўзи бир катта меҳнат. Шундан сўнг биз Шохрух билан гаплашгач, албатта жараён бошланди. Биринчи навбатда актёрларга бериш учун сценарий ёзилиши керак эди. Фильмни асосий ғояси ва сценарийни йўналиши бўйича, сценарийнавислар Саида Вахобова ва Феруза Фаттоховалар билан бир тўхтамга келдик. Баъзи ҳолатлар бадиийлаштирилди. Сўнг актёрларни кастингдан ўтказдик.
Шохрухнинг онаси ролига актриса Юлдуз Ҳамидовани суратга тушуриб кўрдик, шунда ҳақиқатдан ҳам у киши бош қаҳрамон Шохрухга қош-кўзлар, худди она боладек бир-бирига ўхшашлиги кўринди. Бош ролга келсак, масалан, бу ерга Улуғбек Қодировними, Адиз Ражабовними, суратга олишимиз мумкин эди. Лекин, ғоя йўналиши ва сценарий бўйича, биз шу Шохрухнинг ўзини фото съёмка қилиб кўрдик. Ундан олдинги “Кўча” фильмимда камера олдида Шохрух ҳақида яхши фикрларни олганим учун ҳам, мен ишонч ҳосил қилдимки яна бир янги чеҳрани олиб чиқа оламан. Ундан сўнг, актрисаларимизда изланишни бошладик. Шохрухнинг келинойиси ролига актриса Ёрқиной Ғозиевани танладик. Роль ижро қилиш билан биргаликда, у фильм продюсери ва иккинчи режиссёрликни ҳам амалга оширди. Яна бир қаҳрамонимиз Шохрухнинг севган қизи ролига эса ёш умидли актрисаларимиздан Юлдуз Ражабова танланди. Бу синглимиз Санъат институтида ўқийди. Тоға ролига эса, кўпгина фильмларда катта-кичик роллари билан танилган Отабек Маҳкамов танланди.
- “Хазон” фильмингиздаги роллардан бирини ижро қилган Ёрқиной Ғозиеванинг роли, яна “Оқибат” фильмидаги каби салбий образ эмасми? Унинг бу роли, у фильмдаги ролидан нимаси билан фарқ қилади, деб айта оласиз?
Саид Мухторов: - Бу роль салбий роль эмас! Салбий роллар деб, ўз боласини ёқиб юборган, ёки ўз боласини оқ қилган, бемеҳро бир ролларни айтишимиз мумкин, деб ўйлайман.
- Демак, сиз Ёрқиной Ғозиева ижро этган ролни салбий роль эмас, деб оқлаяпсиз? Яъни у яшаш учун кураш қоидасига амал қиляпти, демоқчисиз?
Саид Мухторов: - Албатта. У ўша уйда келинлик вазифасини бажариб қайнонасига қараётган эди. Болаларини яхши ният билан катта қилаётган эди. Шу уйда қайнонаси ўтгандан кейин у шу уйнинг хўжайини бўлиб қолиши керак эди. У ўзи учун ҳақ учун талашмади. У фарзандлари учун шу уйга талашди. Шу уйда тўй қиламан деб ният қилган эди. Уни ҳам тушуниш керак. У бу хонадонга бегона эмас. Ўзингиз бир ўйланг, шу йўналиш бўйича бу образни оқлаб кетадиган томонларим бор. Чунки, ҳар бир инсонни ўз ҳақиқати бор. Ҳеч ким ўзидан ўзи бировни пишт демайди-ку. Ёрқиной Ғозиева яратган образни ҳам ўз дарди бор. Томошабин ўтирганда масалан, “ҳа, мени уйимда 3 та келин дейди. 2 хонали уйда 3 та келин яшаймиз” дейди. Қандай қилиб яшаш мумкин? Инсон баъзида кенг ҳовлига ҳам сиғмаслиги мумкин, тўғрими? Томошабинларга айтмоқчи бўлинган мақсад, шулар яъни фильм қаҳрамонлари қилган хатоларни сизлар қилманглар, демоқчимиз.
- Шохрух Ёдгоровнинг ижросидан қанчалик кўнглингиз тўлди?
Саид Мухторов: - Фильмда у мен ҳоҳлаган қаҳрамон ҳолатини ўйлаганимдек чиқариб бера олди. Суратга олиш ишлари жуда мураккаб кечди. Жуда бир оғир психологик ҳолатлар бор эди, Шохрух уларнинг ҳаммасини кутилганидан ҳам ўхшатиб ижро қилиб бера олди. Ўйлайманки, бу унинг кинодаги роллари давом этади.
- Кўп режиссёрлар ҳозирги кунда ўз фильмларида, ўзлари ҳам роль ижро этмоқдалар. Сиз ҳам ”Хазон” фильмингизда ўзингиз роль ижро этдингизми?
Саид Мухторов: - Мен ўзи актёрдан чиққан режиссёрман. Актёрлик махорати бўйича катта тажрибам ҳам бор. Ҳар битта фильмимда, ўзим битта эпизодик роль ўйнайман. У роль менга тушмаса, ўйнамайман. Лекин, ўзимнинг дардимни ўзим билганим учун ҳам, ўзим кўпинча ҳеч ким аҳамият бермаган мавзуларга қўл уришга ҳаракат қиламан.
Бу фильмда ҳам ота ролини ўзим ижро қилдим. Бу ота оддий бир ота эмас, унинг қалбида жуда катта бир дарди бор. Уни ўзига яраша муаммолари бор, у қизининг бахтсизлигига ўзини айбдор санайдиган эпизодларни ижро қилиш анча оғир бўлди! Актёрлик маҳорати тарафлама эмас! Мен бу қаҳрамоннинг дардини чинакамига ҳис қилдим! Ўйлайманки, фильмни кўргач, ҳар бир ота ўзини мана шу қаҳрамоннинг ўрнига қўйиб кўриши мумкин. Бу отанинг бошидаги савдо, ҳар бир отанинг бошига тушиши мумкин бўлган вазият, деб ўйлайман!
Саида Вахобова