FATTOHHON.COM

“КАТТА ҲОВЛИ” МУСИҚАЛИ КОМЕДИЯСИ МАТБУОТ АНЖУМАНИ БЎЛИБ ЎТДИ! 31.10.2014 17:44

31 октябрь куни «Дедеман» меҳмонхонасида янги “Катта ҳовли” мусиқали комедиясининг матбуот анжумани бўлиб ўтди. Бу матбуот анжуманидан бошқа фильмларнинг матбуот анжуманларидан фарқли равишда, фильмнинг ОАВ вакиллари учун ёпиқ намойиши ўтказилмади. Унинг ўрнига фильмнинг ишчи жараёнидан видеокадрлар ва слайд шоу намойиш қилинди.

Матбуот анжуманида “Камолот” Марказий Кенгаши Раисининг биринчи ўринбосари Феруза Муҳамеджанова, фильмнинг постановкачи режиссёри Нилуфар Иброҳимхўжаева, Оператор Дилмурод Турдибоев, бастакор Дониёр Аъзамов, Мусиқа муҳаррири Раҳима, Адабий маслаҳатчи Нигора Назарова, ҳамда бадиий раҳбар Аюб Шаҳобиддиновлар иштирок этишди.

Шунингдек, Санъат ва Маданият институти “Ўқув театри” раҳбари Аъзам Исҳоқович Ғиёсов, фильмда роль ижро қилган актёрлардан Нозим Тўлахўжаев, Фарҳод Абдуллаев, Акбархўжа Расулов, Машҳурбек, “Элдидо” гуруҳи хонандалари Элдор Хушвақтов, Дилниёз Ғаффоровлар иштирок этишди.

Матбуот анжумани давомида фильм ижодкорлари фильмнинг қандай яратилганлиги ва қандай суратга олинганлиги ҳақида ўз фикрларини билдириб ўтишди.

Шунингдек, Нилуфар Иброҳимхўжаеванинг собиқ ТВМ телеканалидаги фаолияти ва унинг “Ошга марҳамат” кўрсатуви, ҳамда “M&TVA” мукофотини олганлиги ҳам эслаб ўтилди.

Матбуот анжумани давомида, “Камолот” ижтимоий ҳаракати Марказий Кенгаши Раисининг биринчи ўринбосари Феруза Муҳамеджанова мазкур фильмни, “Камолот” ижтимоий ҳаракати ўз қанотига олганлигини билдирди.

Шунингдек, анжуман якунида фильм режиссёри Нилуфар Иброҳимхўжаевага гул ҳам тақдим қилинди.

Фильм учун катта ижодий гуруҳ меҳнат қилган ва унда суратга тушганлар сони ҳам кўпчиликни ташкил этади.

Маълум бўлишича, фильмда асосий ролларни Фарҳод Абдуллаев, Толиб Ҳожиев, Мамасоли Юсупов, Акбархўжа Расуловлар ижро қилишган.

Фильмда кўплаб машҳур санъаткорлар, актёрлар эпизодик кичик ролларда суратга тушишган. Жумладан, Ўзбекистон Халқ артистлари Ғуломжон Ёқубов, Озодбек Назарбеков, Гулсанам Мамазоитова, Эркин Комилов ва бошқалар...

Фильм воқеалари қишлоқда бўлиб ўтади.

Фильмнинг премьераси 18 ноябрда бўлиб ўтиши режалаштирилган.

Фильмни кўрмаганлигимиз учун ҳам, ҳозирча фильм ҳақида бирор фикр билдиришдан йироқмиз. Сабаби, фильм монтажда қайта туғилади, дубляж эса, уни янада сайқаллайди.

Ишчи жараённи кўриш билан, фильм ва унда иштирок этганларнинг ижро маҳорати ҳақида аниқ хулоса чиқариб бўлмайди, назаримизда.