FATTOHHON.COM

АБДУВАЛИ РАЖАБОВ: ОДАТДА ҚИЛИНГАН ИШЛАР ҲАҚИДА ГАПИРГИМ КЕЛАДИ! 18.09.2014 16:56

Хонанда Абдували Ражабов “Бевафо ёр” қўшиғи билан ижодда порлаб чиққан! Кейин эса, “Ёмғирлар” унинг ижодини янада юксалтирди. Хонанда янада кўплаб хит қўшиқлари билан барчанинг эътиборида! Бугунги кунда хонанда келгусидаги ижодий режалар билан банд! Мухлислари эса, ундан янада хит қўшиқлар кутишмоқда! Бугунги “Диллашув” саҳифаси меҳмони Абдували Ражабов.

 

- Ҳозир ҳам продюсер билан фаолият олиб боряпсизми?

-Йўқ, ҳозирги кунда продюсерим йўқ. Продюсер қиладиган ишларни ўзимиз ҳам қиляпмиз. Бир пайтлар бизга продюсер керак эди, керак бўлганида ишлатдик, энди бугун керак эмас, деган тушунча йўқ! Одамзот шундай экан, ҳамма ишни ўзи қилса, ўзига ишонар экан, ёки кўнгли тўлади. Шундай тарафлари ҳам бор экан.

 

- Ҳозирги кунда ижодингизга нима етишмаётгандек?

- Жуда кам қўшиқ ёзяпман! Балки, ҳозир шундай пайтдир? Шундай пайт келади, инсон тинимсиз меҳнат қилади, шундай пайт келадики, 2-3 тага бўлина олмайди! Оила ишлари, бошқа ишлар кўпайиб қолар экан-да. Энди ижодга янада урғу бермоқчиман! Шу ўтган вақт ичида ҳам эътибор қаратдим. Аммо, нисбатан камроқ. Яъни, ўз ижодимдан ўзим қониқмадим.

 

-Илгари қўшиқларингизнинг қайси жиҳатларига аҳамият берардингизу, ҳозир-чи?

- Менинг ёнимда ҳар доим яхши инсонлар ишлашган. Мен эътибор беришим керак бўлган нарсаларга улар кўпроқ эьтибор беришарди. Бу уларнинг масъулияти эди. Мен ўзим эса, кўп нарсага эътибор қилмасдим. Бугун эса, ўзим кўп нарсага эътибор қиляпман! Қўшиқларнинг сўзи, мусиқасига алоҳида эътибор беряпман. Масалан, менга кўп қўшиқларнинг сўзларидан кўнглим тўлмайди! Кейин, мен ҳақимда, уларнинг устидан кулаётгандек бўлиб ҳам қоламан. Бир-икки қўшиқларимни ўзгартириб-ўзгартириб, худди бировнинг асабига тегаётгандек бўлиб, кўнглим тўлмаса ҳам, “бўпти, хўп” деб, ёзиб юборган вақтларим ҳам бўлган. Яна бир-икки жойини ўзгартиринг, десам, худди уларнинг устидан кулаётгандек бўлиб қолишни ҳоҳламаганман! “Майли, хўп” деб куйлаб юборган қўшиқларим ҳам бўлган. Лекин, бу қўшиқлар кимгадир ёқади, аммо менинг кўнглим тўлмайди! Кимдир аксинча, “шу жойи зўр” деса, ўзим учун ўша жойи ёқмайди.

 

- Ижодкор сифатида ўша ижодкорлардан талаб қилишга ҳаққингиз бор-ку?

-Талаб қиламан. Масалан, боши ёқди, қолган ярмини ўзгартириб бер, десам, у бошидан ўқиб чиқиб, барибир яна ўша рамкага кириб қолади. Сўзларини сал бошқача ёзади, аммо қўшиқ ўша-ўша бўлади! Сўзи ўзгарган билан қўшиқ ўзгармайди. Баъзида шундай ҳолатлар бўлади. Қўшиқ ўша ижодкорники бўлса, мен уни бошқага олиб бориб беролмайману. Масалан, бошида боши ёқади, иккинчи ярми ёқмаётган бўлади. Бошидан ўзгартириб ёзиб беринг, дейишга бўлмайди. Баъзи ижодкорлар ҳам, “менга бошқа сўз келмайди, бир марта келади” дейишади.

 

- Аввалги хит қўшиқларингиз ҳали ҳам эътиборда! Лекин, шу яқин 2 йил ичида қўшиқларингиз омма эътиборини камроқ тортгандек. Бу ҳам шу камроқ эътибор қаратганингизданми?

- Балки? 2 йил ичида балки? Вақт негадир жуда тез ўтиб кетаётгандек. Масалан, тонг отади, бир ишни қилиб келгунингизга тушлик вақти бўлади. Кимдир билан гаплашиб келсангиз, бўлди, соатга қарасангиз 16-17.00 лар бўлиб турибди-да! Худди шунга ўхшаб, тез вақт ўтяпти. Бу ҳақида ўртоқларимга ҳам кўп айтаман, яқиндан эсингдами, фалон жойга боргандик, десам, яқинда эмас, ўтган йили, дейишади. Инсон ўзи  сезмай қолар экан, вақт жуда тез ўтиб борар экан. Бир зумда бир йил ўтиб кетибди. Балки, бу ҳам яхшиликкадир?

 

- Илгари клипларингизга кўп ва кучли эътибор қаратардингиз. Ҳозир эса, бироз... сустроқдек... яқин 2 йил ичида!

- Айтяпману, 2 йил ичида кам қўшиқ ёздик. Шунинг учун, клип ҳам ўз-ўзидан кам бўлди.

 

- Балки, ҳозир ҳамма ишларга ўзим улгураман, деб ҳаракат қилаётганингиз учун шундай бўлмаяптимикан? Балки, яна продюсер ва бошқалар билан ишлаб кўриш ҳақида ўйламадингизми?

- Продюсер бўлган тақдирда ҳам, мени ўзимнинг ишларим бироз кўпайиб қолди. Бошида айтганимдек, 2-3 тага бўлина олмайман!

 

- Сизни ижоддан кечиб, бизнес билан ҳам шуғулланиб кетди, дейишди. Бу қанчалик тўғри?

- Йўқ. Аммо, эркак кишига 40 ҳунар ҳам оз. Бу легани, мени санъатдан четлашди, дегани эмас. Санъат мен учун бирини навбатда! Бошқа ишларга келсак, менимча, инсон имконият бўлганида бошқа ишни ҳам қилаверади.

 

- Машҳур бўлишимда ўзимни қайси жиҳатим ёрдам берган, деб ўйлайсиз? Кўриниш, мухлислар, омад ёки ўша давр?

- Қўшиқларим! Чунки, менимча, бугунги кунда зўр қўшиқнинг ўзи йўқ. Нафақат мен, балки кўпчилик ҳам хит ёза олмаяпти, назаримда.

 

- Ҳозирги вақтда ижоднинг қайси жиҳатларига кўника олмаяпсиз?

- Яхши қўшиқ йўқлигига! Тўғри, қўшиқлар ёзяпман, масалан, “Соғинар” деган қўшиқ чиқардик. Кўпчилик мақтади. Ундан кейин ҳам ижод қилинди. Яхши қўшиқлар ёзяпмиз. Лекин, билмадим, бугунги кунни тушуниб бўлмаяпти. Ўзингиз ўйламаган қўшиқлар хит бўлиб кетяпти. Олдин студияда қўшиқ ёзганимда, мен ўша қўшиқ хит бўлишини билардим. Ижодий гуруҳимиз, қулоққа ёққан чиройли қўшиқ, шу хит деган ишончда бўлар эдик. Ўша қўшиқ чиндан ҳам хит бўларди. Ҳозир эса, масалан, қўшиқ менга ёқмаса ҳам, бошқа кимгадир ёқади. Мен охирги пайтларда шу нарсага ўзимни ўргатмоқчиман. Қўшиқ нафақат менга ёқиши керак эмас экан, халққа ёқсин экан! Менга ёққани билан бировга ёқмаса, бўлмайди. Мухлисларга халққа ёқсагина яхши бўлади!

 

- Фарзандларингиз ҳам сизни йўлингизни давом эттириб, санъаткор бўлишса?

- Агар ўзида иштиёқ бўлса, мен қаршилик билдирмайман. 2 та ўғлим бор, Асадбек ва Отабек. Каттаси 5 ёшда, кичкинаси 3 ёшга тўлади.

 

- Шоубизнесга қадам қўйишдан аввал шоубизнес ҳақидаги фикрларингиз қандай бўлгану, ҳозир қандай? Ўзгаришлар қанчалик бўлди?

- Шоубизнесга кириб келишимдан аввал, ўзим шу шоубизнесга, санъатга кириб келишимга ишонмаганман! Кўзим етмаган! Санъаткорларни фақат телевизорда ва концертларда кўрардим. Ўзимга бир мақсад қўйгандиму, лекин менимча, осон эмас, қийин, деб қандайдир иккиланганман. Лекин, ўзим учун “мен барибир мақсадимга етаман” деб аҳд қилганман! Кейин қўшиқларимни ёзганман. Кўп эмас, озгина ҳаракат қилганман, десам ҳам бўлади. Учинчи қўшиғимнинг ўзи машҳурлик келтирган. Биринчи қўшиғимни оммага чиқармаганмиз. Кейингиси “Мендан кетма” бўлган, радиоэфирлар орқали тарқалган. Клипи муваффақиятсиз чиққани учун, клипини айлантирмаганмиз. Кейин эса, “Бевафо ёр” чиққан! Уни биттада радио ва телеэфирларда берганмиз. Биттада бу қўшиқ ҳаммаёқни эгаллаб машҳур бўлиб кетди! Ўша қўшиқ билан халқ эътиборига кириб келганман. Шу қўшиқ менга кўп омадлар олиб келган!

 

- Шоира Отабекова билан дуэтингиз ҳам, жуда оммалашганди. Шундан кейин мана шундай дуэтлар қилиш фикри бўлмаганми?

- Режалар ва қилинадиган ишлар жуда ҳам кўп! Энди мана, амалга ошириш ҳаракатидамиз. Мен ўзи янгиликларни олдиндан гапирмайман! 2002 йилдан буён ижод қилиб келаётган бўлсак, шу пайтдан бери, жуда ҳам кўп янгиликлар бўлган! Кўп ижод қилганмиз, аммо ҳеч қачон олдиндан гапирмасдим. Аммо, ҳозир савол берганингиз учун бироз янгиликларни айтдим. Мен, одатда қилинган нарсалар ҳақида гапиргим келади! Ҳали қиладиган ишларимиз кўп! Ҳали ҳаммаси олдинда!

 

- Ўз қўшиқларингиз ичида ўзингиз севиб тинглайдигани?

- (ўйлаб) Ҳамма қўшиқларим ўзимга ёқади, лекин севиб тинглайдиган қўшиқларимдан “Севдим ёр” 2003 йилда ёзилган, Шоира Отабекова билан дуэтимиз, “Бевафо ёр”ни эшитсам, қанақадир бошқача бўлади. Ҳар бир қўшиқни тинглаганимда, ўша билан боғлиқ эсга тушадиган кечинмалар бўлади. Ҳар битта қўшиқда бўлади, нафақат ижодкорнинг ўзида, масалан, мухлислар билан учрашиб қолганимда ҳам, ёки кимдир билан дўстлашсам ҳам, “ака, фалончи қўшиғингиз бору, эшитсам, фалон нарса ёдимга тушади, мана бундай вақтлар ёдимга тушади” дейди. Худди шунга ўхшаб, мени ҳар битта қўшиғимни, нафақат мени, балки ҳар бир санъаткорнинг мени ўзимга ёққан қўшиғини тингласам ҳам, ўша даврга қайтаман!

 

- Ўз ҳаётингиздан келиб чиқиб куйлаган қўшиғингиз ҳам борми?

- Яқинда Ота ҳақида қўшиқ ёздик! Бу қўшиқ отамнинг вафотидан кейин ёзилди. Бу қўшиққа клип ҳам суратга олдириш ниятим бор.

 

- Яккахон концерт дастурингизни тақдим қилиш ниятингиз борми?

-Бор! Лекин, бу йил эмас. Мен ҳар доим чиройли концерт берганман, дастуримни чиройли ўтишини истайман! 2004 йил “Туркистон” саройида 2 кун, бир кунда 2 маҳалдан, ундан сўнг, “Зарафшон” концерт залида 5 кун 2 маҳалдан, 2006 йил “Истиқлол” санъат саройида бир кунда 3 маҳал концерт берганмиз. Концертлар Аншлаг билан ўтган! Концерт берсам, ўзига яраша принципларим, режаларим бор. Келгуси йил, куз ойларига, адашмасам, мўлжаллаяпмиз. Бунинг учун меҳнат қилиш керак. Мен ҳозир ҳам концерт беришим мумкин, мухлисларим кутишяпти, сўрашяпти. Вилоятларга борганда, хизматларда, ижтимоий тармоқлар орқали, энг кўп берилаётган савол шу бўлиб қолган. Лекин, биласизми, концерт бериш осон, лекин концерт чиройли, эсда қоларли бўлиши керак, деб ўйлайман! Ўша концертни халқ кутиши керак! Санъаткордан ҳам кўра уни кўпроқ, мухлислар кутишлари керак! Ўзгача концерт бўлиши керак!

 

- Концертингиз тўлиқ жонли ижрода бўладими?

-Ҳаракат қиламиз. Ўша концерт бераётган вақтимда, насиб этса, бу ҳақида албатта суҳбатлашамиз. Жонли ижро албатта бўлади, бу бугунги куннинг талаби!

 

- Сизни ҳамкасбларингиз даврасида бошқаларга қараганда сал камроқ учратамиз. Ўзингиз ҳам томошабинларга унчалик киришимли эмасдек таассурот уйғотасиз.

- Балки, шундайдир? Санъаткорлар орасида демоқчимисиз?

 

- Ҳа. Масалан, тадбирларда, давраларда, концертларда камроқ бўласиз.

- Билмадим. (сал ўйланиб) Ҳеч эътибор бермаган эканман бу нарсага... Сиздан эшитиб турибман. Лекин, бир тарафдан гапингиз тўғри, санъаткорларни инстаграммда, бошқа тармоқларда кўп жойларга борганларини кўраман. Мени ҳам таклиф қилишади, келинг, қўшилинг, дейишади. Билмадим, вақт етишмаслиги, кейин мени дўстларим жуда кўп, аммо улар санъат оламидан эмас! Ҳар куни бирортаси билан кўришиб, гаплашиб, шу билан бироз вақт етишмаса керак. Санъаткорларни ҳаммасини ҳурмат қиламан, яхши муносабатдамиз. Улар ҳам мен билан жуда яхши муносабатдалар!

 

- Оила қуришда мухлисалар орасидан ҳақиқий умр йўлдошингизни қандай қилиб ажратиб олгансиз?

- Мен ўзим танлаганман! Кўнгил иши! Бир-биримизни кўриб, гаплашиб, бунга вақт керак бўлган. Тақдир экан, 2 йил кетган. Исми Умидахон.

 

- Умр йўлдошингизни қайси жиҳатларини қадрлайсиз?

- Кўп жиҳатларини! Масалан, (кулиб) мени жаҳлим чиққанда, феълим келганда, ўзини қандай тутишни билади!

 

- Сизнингча оилавий бахт?

- Бу авваламбор, мен учун саломатлик! Фарзандларимнинг саломатлиги! Ёшим унча катта бўлмаса ҳам, шуни айтмоқчиманки, инсон барибир ота бўлганидан кейин, отасининг қадрига етар экан! Фарзандларини кўриб, онасининг қадрига етар экан! Борган сари, фарзандларини ўйлаб борар экан! Фарзандларим ёш ҳали, аммо, ҳар доим уларнинг соғ-саломатлигини кўриб юргим келади.

 

- “Ёмғирлар” қўшиғингизга ҳаттоки приколлар ҳам қилинган. Қандай муносабат билдиргансиз?

- Ҳеч қандай муносабат билдирмаганман! Қўшиқ машҳур бўлган! Мен эса, ўша приколларни анча вақтдан кейин кўрганман! Эътибор ҳам бермаганман, чунки яхши нарсага тош отилади! У қўшиқни ҳамма билади, шлягер! Ҳаттоки, ёши катталар билан гаплашиб қолсам ҳам, шу қўшиғимни билишади!

 

- Сизнинг-ча, “Ёмғирлар 2” биринчисини даражасига бора олдими?

- У қўшиқ “Ёмғирлар” хит бўлганлиги учун, “Ёмғирлар”нинг қанотида чиқди! Шунинг учун ҳам, хит бўлди. Лекин, масалан, фалончи ва унинг гуруҳи. Фалончи “Ёмғирлар” бўлса, “Ёмғирлар 2” унинг гуруҳи. Шундай машҳур бўлди.

 

- Ижодингизда плагиат борми?

- Йўқ! Умуман, бўлмаган! Бу гапни қўрқмай айта оламан.

 

- Армон сўзи сизга қанчалик яқин?

- Менда армон йўқ эди... Ҳар доим армонингиз борми, дейишса, йўқ, дердим! Бугунги кунда... армон ҳам биласизми, қандай жавоб бермоқчиман. Отамерос, деган нарса бор... (ўйланиб, хўрсиниб) Буни армон, деб бўладими, йўқми? Лекин, барибир инсонни соғиниб турадиган инсони бўлади. Отамга бўлган соғинч...

 

- У кишининг сўнгги дамларида ёнларида бўла олдингизми?

-  Ёнларида бўлганман. Ҳар доим бўлганман. Қўлимдан келганини қилганман. Лекин, барибир ҳаммада шундай нарса бўлади. Бундай бўлса, ундай бўларди, деган. Бу бири кам дунё. Бу мерос. Фақат бир нарсадан кўнглим хотиржам ва бироз таскин беради, ёнларида бўлиб, қўлимдан келганини қилиб, дуоларини олганман!

 

- Қайси характерингиздан санъатга кириб келгач воз кечдингиз? Ўзгардингиз?

- Йўқ, бунақа нарса бўлмади. Мен доим қандай бўлсам, ҳозир ҳам шундайман.

 

- Ижодингизда энг узоқ муддатда олинган клип?

- “Ёмғирлар”да кўп қийналганман! Клип жараёни учун иссиқ сув олиб келамиз, деб совуқда, совуқ сув олиб келишган! Клип бўйича, ўша сув устимдан қуйилиши керак эди! Қор ёққан вақти! Жуда совуқ эди! Биз далада турибмиз! Сюжет бўйича қабр устига гул қўйишим керак бўлган саҳнаси. Бир пайт ўша музлаб турган сувни устимдан қуйиб юборишган! Шу даражада совуқ қотганман, гапира олмай қолганман! Ўшандан кейин, бир ҳафта бетоб бўлиб ётганман!

 

- Мухлис бевафо, деган фикрга муносабатингиз?

-Мухлис бевафо эмас, у ёшига қараб қўшиқ тинглайди! Мен ўзим шахсан, 10 йил олдин тинглайдиган қўшиғимни, сал бошқачароқ кўраман! Борган сари инсоннинг тинглаш талаблари, фикрлари ўзгаради, қўшиқ танлаши ўзгаради. Санъаткорнинг ўзи шунга аҳамият бериши керак. Санъаткор ўз санъатини ривожлантириши керак! Ҳамма тинглашига муносиб бўлиши керак! Бугун фалончини эшитяпти, эртага бошқасини дейишади. Бунга тўғри қараш керак! Ҳамма, ҳаммани ҳаммавақт ўзига жалб қила олмайди, назаримда. Ҳаёт шунақа. Мен бу нарсага ҳар доим тайёр бўлганман. Лекин, бир нарсани айтишим мумкин. 2002 йилда ижод бошлаган бўлсам, бугунгача қанча санъаткорлар келиб кетди. Қанчаси танилди... Лекин, менга шундай гап айтишган, “сенинг мухлисларинг сени ростдан яхши кўрар экан!” Бу рост гап! Менинг мухлисларим мени ростдан яхши кўришади! Керак бўлса, мен учун олишишади ҳам. Масалан, “Абдували кам ижод қиляпти”, деса, “нима учун кам ижод қилар экан, зўр ижод қиляпти”, деб мени ўша ердалигимни билмай, бошқалар билан талашган мухлисларимни кўрганман! “Абдували супер, номер один” деб, гапираётган мухлисларим бор! Бу ҳам катта бахт! Улар ҳозир ҳам етарли даражада! Уларнинг ишончларини оқлаган ҳолда, насиб қилса, мен ҳали кўп қўшиқлар яратаман ва клиплар суратга олдираман!

 

- Хонандалар машҳур бўлгач, дарров фильмларга таклифлар бошланади. Адашмасам, сиз ҳам бир фильмда суратга тушгандингиз. Лекин, фильм муваффақиятсиз чиққанди...

- Ҳа, эсимда! Ўшанда жуда кўп хит қўшиқларим чиққан вақт эди. Ўша қўшиқларимиз кинодаги ўша ҳолатни ёпиб кетган. Рейтингимга таъсир қилмаган. Ўзи ўша фильмни ярмидан бошқа суратга тушмайман, деб кетиб қолганман. Ўша фильмни 2-3 кун съёмкасига борганда, аҳволни кўриб, мен ўйнамайман, деганман. Менга тайёр материални кўрсатинглар, 10 минутини бўлса ҳам, монтаж қилиб кўрсатинглар, деганман. Ёқса, давом эттирамиз, дегандим. Улар 5-6 киши келиб, “кино ёқмаса, кассетасини синдириб ташлаймиз”, деб мени кўндиришган. Ўша вақтда мени кўпгина режиссёрлар фильмларига чақиришганди, улар яхши фильмлар эди, экранга ҳам чиқди, муваффақият ҳам қозонди! Мен эса, бошида шуларга лафз қилиб қўйганим учун ҳам, у фильмларга йўқ, деб бу фильмда суратга тушганман! Чунки, ҳаммадан олдин, буларнинг таклифига “хўп” деб қўйгандим. Сўзимдан қайтиш нотўғри бўлар эди! Бошқа фильмларга роса чақиришганди. Уларни зўрлигини ҳам билардим. Аммо, лафз, ваъда деган нарса бор эди! Кейин бу фильмда тушгач, бундай ҳолат юз берди. Ўша муваффақиятсиз фильмнинг монтаж қилинган вариантини кўрганмиз. Кўриб, “тамом, шунча қилган меҳнатим!”  деганман. Жуда ёмон аҳволга тушдим, қаттиқ таъсир қилди. Шу мени хатойим бўлди, дедим. Кириб, “бўлди, бу фильмни тўхтатиш керак”, десам, улар “йўқ, зўр бўлади. ҳали монтаж қилинади, дубляжда яхшиланади ва ҳоказо” дейишди. Биз ҳам, “нечта клип олганмиз, клип жараёнларида ҳам сизларчалик ишланмайди” дедим. Ахир клипларимда ҳамма керакли техникаларни олиб чиқамиз, ҳеч ёмон клип олмаганмиз! Бу ерда эса... Хуллас, ўзларича ишонтириб, кўндиришди. Фильм экранга чиқди, премьера куни залга кириб ўтирдим ва ҳаммасини тушундим...чиқиб кетдим. Кейин роса ижод қилдик. Кетма-кет қўшиқлар чиқардик ва халқни эътиборини бу тарафга бурдик! Қўшиқларим ўша муваффақиятсиз фильмни босиб кетди!

 

- Агар таклиф бўлса, фильмда тушармидингиз?

- Агар зўр фильм бўлса! Лекин, билмадим. Актёрлар ҳам қўшиқ айтиб кўришяпти, аммо баъзилари ўзида йўқлигини тушуниб, яна актёрлигига қайтяпти. Агар мен ҳам ўз ижодимни зўр, қойил қилиб қўйсам, менга шунинг ўзи етади! Ҳозирги вазифам қўшиқларимни кўпайтиришим, янада яхши ижод қилишим керак! Олдинда режалар кўп!

Саида Вахобова