FATTOHHON.COM

ДИЗАЙНЕР ДИЛДОРА ҚОСИМОВАДАН ТЕАТРЛАШТИРИЛГАН ШОУ! ЛИБОСЛАР НАМОЙИШИ ҲАҚИДА МАШҲУРЛАР ФИКРЛАРИ! БАТАФСИЛ! 29.11.2014 01:36

 

Дилдора Қосимова ўз услуби билан барчанинг эътиборида бўлган, ўз ишларини кўп марталаб намойиш қилиб келаётган дизайнерлардан бири бўлиб, унинг навбатдаги янги куз/қиш коллекцияси ҳам, барчанинг олқишига сазовор бўлди!

Коллекция намойиши пойтахтимиздаги бизнес-марказлардан бирида бўлиб ўтди.

Намойишда меҳмон сифатида кўплаб шоу бизнес оламининг машҳур вакиллари ташриф буюришди. Жумладан, Ўзбекистон Халқ артистлари Зулайҳо Бойхонова, Гулсанам Мамазоитова, хонандалар Шахзода, Нилуфар Усмонова, Динейра, Сардор Раҳимхон, Юлдуз Турдиева, Дилсўз, Амира Алибекова, Тамила, актрисалар Ҳалима Ибрагимова, Шахзода Матчонова ва бошқалар...

Дилдора Қосимованинг ҳаяжонланаётгани билиниб турарди.

Ниҳоят, намойиш бошланди. Авваламбор, ҳаммани подиум бошида мусиқа созини берилиб чалаётган созанда аёл тортди. У энг романтик фильмлардан бўлган “Ромео ва Жульетта” фильми мусиқасини чаларди. Созанда намойиш якунига қадар подиумни тарк этмади.

 Саҳнада миллий матоларимиздан тикилган либосларда бирин-кетин моделлар намоён бўлишди.

Уларнинг эгнидаги либослар барчанинг эътиборини тортди. Енгил, нафис, миллийлик ва замонавийликни ўзида уйғунлаштирган либослар чиндан ҳам ажойиб эди...

Барча ўзига ёққан моделларни қўл телефонларига муҳрлашди!

Барча либослар намойиш қилиб бўлингач, саҳнага Дилдора Қосимованинг ўзи чиқиб келди ва табрикларни қабул қилиб бўлгач, барчага миннатдорчилик билдирар экан, ҳаяжондан бир зум гапира олмай ҳам қолди.

Сўнг, сўзини давом эттириб, бу намойиш бошқалардан фарқ қилишини, намойишнинг иккинчи қисми ҳам бўлиб, у атайлаб кундалик кунларда кийиш учун ҳам либослар яратганлигини айтиб ўтди, ҳамда барчани иккинчи қисмни ҳам кўришга чорлади.

Намойишнинг иккинчи қисми янада қизиқарли бўлди. Французча пантомима билан уйғунлашган, театрлаштирилган бу намойишда, моделлар кундалик кунларда кийишга мос бўлган либосларни намойиш қилишди! Уларнинг антиқа бош кийимлари кўпчиликнинг эътиборини тортди. Барча моделлар иккинчи қисм якунида ташқари чиқиб, эшик ёнига тўпланишди ва гўёки ичкарига қайта киришга уринаётгандек ҳаракат қилишди. Ниҳоят, эшик очилиб, улар яна подиумга чиқиб келишди.

Шуни айтиб ўтиш керакки, намойишда фақат аёллар либослари намойиш қилинди.

Намойиш якунида барча моделлар саҳнада тўпланишгач, Дилдора Қосимова ҳам табрикларни қабул қилар экан, табрик учун сўз барчанинг севимли хонандаси Шахзодага берилди.

Шахзода эса, Дилдорани самимий табриклаб (ВИДЕОГА ЎТИШ) унга келгуси либослар намойишинг Парижда бўлсин, деб ният билдирди!

Шундан сўнг, Шахзода ўзининг бир қатор хит қўшиқларидан куйлади. Барча рақсга тушди!

Театрлаштирилган ҳолда ташкил этилган намойиш жуда ҳам кўнгилли ўтди! Албатта, уни саҳналаштиришда режиссёр Маргарита Доромейчукнинг хизмати  катта бўлди! Намойишда барчада катта таассурот қолдирди!

 

 

Хонанда Шахзода: - Менга Дилдора Қосимовани миллийлик ва замонавийликни уйғунлаштира олиши жуда ҳам ёқади! Дилдора учун, унинг либосларида фотосессияни амалга оширган вақтимда ҳам, кўп либосларини кўргандим. Аммо, бугунги намойишда  кўпчилик либослар мен учун ҳам кутилмаган янгилик бўлди! Айниқса, иккинчи қисмдаги бош кийимлари жуда ҳам чиройли! Дилдорани янада омадли ва муваффақиятли намойишлар ўтказишига тилакдошман! Бугунги намойишдаги ҳамма либослар менга манзур бўлди, ҳеч бирини алоҳида танлаб ажрата олмайман, чунки ҳаммаси ажойиб!

Хонанда Нилуфар Усмонова: - Намойиш аъло даражада! Ўйлайманки, Дилдора бу йил ўзини ўзи сакраб ўтди! Чунки, инсоннинг рақобатчиси, авваламбор, ўзи билан ўзи! Мана шу рақобатни бугун у 10 чандон енгиб ўтди, деб ай        та оламан! Деярли ҳамма либослари менга ёқди! Биринчи намойиш қилинган коллекциядаги чопонлар, миллий элементларга эга либосларни биз доим киямиз, кундалик кун учун яратилган либослари эса, ҳақиқий янгилик бўлди! Намойишга таклиф учун катта раҳмат!

Хонанда Динейра: - Менга бу либослар намойиши жуда ҳам манзур бўлди! Уни яхши ўтади, деб ўйлагандим, лекин тўғри маънода бунчалик даражада бўлади, деб кутмагандим! Айниқса, театрлаштирилганлиги ажойиб бўлди, бу шунчаки намойиш эмас, ҳақиқий шоу бўлди! Моделларнинг ўзини тутиши, ижро маҳорати ва айниқса, либослар жуда ажойиб! Биринчи қисмда намойиш қилинган либослар миллий элементларга эга ва менга жуда ҳам манзур бўлди. Иккинчи қисмдаги либосларни эса, кундалик кунда ҳам кийиш мумкин. Менимча, Дилдоранинг ижоди янада ривожланмоқда, унда ижодий ўсиш, юқорилашни кўряпман. Унинг либослари эса, янада оммалашиб бормоқда! Унга самимий, омад, муваффақият тилайман!

Актриса Шахзода Матчонова: - Бу галги намойишда менга намойиш қилинган барча либослар ёқди. Одатда, либослар намойишларини кўрганимда, улардан камдан кам нарсалар ёқарди. Лекин, Дилдора Қосимова намойишининг менга иккала қисмидаги ҳамма либослар манзур бўлди. Агар имкони бўлганида, (кулиб) барчасини сотиб олган бўлардим! Мен учун шахсан намойишнинг иккинчи француз услубидаги қисми янгилик бўлди, бу либослар чиндан ҳам ажойиб, қолаверса, кундалик кунда кийиш учун ҳам, бир вақтнинг ўзида ҳам оддий, ҳам ҳашамдор кўринишга эга! Дилдора Қосимовани бу муваффақият билан табриклайман!

Актриса Ҳалима Иброҳимова: - Дилдора Қосимованинг либослар коллекцияларига ўзи ҳар доим ишқибоз бўлганман. (самимий кулиб) Бугун “Дилдора сал тўлароқ, дўмбоқ қизларга ҳам у-бу нарса тиккин” дейиш учун келгандим. Лекин, либослар намойишини кўриб, бундай дейиш шарт эмаслигини тушундим! Чунки, ҳозир кенг нарсалар урфга кирган! Либосларнинг кўплари кенг, бизбоп экан! Дилдорага омад тилайман! Катта-катта подиумларда либослари намойиш қилиниб, Ўзбекистон байроғини баландга кўтаришини ҳоҳлайман! Миллий атлас-адрасларимизни бутун дунё кўришини ва бизга ҳавас қилишини истайман!

Даврон Муқимов “Тарона” студияси директори: - Концертлар ташкилотчиси сифатида, мен одатда намойиш ва тадбирларга бошқача назар билан қарайман. Бу намойишга қойил қолган жиҳатим, барчаси аниқ ўйланган, масалан, иккинчи қисмда эшиклар очилишигача! Биринчи қисм тугаганда, кўпчилик намойиш тугади, деб ўйлаганди. Чунки, оддий намойишларда шундай бўлади. Аммо, бу намойишда иккинчи қисм бўлди ва бу ҳам менга жуда ёқди! Шунингдек, либослар намойиши вақтида янграган мусиқалар ҳам, либослар билан ниҳоятда уйғунлашган. Дилдора Қосимова юқори дидга эга дизайнер, намойиш ҳам аъло даражада ўтди! Ўйлайманки, 2015 йил либосларида нималар мода бўлса, бугунги намойишда ҳаммасини кўрдик! Дилдорага фақат омад!

Хонанда Миржамол Мирзааҳмедов: - Дилдора Қосимованинг янги либослар намойишида, менга энг ёққан жиҳати, ўзбек миллий матоларидан евро кўринишда жуда ҳам чиройли либослар намойиш қилинди! Бу либосларни рафиқам учун ҳам, қолаверса, бугунги намойишга кела олмаган ҳамкасбларимга кўрсатиш учун ҳам, қўл телефонига суратга тушириб олдим. Бундан ташқари, менга пантомима номери ёқди, режиссёрлик иши таҳсинга сазовор! Намойиш жуда ҳам чиройли ва кайфиятни кўтарадиган, аъло даражада ўтди. Фурсатдан фойдаланиб, Дилдора Қосимовага омад тилайман, ҳар доим янги-янги ижод намуналарини халқимизга, омма эътиборига ҳавола этаверсинлар! Ажойиб намойиш учун раҳмат!

 

Дизайнер Дилдора Қосимова: - Мен бу намойишга жуда узоқ тайёргарлик кўрдим, шунинг учун бўлса керак, ҳаяжон тарк этмади! Жуда ҳам ҳаяжонландим! Ҳаммага манзур бўлганлигидан хурсандман. Биз бу намойишга оддий ёндошмадик, имкон қадар ноодатий бўлишига интилдик! Тайёргарлик учун 5 ойдан ортиқроқ вақт кетди, ҳаммаси тайёр бўлгач, албатта, ўз ғояларимни, барча билан бўлишгим келди! Намойиш нима учун икки қисмдан иборат бўлди? Чунки, одатда менинг либосларим ҳашамдор ва уларни асосан, турли оқшомлар, тадбирларга кийиш мумкин! Мен эса, ўз ишимга бошқа тарафлама ҳам ёндошгим келди. Натижада, кундалик кун учун кийиладиган либослар ҳам яратдим ва уларни иккинчи қисмда намойиш қилдим! Биринчи қисмда 27 та либос намойиш қилинган бўлса, иккинчи қисмда 12 та либос намойиш қилинди! Менга яқиндан ёрдам берган барча инсонларга миннатдорчилик билдираман!

 

Саида Вахобова

Феруза Фаттохова