FATTOHHON.COM

- Концерт қўйгани таклиф қилишганида, буни қандай қабул қилдингиз?

Митхун Чакраборти:  - Албатта хурсанд бўлдим.

- Ҳинд кинофильмларини бошини кўргандаёқ, уларнинг қандай якунланиши кўпинча маълум бўлади. Бирор фильм йўқки, қиз ва йигит севишиб қолиб, кейин севгисига уруш-жанжаллар, қон тўкишларсиз етишмаган бўлса. Нима учун доим шундай? Сиз шахсан актёр сифатида, шундай ролларга эътироз билдирган бўлармидингиз? Умуман бугунги кунда шундай роллар, сценарийлар ҳинд киноактёрларининг назарида қандай баҳоланади?

Митхун Чакраборти: - Ҳақиқат ҳамиша ютиб чиқади ва ютиб чиқиши ҳам керак. Шунингдек, муҳаббат ҳам ҳамиша ғолиб чиқиши керак. Энди саволингизга келсак, масалан турмуш ўртоғи билан яхши ҳаёт кечиришни, ҳамиша ҳаётида муҳаббат бўлишини, абадий давом этишини истайди. Бошқа ҳинд актёрлари ҳам, ҳамиша яхшилик ютиб чиқишини истайдилар. Фильмнинг сценарийсига келсак, томошабинлар доим шу фильмда ҳақиқат ютадиган бўлса, хурсанд бўлиб чиқиб кетадилар. Менимча, сценарий ўзгарадими, ёки бошқа ҳол юз берадими, барибир ҳақиқат ва муҳаббат ютиб чиқиши керак.

- Катта ўғлингиз Мимох актёр, қолган фарзандларингиз қайси касбларни танлашган?

Митхун Чакраборти:  - Иккинчи ўғлимнинг исми Умеш, у 21 ёшда! Ўзининг камераси билан бир фильм яратган эди, бу фильми билан Канадада бўлиб ўтган Халқаро кинофестивалда ғолиб бўлди! Учинчи ўғлим ҳам актёрлик санъатини танлаган. Қизим эса ҳали ёш, гоҳида дизайнер, гоҳида қўшиқчи бўламан, дейди. Мен буни унинг ўзига қўйиб бераман. (кулиб) Бахтлиман! Лекин, ўзимни ҳали ҳам бўйдоқ деб ҳисоблайман. Лекин, уйланган бахтли бўйдоқ деб ҳисоблайман!

-Қайси спорт турлари билан шуғулланасиз ва қайси спорт турларини ёқтирасиз?

Митхун Чакраборти:  - Ёшлигимда курашчи бўлганман, кейин ўзимизнинг миллий курашга ҳам қатнашганман. Жанговар спорт турларига ҳам қатнашганман. Энг яхши кўрган ўйиним, албатта футбол! “Барселона” энг яхши кўрган жамоам.

-Кўплаб ҳинд кинорежиссёрлари билан ишлагансиз, уларнинг қай бирига биринчи ўринда деб биласиз?

Митхун Чакраборти:  - Мен продюсер танламайман, “Игл фильмс” компанияси билан кўп ишлаганман. Яна “Саманта фильмс” билан! Агар фильмдаги роль яхши бўлса, ўша ижодкорлар билан ишлайман.

-Кўп фильмларда суратга тушгансиз, айнан қайси фильмда ўзингизни ўйнагансиз, кўпроқ ўзингизни олиб чиққансиз?

Митхун Чакраборти:  - Менинг ҳаётим жуда қизиқ ва шу кунгача 300 дан ортиқ фильмларда роль ижро қилган бўлсам, ўз ҳаётимга ўхшаш бирор бир эпизодни кўрмаганман. Лекин, менинг ролимни ҳам бошқа инсон ижро эта олмайди. Актёрнинг ҳаётида яхши фильмлар ҳам, ёмон фильмлар ҳам бўлади. Ёмон фильмларни эслаб қолиш керак, чунки улар келгусида яхши ижод қилишингиз учун ёрдам беради.

-Сиз профессионал актёрсиз, сизни ролга таклиф қилишди ва сценарийда сизнинг ролингизда сўз йўқ. Сиздан ўзингиз имровизация қилиб, бирор нарса айтиб юборишингизни сўрашди. Шундай ҳолат бўлганми?

Митхун Чакраборти:  - Бу бўлиши мумкин бўлган воқеа. Ҳар доим сценарийни олганингиздан кейин, балки ўз ҳаётингиздан, балки ҳаётдан бошқа бир ҳодисаларни шу фильмга киритишларини продюсерга фақат таклиф қилиб кўрасиз. Агар сизнинг таклифингизни маъқул кўрса, албатта ўша ҳодисаларни қўшиши мумкин. Бу учраб турадиган ҳолат.

-Бизда хонандалар учун Консерватория бор, актёрлар учун эса Санъат ва маданият институти! Сизларда Болливудда-чи? Актёр бўлишни истаганлар учун қандай ўқув масканлари бор? Шунингдек, бир гап ҳам эшитгандим. Болливудда актрисаларни пробада йиғлатиб кўришар экан. Қайси қиз чиройли йиғласа, ўша келажаги порлоқ актриса ҳисобланар экан. Шу гап ростми?

Митхун Чакраборти: - Биринчи саволингизга келсак, мен ўзим икки йиллик фильм-телеведения курсларини тугатганман. Ундан кейин, бир театр гуруҳида ҳам ишлаганман. Кўпинча актёрлар ҳам бирор курс ёки ўқув юртиини тугатишган бўлишади. Лекин, иккинчи саволингизга келсак, бу нотўғри, чунки актрисада, менимча, юмор бўлиши керак, бунинг учун уни йиғлатишга ҳожат йўқ. Бу саволга Умеш Меҳра жавоб берсалар яхшироқ бўлади, деган фикрдаман.

Умеш Меҳра продюсер: - Биринчи навбатда билишим керак, у актриса нима учун йиғлади? Эмоционал роль учун йиғладими ёки бошқа нарсагами? Продюсер сифатида шуни тушунишим керак!

-Бизда актрисаларни кўпинча ёши ва ташқи кўринишига қарашади. Болливудда-чи, қайси жиҳатига қараб, актрисалар танланади?

Умеш Меҳра продюсер: - Актёр ёки актриса бўладими, биринчи навбатда бирор ўқув юрти, курсни тугатган бўлмаса, мен унга таклиф бермасдим. Кастинг вақтида асосан, уч жиҳат ҳисобга олинади: биринчи навбатда ўзини кўрсата олиш, рақсга тушиш маҳорати бўлиши керак ва бирор ўқув юртиини тамомлаган бўлиши керак. 

Шунингдек, матбуот анжумани давомида, Умеш Меҳрага ҳам, алоҳида савол билан мурожаат қилишди, яъни, бундан кўп йиллар аввал у Латиф Файзиев билан биргаликда суратга олган “Алибобо ва 40 қароқчи” фильмини янги минг йилликда ҳам суратга олиши мумкинми? Кўриниб турибдики, Чакрабортилар оиласи, бу фильмда бош ролларни ижро қилиш учун энг муносибларидир.

 Умеш Меҳра продюсер: - Албатта, бундай савол аввал ҳам бўлган. “Алибобо ва 40 қароқчи” халқаро масштабдаги катта қадам эди! Бу фильмда жуда катта муваффақият қозонган! Бу тажрибани яна қайтариш мумкин, Лекин, бунинг учун Ўзбекистон ҳукумати ва халқининг қўллаб-қувватлаши зарур, шунингдек, албатта Латиф Файзиев даражасидаги продюсер ҳам керак. Шундагина бу лойиҳага киришиш мумкин. Албатта, Митхун Чакраборти ва унинг ўғли Мимох шубҳасиз, бу фильмда роль ижро қилишни рад этмайдилар. Албатта, янги технологиялар ёрдамида биз биргаликда ажойиб фильм яратишимиз мумкин.

Матбуот анжуманида, Мимохга ҳам алоҳида саволлар берилди.

-Санъат соҳасидаги инсонларнинг фарзандларига бир жиҳатдан қийинки, бирор муваффақиятга ўзинг эришганингда ҳам, ота-онаси ёрдам берган, дейишади. Сенда қандай бўлган?

Мимох: - Бизда ҳам шундай фикрлар бўлади. Лекин, мен шуни айтишим керакки, менинг ёшлигим тилладан бўлмаган, осонлик билан ўтмаган!

Шу ўринда, бу саволга Митхун Чакрабортининг ўзи ҳам жавоб қайтаришни маъқул топди.

Митхун Чакраборти: - Машҳур оиладан келиб чиққандан кейин, аҳоли орасида турли гаплар юради. Лекин, фарзандларингиз ўзлари ҳоҳлаган йўлни танлашлари керак! Мен Мимох шу йўлни танлаганида, айтган гапим шу бўлган: “Сен шу йўлни танладинг! Бу эса, жуда катта кураш! Шу курашни юта оладиган бўлсанг, бу йўлга киргин!” деб маслаҳат берганман! Ўғлимнинг ижод йўли ҳақида айтсам, биринчи фильми яхши чиқмаган! Ролни яхши ижро эта олмаган! Лекин, иккинчи фильми муваффақиятли чиқди! Кейинги фильмлари ҳам яхши чиқа бошлади ва унга омад кулиб боқди! Лекин, Мимох бирор фильмда роль ижро қилиш учун таклиф қилинса, ҳамма қатори кастингда навбатда туради! Мен ҳеч қачон унинг отаси сифатида продюсерларга қўнғироқ қилиб, “ўғлим боради, кўргин, ролга олгин” демаганман! Бошқалар қатори навбатда туриб, кастинглардан ўтиб, меҳнат қилиб, ўша ролни олади! Фильм индустрияси бу кураш! Ўғлим ҳам, ўз ҳаёт ва ижоди учун кураш олиб боряпти! Лекин, мен ҳар доим унинг ортида керакли маслаҳатлар бериб тураман, актёр сифатида эмас, отаси сифатида! Масалан, Риши Капурни олсангиз, у отасининг қўллаб-қувватлашисиз, ўз истеъдоди ва меҳнати билан муваффақиятга эришган. Ўйлайманки, ўғлим Мимох ҳам, менинг фамилиямсиз ҳам, муваффақиятларга эришадиган кунлар келади. Яна бир масала, сиз роль ижро қилаётганда фақат сиз ва камера бўлади! аудитория ва камера бўлади! Бундай пайтда ҳеч қандай ота-она, ҳеч ким сизга ёрдам бера олмайди! Бу сизнинг ҳаётингиз ва сиз шу билан яшашингиз керак!

Матбуот анжумани якунида “Шаяна фарм” компанияси раҳбари Ашок Кумар Тварига ҳам сўз берилди. У киши, бундан 11 йил аввал Ўзбекистонга келиб ўз меҳнат фаолиятини бошлаганда, ўзбек халқи уни “Жимми келди” деб кутиб олиб, ёрдам қилганлигини алоҳида таъкидлаб ўтди. Ўшанда дилида Митхун Чакраборти ва ўзбек халқига нисбатан катта ҳурмат пайдо бўлганлигини, вақти келиб имконият бўлса, албатта Митхун Чакраборти яъни ўша “Жимми”ни Ўзбекистонга, Тошкентга таклиф қилишни чин дилдан ният қилгани ва бугун ўша нияти амалга ошганлигидан бахтиёр эканлигини айтди. Яъни, “Мафтун наво” ўзбек компанияси билан биргаликда Митхун Чакрабортининг Ўзбекистонга ташрифини амалга оширганликларини айтиб ўтди.

Шунингдек, Ашок Кумар Твари ўзбек халқи анъаналарини ҳам ҳурмат қилишини ва яқинда тақдир тақозоси билан йўлда ўғилли бўлганлиги ва унга ўзбекча Йўлчивой, деб исм қўйганлигини ҳам билдирди.

Митхун Чакраборти ҳам, матбуот анжумани якунида, бу матбуот анжумани унга жуда ҳам маъқул бўлганлигини, унга ҳаётий саволлар берилганлигини айтиб ўтди.

Саида Вахобова

Феруза Фаттохова