FATTOHHON.COM
« Все новости
Райҳоннинг концерти дегандаёқ кўз олдимизга дарҳол, барчаникидан ўзгача бўлган шоу келади. Ҳар сафар бир ўзгача ёрқинлик ва янгиликлар, Райҳоннинг концертларига хосдир.
Бу йилги янги концерт ҳам бундан мустасно эмас.
27 апрель. “Истиқлол” санъат саройи Райҳон яккахон концертининг 4 куни.
Концертнинг бошланишиёқ ўзгача бўлди. 3 қисмдан иборат катта экраннинг тўридан Райҳоннинг бор бўй-басти билан тасвири акс этди ва тасвир йўқолиб, саҳнада, қоронғуликка туширилган чироқ нурида Райҳон ўз концерт дастурини “Ойижон” қўшиғининг рус тилидаги версияси, “Мама” қўшиғи билан бошлади. Мазкур дақиқаларда, унинг ортидаги экрандан марҳума онаси Тамара Шокирова роль ижро қилган бир неча фильмлардан видеолавҳалар бериб борилди.
Мазкур қўшиқдан сўнг, Райҳон томошабинлар билан саломлашиб, бу концертини онаси Тамара Шокирова хотирасига бағишлаганлигини, афсуски бу галги концертида онаси томшабинлар қаторида йўқ эканлигини ҳам айтиб ўтди...
Концерт бир неча қисмларга бўлинган бўлиб, ҳар бир бўлимга ўтиш, экрандаги тасвирлар ва мусиқа билан уйғунлашган ҳолатда амалга оширилди. Ҳар бир қўшиққа саҳна кўриниши ишлаб чиқилган эди!
Райҳон бу галги концертида бир неча халқлар мусиқаси, рақслари ва либосларига мурожаат қилган бўлиб, ҳар бир ўзгача бир мазмунда, бир мавзуни ўз ичига олган эди.
Масалан, “Мама” қўшиғи тугагач, ижро қилинган “Юрагимдасан” ва “Журавли” қўшиқларида у япон кимоносида, умрнинг оний фурсат эканлиги, лекин инсон барибир ўз муҳаббатини кутишини ифода қилганди, назаримизда. “Юрагимдасан” қўшиғида япон мусиқа созидан фойдаланилган бўлиб, Райҳон мазкур қўшиққа ишланган клип репортажи вақтида айтиб ўтган эди. Бу қўшиқ вақтида, экранда қўшиқ клипидан видеолавҳа берилиб, унинг умр йўлдоши Йигиталининг тасвирлари бериб борилди. “Журавли” қўшиғига эса, маҳорат билан японча рақсга тушилди.
Раққосалар японча рақсларига хос ҳаракатлар билан гўёки турналарни ифода этдилар.
Райҳон аввалги йилги концертларидан бирида, бу онасининг севимли қўшиғи эканлигини айтиб, уни томошабинлар орасида ўтирган онаси учун куйлаб берганди...
“Журавли”дан сўнг, “Нега энди?” қўшиғида ҳам, япон ниндзялари, японча рақс ва чироқ эффектларидан чиройли фойдаланилди.
Японча қисмдан сўнг, иккинчи қисмда Райҳон замонавий либосда чиқиб келди ва “Ҳеч айрилма” қўшиғини куйлаб, раққоса қизлар билан биргаликда рақсга тушди.
Сўнг, умр йўлдоши Йигитали билан “Ёдингдами” қўшиғннинг янги ремейк версиясига танго тушди. Айтиш мумкин, бу бахтиёр оиланинг тангоси ҳам ўзига хос бўлди!
Рақс постановкаси жуда яхши ўйланган, аввалига рақс давомида Райҳон гўёки севса ҳам, ўз севгилисидан устун бўлишга уринаётган қизнинг ҳатти-ҳаракатларини ифода этади.
Сўнгра, чиройли муҳаббат,
яна низолар, қизнинг қайсарлиги, сўнг,
уни йигитни ташлаб кетмоқчи бўлишларию, йигит унинг қўлидан ушлаб тўхтатиб қолишлари, куч билан уни ёнида олиб қолмоқчи бўлганлиги, қизни уни рад этишга уриниши,
ярашув,
сўнг кутилмаган тушунмовчилик сабаб, энди уни йигит ташлаб кетиши, ҳаммаси рақс билан ифода этилган, назаримизда.
Тангода сўнг, кутилмаганда саҳнада Райҳоннинг “рақибаси” пайдо бўлди ва Райҳонга эндиликда у билан саҳнада “рақобатлашгандек” рақс туша бошлади,
Райҳон эса ўз муҳаббатини ҳимоя этгандек, “У меники” қўшиғини куйлади.
Учинчи қисм ўзбек миллий фольклорини ифода этди. Доира садолари остида, кекса аёллар миллий фольклор либосларда чиқишиб, Райҳоннинг “Бахтли бўламан” қўшиғини куйлашди ва халқ лапарларига ўтишди.
“Бака банг” қўшиғини куйлашгач, саҳнада миллий либосда Райҳон мазкур қўшиқни куйлади.
Сўнг, ҳаётда ҳеч кимнинг дўсти хиёнат қилмаслигини тилаган ҳолда, “Дўст” қўшиғини куйлади.
Сокинлик ўрнини яна жўшқинлик эгаллади. Экрандаги Африка тасвирлари акс этган вақтда Райҳон “Орзуингга ишон” қўшиғини куйлади.
Рақслар қўшиққа ниҳоятда уйғунлашган эди. Ҳаттоки, Райҳоннинг ўзи ҳам табла чалди,
африкача рақсни ҳам қойиллатди!
Сўнг, “Сени ўйлай, хаёлингда мен бўлай” (янги) ҳамда
“Сумбула” ремейки куйланди ва албатта, жўшқин рақслар ва экран фонидаги тасвирлар уйғунлашувида! (ВИДЕОДА!)
Номерлар оралиғида экранда бир ёш қиз кўрсатилиб, унинг турли ҳолатларда масъумлик ва беғуборлик билан намойиш қилган рақслари, томошабинларда “бу ким” деган савол уйғотди ва бу саволга ҳам жавоб топилди, у қиз ўз чиқиши якунида залга ҳаводан бўсалар йўллади ва Райҳонга айланди. Бу билан Райҳон, ўзининг ўсмирлик дамлари ва орзуларини акс эттирган бўлса, не ажаб.
Кейинги қисм Райҳоннинг шу вақтгача бўлган ижодий фаолиятига бағишланган видеоролик билан бошланди! Унга назар ташлаб, Райҳоннинг ижодий умр йўлига гувоҳ бўлиш мумкин, турли ҳолат ва эмоциялар, турли вақт ва ҳиссиётлар уйғулашуви! Қувноқ ва ғамгин, ўйчан ва сокин, жиддий ва кўнгилчан нигоҳлар, муваффақият онлари, интервьюлар ва суратга олиш жараёнлари, клиплар ва фильм, концертлар ва тақдимотлар чоғидаги видеолавҳаларда, турли қиёфалардаги Райҳон! Беихтиёр унинг ижод йўли осон кечмаганлигини, муваффақиятларнинг барчасига кучли меҳнат, интилиш ва ўз истеъдоди орқали эришганлигини ҳис этасиз.
Видеоролик аввалида, Райҳон “Тасвир” газетасига берган интервьюсида айтганидек, уни кенг само бағрида, юлдузлар орасида, қизил мато ўз оғушига олганлиги ифода этилган бўлиб, бу унинг онаси Тамара Шокированинг унга бўлган меҳру муҳаббатидир. Райҳон ҳамиша онасининг меҳрини ҳис қилиб туришини билдирганди... видеороликда бу ҳолат жуда чиройли ва таъсирли ифода этилган.
Видеороликдан сўнг, саҳнада икки раққос катта қизил соябонлар билан пайдо бўлиб, соябонлар аввалига қайиқни, сўнг, медузани, кейин эса, ўз асл кўриниши соябонни акс эттирди. Мавзуга ҳамоҳанг тарзда экранда медузалар тасвирлари пайдо бўлди ва янги “Соғинаман” қўшиғини куйлаган Райҳон оқ ярқироқ либосда чиқиб келди.
Икки раққоса, обрич ёрдамида юқори кўтарилиб, икки ёнда ҳавода, рақс ҳаракатларини амалга оширишди.
Сўнг, “Севгилим” қўшиғини куйлаш жараёнида, Райҳоннинг ўзи ҳам ҳавога кўтарилди! Ҳеч қандай ҳимоя камарисиз (назаримизда), бу жараёнлар 4 марта амалга оширилди.
Биринчи марта Райҳон капалакни акс эттиргандек, бирида акробатчи йигитнинг устига ётган ҳолатда, ўта қийин ва ҳеч нарсани ушламасдан учиш,
учинчисида акробатчи йигит билан,
тўртинчисида эса, бир қўлда акробатчининг елкасидан қучган ҳолда ҳавога кўтарилишлар, чиройли ва завқли кўриниш билан бирга аслида қанчалик хавфли трюклар эканлигини сезиш қийин эмасди. Райҳоннинг ҳар бир концертида ҳаводаги учишлар киритилишига эътибор қаратилса, Райҳон томошабинлар, ўз мухлислари учун, ҳар қандай фидоийликка тайёр хонанда эканлигини англайсиз.
Севги-муҳаббат соғинчи ва изтиробларини акс эттирган бу қисм якунида Райҳон таъсирли қўшиқларидан бири “Алданган кўнгил”ни ҳамда, рус тилидаги янги “Жизнь не повернётся назад” қўшиғини куйлади.
Чиндан ҳам, “ҳаёт ортга қарамайди”! “Алданган кўнгил” қўшиғи вақи экранда, Райҳоннинг ортидан порлаган нур ва чироқлар, қўшиқ билан ажиб уйғунлик кашф этган ҳолда, ўзгача бир эффект берди. “Жизнь не повернётся назад” қўшиғи вақтида эса, уруш ва бир инсоннинг турли соғлом ва бемор ҳолатлари ифода этилган видеотасвирлар ҳеч кимни бефарқ қолдирмади, назаримизда. Бу видеоролик ва қўшиқ, инсонни ҳар қандай куннинг қадрига етишга ундаб, ҳар бир кун “ортга қайтмаслиги”ни англатади.
Мазкур тасвирларга ҳамоҳанг равишда раққосларнинг ҳаракатлари, Райҳоннинг ўзи ҳам, акробат қизнинг қўлидан тутганча, ҳавога кўтарилиши, қўшиқ ва саҳна номери таъсирини янада оширди.
Танаффусдаги Illuminatе рақсларидан сўнг, кучли чироқлар порлаб, олқишлар остида
саҳнада қора ярқироқ либосда пайдо бўлган Райҳон “Ўқилмаган китоб” дуэтини Улуғбек Раҳматуллаевсиз ўзи ижро қилди.
Сўнг, рус тилидаги янги “Не отпускай мои руки” қўшиғини чироқлар уйғунлашуви остида куйлади.
“Юрак уради бум” қўшиғининг саҳна чиқиши, ёш барабанчилар ва ёш раққослар гуруҳи билан ўзгача бир кўриниш ташкил қилди.
“Самодан” қўшиғи экрандаги йўл-йўл фон ва раққосаларнинг динамикага бой рақслари уйғунлигида куйланди.
Айнан шу қўшиқ вақтида, Райҳоннинг экранда клонлаштирилгандек“кўпайиб” кетиши, ҳамда қўшиқ якунида, экранни телевизор тарзида гўёки “пульт” билан “ўчириб” қўйиши, ўзгача бир таассурот уйғотади.
Сўнг, яна бир ҳаракатларга бой рақслар билан уйғунлашган “Сени унутаман” қўшиғини экранда клип тасвирлари ҳамоҳанглигида куйлади.
Бундан ташқари, оқ ҳарир либослардаги раққосаларнинг саҳнада “учиб” юришлари ҳам, бу номерга алоҳида бир кайфият бахш этди.
Концерт ниҳоясида, “Қани қани” қўшиғини куйлаган Райҳон, саҳнада қўлида кичик видеокамера билан томошабинларни “видео”га ҳам олди. Саҳнадан пастга тушиб, томошабинлардан бир ёш қизча, ундан сўнг хонанда
Каниза билан “Қани қани” қўшиғини биргаликда куйлади! Бу қўшиқ янграган вақтида, саҳнадаги экранда “Қани қани” қўшиғига Райҳоннинг фан клуби томонидан ишланган пародия “видеоклип” ҳам намойиш этиб ўтилди. Бу билан Райҳоннинг атрофидаги ҳар бир инсоннинг меҳнатига эътиборли эканлигини сезиш қийин эмас.
Концерт якунида Райҳон мазкур концертни тайёрлашда меҳнати сингган барча ижодкорларни таништирди.
Эътироф этиш жоиз, концерт режиссёри унинг ўзи эканлиги, ҳам қойил қоларли жиҳатлардан бири.
Концерт якунида залда томошабинлар устига рангли шарлар ёғилди.
Концерт давомида Райҳоннинг фан клуби уни мунтазам қўллаб-қувватлаб туришди! Зарли шарлардан ясалган “RAYHON” “I LOVE” “FC” ёзувини саҳна атрофида кўтариб олган,
Райҳоннинг тасвири туширилган футболкада фан клуб аъзолари концерт давомида, Райҳонни олқишлаб, унинг қўшиқларидан завқланиб, атрофдагиларга ҳам хуш кайфият улашдилар.
Шунингдек, фан клуб аъзолари ҳар куни концерт тугаб Райҳоннинг концерт саройидан чиқишини ҳам, мазкур “ёзувлар”, гуллар ва олқишлар билан кутиб олиб, қўллаб-қувватлаб турдилар! Уларнинг садоқатига қойил қолса арзийди!
Концерт ҳақиқий умумий ёндошсак, унда асосий декорация экранга бутунлай ўзгача ёндошилган, ундаги ҳар бир деталгача, Райҳоннинг қўшиқларига ҳамоҳанг ва уйғунлаштирилган ҳолда кўрсатилиб, ҳаммаси пухта ўйланганлиги билиниб турибди.
Раққослар ҳам замонавий рақсларни маҳорат билан амалга оширганлар, ҳаводаги акробатик рақсларгача, қўшиқлар мазмунидан келиб чиққан ҳолда амалга оширилган.
Дастурда чироқлар эффектидан ҳам унумли фойдаланилган, экрандаги Райҳон тасвирлари билан уйғунлашган ҳолда порлаган кучли чироқ эффектлари, ҳақиқий ёрқин шоуни ифода этади.
Концерт аввалида ва концерт тугагач, томошабинларнинг қўлларида талаш бўлаётган Райҳоннинг ижод ва ҳаётига бағишлаб чиқарилган журналга кўзимиз тушди!
Мазкур журнал ўзининг қизиқарли саҳифалари, ёрқинлиги ва сифати билан кўпчиликнинг эътиборини тортди!
Шунингдек, “Истиқлол” санъат саройининг ўзидан Райҳоннинг янги мусиқий альбомини ҳам харид қилишингиз мумкин!
Бундан ташқари, Райҳон билан бирга суратга туша олмаганлар, унинг махсус стендлари ёнида суратга тушишлари ҳам мумкин.
Концертга, сайтимизга берилган таклифнома учун Райҳонга ва унинг администратори Фатхиддин акага алоҳида миннатдорчилик билдирамиз!
Саида Вахобова
Феруза Фаттохова
Суратлар учун Шерзод Икрамутдиновга ташаккур
