FATTOHHON.COM
« Все новости
“Ориат доно” радиоси журналист Акмал Мирзонинг “Чой устида” дастурини “Ўзбекнаво” фаолиятига бағишланган 14 август сонида, “Миллион” жамоасининг лицензия муддати вақтинчалик тугатилиши ҳақида савол-жавоблар бўлган эди...
Нима учун жамоа лицензия муддати вақтинча тугатилди?
Эндиликда эса, мазкур ҳолат юзасидан, “Миллион” жамоаси аъзоларидан Жамоа сардори Бекзод Комилжонов, телебошловчи Даврон Кабулов ҳамда, “Ўзбекнаво” Эстрада Бирлашмаси Матбуот хизмати раҳбари Одил Абдуқаҳҳоров билан ўзаро фикрлашилди.
Бекзод Комилжонов «Миллион» жамоаси сардори: - Агар қисқача тушунтириладиган бўлса, саволларнинг жавоби, “Миллион” жамоаси лицензия масаласига ортиқча реакция билдирмайди! “Ўзбекнаво” эстрада бирлашмаси шуни маъқул деб, билибдими, демак, тўғри. Лицензияни берадиган ҳам, оладиган ҳам улар. Демак, қаердадир хато қилган бўлишимиз мумкин. Беайбмиз демайман, бу билан тўхтаб қолиш йўқ, ижодда изланишда давом этамиз! Лекин, ҳеч кимнинг олдида узрли эмасмиз! Ҳеч кимдан узр сўрамаймиз, лицензияни олинганлиги ҳақида ижтимоий тармоқларда, инстраграмда шунчалик фаол тарқалдики, ким дўст, ким душман кўриниб қолди!
Даврон Кабулов телебошловчи, “Миллион” жамоаси аъзоси: - “Миллион” жамоаси лицензияси муддатининг тугатилиши масаласида: бу вазиятда ҳамма нарса бизга боғлиқ эмас. “Ўзбекнаво” эстрада бирлашмаси таркибида рўйхатдан ўтган ижрочи сифатида ҳар қандай қарорни қабул қилишимиз, қўллаб-қувватлашимиз ва ўз камчиликларимизни бартараф этиш устида ишлашимиз керак, деб ўйлайман. Нимадир камчилигимиз бўлгандирки, мутасаддиларни шу қарорга ундагандир... Лекин, “Миллион” мухлислари бир нарсани ёддан чиқармасликларини ҳоҳлардик: биз ҳар доим тегишли меъёрларга амал қилишга, бадиий кенгаш қўйган талабларни бажаришга ҳаракат қилганмиз. Ҳазилларимизни доим бадиий кенгашга кўрсатиб, кейин саҳнага олиб чиққанмиз, ўзбошимчалик қилмаганмиз.
- Унда хатойимиз нимада бўлди, деб ўйлайсизлар?
- Хатоликлар бор, йўқ эмас. Ҳар холда 20-30 йилдан буён ижод қилаётганимиз йўқ. Ёш бола ҳам, энди қадам ташлаётган вақтларида, дарҳол ўрнидан туриб югуриб кета олмайди-ку! Кимнингдир ёрдами билан оёққа туради, атак-чечак қилади. Ҳозир бизда шундай жараён кечмоқда ва бундай пайтларда, жуда кўпчиликнинг эътибори қаратилишини ҳисобга олсак, нияти холис бўлмаган баъзи одамларнинг зарар етказишлари ҳам эҳтимолдан ҳоли эмас. 3 ёшли болани калтаклаш, 20 ёшли йигитни уришга қараганда осонроқ, шуни ҳисобга олганда, баъзи “журналистлар”, “булар йўлини топиб кетганидан кейин кучимиз етмай қолади”, деган фикрда “ҳужум” бошлаган бўлишлари ҳам мумкин. Ҳамкасблардан, касби журналист инсон сифатида илтимос қилган бўлардим: танқидингизни бажонидил қабул қиламиз, фақат иложи бўлса, эртага ниманидир яхшилашга хизмат қиладиган конструктив ва асосли танқид йўлланг, эртага уни ўқигандан кейин ўзимизда ҳам, “шу ерига ростдан ҳам камроқ эътибор берган эканмиз, шунга жиддийроқ қарашимиз керак” деган ўй пайдо булса, менимча, ҳамма ютади. Ҳазилларимизга “фаҳш” дея таъриф берганда эҳтиётроқ бўлишларини, бу сўзнинг туб маъносига қиё боқишларини илтимос қилардим. “Миллион” жамоасини “оммавий маданият тарғиботчиси” деганда, бу жуда мудҳиш тушунча эканлигини ҳам ҳисобга олишларини сўрайман. Чунки, худди шу жанрда ижод қилаётган бошқа баъзи бир ҳамкасбларимизга қараганда, “Миллион”нинг ҳазиллари ҳатто нисбатан юмшоқроқ деган фикрдаман. Репертуарни имкони борича ранг-баранг қилишга, кўпроқ мавзуларни қамраб олишга ҳаракат қиламиз. Ниятимиз холис, муайян пардаларни очиб ташлаш истагимиз йўқ. Яқинда “Ўзбекнаво” эстрада бирлашмаси мутахассислари билан юзага келган вазият бўйича уларнинг ўзлари қандай фикрда эканликлари хусусида, келажакдаги ижод ҳақида ўзаро фикр алмашдик. Уларнинг позицияси шахсан мени хурсанд қилди. Мутассадди ташкилот ходимларининг, ўз ташкилотида рўйхатдан ўтган санъаткорлар, ижодкорларни ҳимоя қилиш кайфиятида эканлиги қувонтирди.
Бир нарсани тушунишларини истардим: “Миллион” вакиллари “Оталар сўзи, ақлнинг кўзи” кўрсатувининг нусхасини тайёрлаётганлари йўқ. Комедия жанридаги хорижий дастурларига, қолаверса, аския санъатидан тортиб, сўз усталарининг концертларигача эътибор беринг, нозик мавзуларга, айтиш мумкин бўлса, белдан пастки мавзуларга у ёки бу даражада барибир мурожаат қилинади. Фақат кимдир бундан жуда очиқ тарзда, айримлар ёпиқ кўринишда, иккинчи маъноси беркитилган шаклда, фойдаланади. Биз концертда айнан “қоғозга ўралган”, одамларнинг ҳамиятига тегмайдиган даражадаги ҳазилларни тайёрлашга урингандик. Қаердадир бўрттириб юборгандирмиз, қаердадир хатоларимиз ҳам бордир? Лекин... Агар фарзандингиз бирор айб иш қилса, кўчага ҳайдаб, юз ўгириб, воз кечиб кетмайсиз-ку... (ўйланиб) Тўғри йўлга солишга ҳаракат қиласиз. Лицензиямиз тўхтатилганидан эмас, жамоамиздаги йигитларнинг ижоддан совиб, ҳафсалалари пир бўлишидан озгина чўчияпман. Қолган ҳамма нарса жойида! Расмиятчиликлар эса вақти-соати етиб ечимини топишига ишонаман. “Миллион”нинг энг яхши концертлари, ёши катталарга ҳам ёқадиган дастурлари ҳали олдинда, деб умид қиламан!
- Кўпчиликни энди “Миллион” жамоаси куз ойларида концерт берадими, нима бўлади деган савол қизиқтирмоқда!
- Куз ойларидаги концерт ҳақидаги гап қаердан чиқди ўзи? (кулади) Ўтган йилги дастурнинг афишасини интернет орқали яна тарқатиб юборишибди. Балки, кимгадир бу нарса қизиқ туюлса керак. Куз ойларига ҳам, декабрь ойига ҳам ҳеч қандай томоша мўлжалланмаган. Умуман, лицензия билан боғлиқ жараённи ҳал қилганимиздан сўнг, концерт ҳақида гапирсак мантиқийроқ бўлса керак.
- Баъзиларнинг фикрича, “Миллион” жамоасининг ёшлар тарбиясига таъсири ҳақида, нима дея оласиз?
- “Миллион” жамоаси ёшларнинг тарбиясини бузади” деган фикр, бир тарафдан ғазабимни қўзғатган бўлса, яна бир тарафдан кулгим қистади. 20 йил давомида уйда, оилада олинган тарбия, 3 соатлик концертда бузилишига сиз ишонасизми? Шахсан мен — йўқ.
“Бу концертни оилавий томоша қилиб бўлмайди” дейишмоқда. Лекин, биз концерт афишасини эълон қилганда, “оилавий томоша қилиш учун” деб ёзмаганмиз-ку!? Оилавий томоша қилиш учун, дейлик Ўзбекистон телевидениесида 12 та телеканал, 800 га яқин кўрсатув бор. Юзлаб газеталар чиқади, ўнлаб радиолар... Бемалол оилавий кўриш, эшитиш ва ўқиш мумкин. Назаримда, маошини сарфлаб концертга тушаётган одам мажлисга кетмаётганини билади, комедия жанрида кенг кўламдаги мавзуларга юмор, сатира орқали мурожаат қилинишига руҳан тайёр бўлиб келади. Халқона мавзуларга, мақоллар, нақлларга ҳам мурожаат этишимизни, жамиятдаги ижтимоий муаммоларнинг, электр токи йўқ бўлиши ёки йўллар нотекислиги каби нуқсонларнинг айбдори, бир тарафдан ўзимиз эканлигимизни томошабинларга “қоғозга ўралган” ҳолда етказишга ҳаракат қилганимизни ҳеч ким инкор этмаса керак?
Эртадан бошлаб гўдакларни лайлаклар ташлаб кетишни бошласа, биз ҳам йигит ва қизларнинг ўзаро муносабатларини саҳнага олиб чиқишни дарҳол тўхтатамиз. Муаммо йўқ, биз гапирмаслигимиз мумкин, лекин бу нарса ҳаётимиздан йўқолиб қолмайди-ку? Биноларни, йўлларни, спорт иншоотларини энг замонавий қиёфада барпо этяпмиз. Дунёқарашимизни қачон XXI асрга мослаб “таъмирлаймиз”? Концертларимизда, қўл телефонларида оммалашаётган унсурларни, ҳазилларимиз орқали, “кўринглар бу қанчалик бетайин нарса, қўл телефонларимизда шулар айланмоқда” деган маънода намойиш қилдик. Эрталаб 8 да ишга келиб, кеч соат 6 гача девордан нарисини кўрмайдиган “қаламкашлар” эса, буни ўзларича талқин этишяпти.
- Лекин, сизлар ишлатган ҳазиллар, гаплар ташқарига чиқиб, оммалашиб кетмоқда. Балки, шуни назарда тутишгандир?
- Оммалашувнинг сабаби, бугунги кун учун долзарб мавзуларни танлаганимиз бўлса керак. Чунки, ҳамма кўрсатув, концертлар ҳам, қўшиқ, клип ва фильмлар ҳам бир вақтнинг ўзида оммалашиб кетавермайди. Одамлар кундалик ҳаётда кўриб, билиб, сезиб юрган нарсалар, дуч келаётган воқеалар қизиқтира олса керак.
Мени бир жиҳат ҳайрон қолдирмоқда: концерт берилганидан сўнг, 5 ой ўтди. Диск чиққанига ҳам 1,5 ой булди. Ҳаммаёқ жим-жит. Тўсатдан 1 ҳафтанинг ичида газета ва интернет орқали кетма-кет танқидий мақолалар чиқа бошлаяпти. Тушунинг, ўзим журналистман, бунинг илдизи тахминан қаерга олиб бораётганини англаш мен учун қийин эмас. Буюртма қилинган мақолалар ва ҳоказо... Нега дарҳол билдирилмади ўша эътирозлар? Чўнтакка қўл телефонини солишни ҳам, машина ҳайдашни ҳам жинсий аъзо билан боғласа, кечирасиз-у, “Миллион” ёшларни айнитаётганидан эмас, балки, муаллифнинг бузуқлик даражасидан далолат беради, назаримда. Ҳазилларимизга эътибор беринг, ҳар хил тушунса бўлади. Оддий маънодаги гапларни ҳам мана бундай маънода тушуняпсизлар - демак, тўғри фикрлашни бошлашимиз керак, деган ғояни илгари сурганмиз. Ҳамманинг ўз ҳақиқати, мантиғи, фалсафаси бор. Саҳнага олиб чиқиладиган нарсани 50 кишига кўрсатсангиз, 50 хил фикр беради. Бизни ишимиз хонандалар ва актёрларникидан фарқ қилади. Гап билан инсонлар кайфиятини кўтаришимиз керак. Гапда хатоликлар ҳам бўлади, турфа талқинлари бўлади. Агар “Миллион” ёшлар тарбиясини бузилишига сабаб бўлмоқда”, дейилса, унда келинг ҳамма муаммоларни, оилаларни ажралиб кетишидан, қизларнинг кийиниш маданиятигача - ҳаммасини йиғиб, барига “Миллион”ни айбдор, дея эълон қиламиз!
“Истиқлол” санъат саройида йилига адашмасам камида 200 кун концерт бўлади. Юзлаб хонанда ва актёрлар бор. Ёшлар тарбиясига салбий таъсир қилаётгани фақат “Миллион” бўлиб чиқяптими? Менимча, йўқ. Лекин, бу “нима қилишни ўзимиз биламиз” дегани эмас. Мутасадди инсонларнинг таклиф ва тавсияларини, маслаҳатларини олишга доим тайёрмиз. Концертга дам олиш учун эмас, иллат қидириш учун келадиган кичкинагина аудитория ҳам борлигини инобатга оламиз. Ўша айтилаётган оилавий дастурни томошабинларга намойиш қилиш учун, тинмай меҳнат қилишда давом этамиз. Фурсатдан фойдаланиб, “қимматли” танқидий фикрлари билан ўртоқлашаётган қаламкашларга миннатдорчилик билдираман: олтинга тенг маслаҳатларингизни бундан 2-3 йил аввал, репетиция учун жой топа олмай қийналган пайтларимизда берганингизда, янаям кўпроқ хурсанд бўлардик...
“Ўзбекнаво” Эстрада Бирлашмаси Матбуот хизмати раҳбари Одил Абдуқаҳҳоров:
- Ҳақиқатдан ҳам,“Миллион” жамоасининг лицензияси муддати вақтинча тугатилганлиги тўғри ва бунинг сабаблари, “Миллион” жамоаси аъзоларига тушунтирилди. Лицензия муддатининг вақтинча тугатилиши, бу қонунда белгиланган тартибда қилинди. Бу асло, янги шаклланиб келаётган жамоани синдириш эмас! Бу уларга йўл-йўриқ кўрсатиш! Кейинчалик айрим хатоларга йўл қўймасликка чақириш! “Дастур сценарийси бадиий кенгашдан ўтган-ку” деган савол бўлиши мумкин, лекин кечирасизу қизиқчилик санъати шундайки, кўп нарса саҳнада илҳом олгандан кейин, мухлисларнинг қўллаб-қувватлашидан кейин ҳам, кўп илҳом саҳнанинг ўзида ҳам пайдо бўлади. Бу қўшиқ эмаски, олдиндан ёзиб тайёрлаб қўйилган бўлса! Бадиий кенгашдан ўтган сценарийдан ташқари ҳам, сўзлар ҳам ишлатилган. Кулгу сценарийдан албатта, ўзгарган. Мухлисларнинг қўллаб-қувватлашлари натижасида улар илҳомланиб кетган-да, сал сценарийдан четга чиқиш ҳолатлари бўлган. Лекин, лицензия муддатининг тугатилишига айнан сценарийдан четга чиққанлиги асосий сабаб эмас, сабаблардан бири, нима сабабданлиги эса, жамоа аъзоларига тушунтирилди. Кулдириш санъатининг ўзига яраша қонун-қоидалари бор! Ўша қонун-қоидаларга риоя қилган тарзда фаолият олиб боришларини мақсад қилган ҳолатда, чора кўрилди. Ўйлайманки, улар бундан тўғри хулоса чиқаришади. Кейинчалик ижодий фаолиятдаги ижобий ўзгаришларга қараб, лицензия муддати яна давом эттирилиши мумкин.
-Нима учун бу ҳақида “Ўзбекнаво” Эстрада Бирлашмасининг сайтида маълум қилинмади?
- “Ўзбекнаво” Эстрада Бирлашмасининг сайти янгиланмоқда! Янгиланиш жараёни бўлганлиги учун ҳам, ўша пайтда бу маълумотни бериш имконияти бўлмади. Техник носозлик юз бериб 20 кун давомида маълумот беришнинг иложи бўлмади. Кейин эса, бу маълумот эскирганлиги учун эълон қилинмади.
- “Миллион” жамоасининг лицензияси муддати вақтинча тугатилганлигининг аниқ муддати қачон эди?
- Аниқ муддати жорий йилда 17 август эди! Бу маълумотни ҳали ҳеч қайси сайтда расмий эълон қилмадик! Баъзилар “миш-миш” тўғрими, деб телефон қилиб сўрашганида, бу хабарни тўғри эканлигини тасдиқлаб бердик. Ўз фикримизни айтдик.
-Ўтган йили ҳам, “Миллион” жамоасининг концертидан сўнг, шундай миш-мишлар тарқалган ёки тарқатилган эди...
- Бўлиши мумкин. Лекин, ўтган йили ундай эмас эди. Ундай бўлмаганди.
Ижод шундай бир жараёнки, доим бир текис кетавермайди. Баъзида хато ва камчиликлар ҳам бўлиши мумкин. Хато ва камчиликларни эса, тўғрилаш мумкин. Битта гапнинг ўзини ҳам ҳар хил талқин қилиш ва ҳар хил тушуниш мумкин!
“Миллион” жамоаси билан юз берган ҳолатни ҳамма ўзича талқин қилишга киришгандек, кимдир уларни аёвсиз танқид қилган бўлса, кимдир ўзини “дўст” кўрсатиб, уларнинг ёнини олишга берилиб кетгандек...
Лекин, нима бўлганида ҳам, “Миллион” жамоасини ижодий фаолияти янада жўшқин давом этади ҳамда, янада яхши дастурлар билан барчага хурсандчилик улашишда давом этадилар, деб ўйлаймиз.
Саида Вахобова
Феруза Фаттохова