FATTOHHON.COM
« Все новости 
2017 йил ҳам тарих саҳифаларидан жой олиб, ўз ўрнини Янги 2018 йилга бўшатиб берар экан, Юртимиз бўйлаб, Янги йил байрами ўзгача шукуҳ ва қувонч билан нишонланди.
Маданият вазирлиги Матбуот хизмати маълумотига кўра, юртимиз бўйлаб, Ўзбекистон Республикаси Маданият вазирлиги ва ҳамкор ташкилотлар билан биргаликда Янги йил тадбирларини муносиб ўтказиш мақсадида, кенг кўламли ишлар олиб борилди.
Жумладан, 2017 йил 27 декабрь куни Ўзбекистон Давлат Консерваторияси саҳнасида “Ялмоғизнинг қилмишлари” номли Янги йил байрамига бағишланган томоша дастури ўтказилиб, унга Тошкент шаҳрида яшовчи имконияти чекланган болаларни ижтимоий қўллаб-қувватловчи “APLA” жамияти болажонлари таклиф қилинди.
Ушбу Хайрия тадбирига келган болалар учун саҳоватпеша ҳомийлар томонидан совғалар ҳам улашилди.
2017 йил 27-28 декабр кунлари эса, Термиз археология музейида “Янги йил арчаси” номли тадбир ўтказилиб, унда мактаб ўқувчилари, уларнинг оила аъзолари, музей ходимлари иштирок этдилар. Турли ўйинлар, саҳна кўринишлари, савол-жавоблар ва ташкил этилган мусиқали кеча барчада катта таассурот қолдирди. Тадбирда икки нафар бошловчи, Қорбобо, Қорқиз, Ялмоғиз образлари бўлиб, улар музей ходимлари томонидан ишонарли қилиб ижро этилди ва бу қаҳрамонлар томонидан болаларга совғалар улашилди. Янги йил арафасидаги бу тадбир болажонларнинг қувончларига қувонч қўшди.
2017 йил 29 декабрь куни Сирдарё вилояти Гулистон шаҳрининг “Наврўз” тантаналар уйида Меҳрибонлик уйи тарбияланувчилари, ота-она қаровисиз қолган болалар, ота-оналари Ватан сарҳадларини ҳимоя қилиш йўлида қурбон бўлган болалар, шунингдек, ижтимоий ҳимояга муҳтож оилалар фарзандлари учун “Президент арчаси” байрами ўтказилди ва унда иштирокчиларга Сирдарё вилояти ҳокими томонидан совғалар тақдим этилди.
Байрам дастурида Сирдарё вилоят Маданият бошқармаси тизимидаги бадиий жамоалар, ўз саҳна кўринишлари билан болажонларга байрам кайфияти улашдилар.
2017 йил 29 декабрь куни Қашқадарё вилоят мусиқали драма театрида Қашқадарё вилоят Маданият бошқармаси, Вилоят Халқ таълими бошқармаси ва бошқа ташкилотлар ҳамкорлигида ўтказилган “Президент арчаси” байрам тадбирида Меҳрибонлик ва Мурувват уйлари, махсус мактаб-интернатлар тарбияланувчилари, ижтимоий кўмакка муҳтож, кам таъминланган оилалар ҳамда, Ватанимиз тинчлиги ва хавфсизлиги йўлида ҳалок бўлганларнинг фарзандлари иштирок этишди.
Театр саҳнасида безатилган арча атрофида Қорбобо ва Қорқиз, ҳамда турли эртак қаҳрамонлари, таниқли санъаткорлар, болажонлар ва меҳмонларни хушкайфиятда кутиб олиб, куй-қўшиқлар, ҳазил-мутойибалар билан уларга янада кўтаринки кайфият улашдилар.
Тадбир ниҳоясида, барча болалар, ёш ижрочилар, байрам иштирокчилари жўрликда “Президент арчаси” қўшиғини ижро этишди. Президентимизнинг ўқув қуроллари, китоблар, турфа ширинликлардан иборат совғалари Республика маънавият ва маърифат маркази раҳбари А.Қодиров ва Қашқадарё вилояти ҳокими З.Рузиевлар томонидан кичкинтойларга топширилди.
Болажонларнинг қишки таътилини мароқли ва мазмунли ташкил этиш мақсадида 2017 йил 25 декабрдан 2018 йил 5 январга қадар Қарши шаҳридаги Мустақиллик майдонида қад ростлаган арча атрофида, ҳамда Қарши шаҳар “Ёшлар” маданият ва истирохат боғида, “Президент арчаси” байрам тантанасига бағишлаб маданий –маърифий тадбирлар давом этмоқда.
Шунингдек, пойтахтимизда (МАЪЛУМОТГА ЎТИШ) ҳам, Янги йилга бағишланган тадбирлар давом этмоқда!
Жумладан, Ўзбекистон Давлат Циркида болажонлар учун А.Волков асари асосида сахналаштирилган “Зумрад шаҳар сеҳргари” номли байрам цирк дастури 2017 йилнинг 28 декабрдан 2018 йил 10 январига қадар 5 маҳал болажонлар учун намойиш этилмоқда. Спектакль мазмунига кўра, Элли исмли қизчанинг саргузаштлари болажонларда қизиқиш уйғотмоқда! Бу йилги Янги йил дастурида 50дан зиёд цирк артистлари ўз маҳоратларини намойиш қилишмоқда.
Шунингдек, Шайхонтохур ва Абдулла Кодирий кўчалари кесишмасида жойлашган Наврўз боғи худудидаги майдонда барча Тошкент шаҳар театрлари ўз намойишларини томошабинларга тақдим этишмоқда. 31 декабрь куни Ўзбек Миллий Академик драма театрининг “Бирлашган ўзар”, Ўзбекистон Давлат Ёшлар театрининг “Новогодний бум” ва Ажойиб Мўъжиза катта қўғирчоқлар Театр студиясининг “Маҳалладаги ҳангомалар” театр томошалари намойиш этилди.
Бундан ташқари, Ўзбекистон ва Қорақалпоғистон Халқ артисти Озодбек Назарбеков ҳамда, Ўзбекистон Бадиий жамоалар ижодий бирлашмаси хонандалари Ўлмас Оллоберганов, Аслиддин Дўстов дилни хушнуд этадиган, янги йил қўшиқлари билан оммага кўтаринки руҳ баҳшида этишди. “Наврўз” боғида, ҳамда Тошкент шаҳрида жойлашган ҳар бир туман марказий дам олиш ва истироҳат боғларида, Маданият вазирлиги томонидан ташкил этилган байрам томошалари барчани Янги йилни ҳурсанчиликда кутиб олишга ўз ҳиссасини қўшаётганлиги, ҳамда Юртбошимиз томонидан кўрсатилаётган халқимизга эътибор таҳсинга лойиқдир.