FATTOHHON.COM
« Все новости
Ўзбекистон Республикаси Вазирлар Маҳкамасининг 2017 йил 15 февралдаги 20 –сон йиғилиш баёни ижросини таъминлаш мақсадида cўнмас овоз соҳиби Ўзбекистон, Қорақалпоғистон ва Туркманистон Халқ артисти Комилжон Отаниёзов таваллудининг 100 йиллигини нишонлашга тайёргарлик кўриш борасида маданий-маърифий тадбирлар ўтказиш режалаштирилган бўлиб, Ҳофиз таваллудини кенг нишонлаш мақсадида Маданият Вазирлиги томонидан жорий йилнинг 6 июль куни Пойтахтимиздаги “Туркистон” саройида гала-концерт бўлиб ўтди. Мазкур гала-концертда Ҳофизнинг кўплаб шогирдлари, у билан бирга ижод қилган санъат аҳли, Санъаткор ва шоирлар иштирок этишди. Адабий-мусиқий кечани очиб бериш учун Ўзбекистон Республикаси Маданият вазирининг биринчи ўринбосари Минҳожиддин Ҳожиматов сўзга чиқди. Тадбир давомида Ўзбекистонда хизмат кўрсатган Санъат арбоби, профессор Отаназар Матёқубов, Ўзбекистон Халқ артисти Абдуҳошим Исмоилов, Ўзбекистон Халқ шоири Омон Матчон ва бошқалар Комилжон Отаниёзов билан боғлиқ хотиралардан сўзлаб бердилар. Ўзбекистон Халқ артисти Ортиқ Отажонов, Ўзбекистон Халқ артистлари Ғофур ва Ғулом Эшчоновлар, Ўзбекистон Халқ бахшиси Қаландар Бахши Норматов, Ўзбекистонда хизмат кўрсатган артист Оғабек Собиров, Қорақалпоғистонда хизмат кўрсатган артист Каримбой Раҳмонов, “Лазги” ашула ва рақс ансамбли ва бошқа хонандалар Ҳофиз репертуаридан қўшиқлар куйлашди! Бу эса, Комилжон Отаниёзовнинг халқимизга қолдирган бой маданий мероси авлоддан авлодга ўтиб келаётганлигидан, у яратган куй-қўшиқлар янада сайқалланиб, ёшлар тилида ҳам жаранглаётганидан, ҳамда Ҳофиз санъатининг умр боқийлигидан дарак беради. Саида Вахобова
