FATTOHHON.COM
« Все новости
6 апрель куни «Пойтахт» бизнес марказида, соат 12.00 да Ижтимоий ташаббусларни қўллаб-қувватлаш фонди (ИТҚҚФ) Ўзбекистон миллий Паралимпия ассоциацияси (МПА) билан ҳамкорликда ўзбек эстрада, кино, спорт юлдузлари ва паралимпиячилар ўртасида стол тенниси бўйича турнир ташкил этилди.
Стол тенниси бўйича беллашувларда хонандалар Лола, Рухшона, Мадина Мумтоз, Умар Шамсиев, Анвар Собиров, Ғайрат Усмонов, “Сурхон” гуруҳи, Машҳурбек, актриса Шаҳзода Муҳамедова ва бошқалар этишиб, паралимпиячилар билан стол тенниси борасида беллашдилар. Улардан баъзиларининг ўзларининг стол тенниси борасида ҳам маҳоратларини намойиш қилдилар.
Бундан ташқари, халқаро майдонларда мамлакатимиз шаънини муносиб ҳимоя қилиб келаётган, хусусан, 2012 йил Лондонда ўтказилган XIV Ёзги Паралимпия ўйинларида муваффақиятли иштирок этгап паралимпиячи спортчилар, ҳамкор ташкилотлар, давлат идоралари, ННТ, ОАВ вакиллари ҳам қатнашдилар.
Иштирокчиларнинг умумий сони 70 кишидан ортиқ эди.
Турнирнинг асосий мақсади, мамлакатимизда паралимпия ҳаракатини ривожлантириш, имконияти чекланган ёшларни спорт ёрдамида жамиятга интеграциялаш, мамлакатимизда спортнинг паралимпия турини ривожлантиришга кенг жамоатчилик эътиборини қартаиш, 2014 йилда Сочида (Россия) бўлиб ўтадиган Қишки Паралимпия ўйинларида иштирок этадиган паралимпиячи спортчиларни қўллаб-қувватлашдир.
Беллашувлар бошлангунга қадар ёш спортчилар – демфлипиячи (эшитиш қобилияти суст) спортчиларнинг ўсмирлар жамоаси стол тенниси бўйича ўз маҳоратини намойиш қилдилар.
Турнир ғолиблари эсдалик совғалар, дипломлар билан тақдирландилар.
Аёллар ўртасида мутлоқ ғолиба “Паралимпия кубоги” эгаси Шаҳло Фазлиддинова,
ҳамда эркаклар ўртасидаги мутлоқ ғолиб Дилмурод Орипов бўлди.
Шунингдек, актриса Шаҳзода Муҳамедова ва ёш хонанда Гулюз ҳам алоҳида соврин эгаси бўлдилар.
Турнир сўнгида хонандаларнинг шўх қўшиқларидан иборат концерт дастури, даврани янада жонлантирди, барча рақсга тушди. Шунингдек, меҳмонлар ва тадбир иштирокчилари миллий таомлар билан меҳмон қилинди.
Насиба Алимова Ижтимоий Ташаббусларни қўллаб-қувватлаш фонди, Лойиҳа координатори: - Ижтимоий Ташаббусларни қўллаб-қувватлаш фонди 2010 йилдан буён Ўзбекистон Миллий Паралимпия ассосициацияси билан биргаликда, бир қанча тадбирларни ўтказиб келмоқда. Шу жумладан, бугунги ўтказилаётган стол бўйича, мусобақа тадбирини ҳам. Мазкур мусобақаларда таниқли хонандалар, машҳурлар, паралимпия спортчилари билан стол тенниси борасида ўзаро беллашмоқдалар. Асосий мақсад, бугунги кунда Ўзбекистонда Паралимпия спортини ривожлантириш, паралимпиячи спортчиларнинг ютуқларини оммага тарғибот қилишдан иборатдир.
Лола хонанда: - Бу тадбирда иштирок этганлигимдан хурсандман. Тадбирдан жуда ҳам яхши таассуротлар олдим. Паралимпияларнинг маҳорати, қобилиятига, айниқса ҳаётга бўлган муҳаббатига қойил қолдим. Баъзида ҳаётда ўз орамизда, бунчалик бунчалик ҳаётни севадиган, интилувчан инсонларни учратиш қийин. Менимча, айнан мана шу паралимпиячиларнинг ҳаётга муҳаббатидан, уларнинг интилувчанлигидан, улардан ибрат олишимиз керак, назаримда.
Саида Вахобова
