FATTOHHON.COM
« Все новости
Режиссёр Саид Мухторовнинг “Аланга” фильмини дубляж ишлари якунланди.
Фильм тарбиявий аҳамиятга эга бўлиб, унда айрим кутилмаганда бошига бахт қуши қўниб, бойликка эришган инсонларни, “Кўрмаганнинг кўргани қурсин” мақолига хос ҳолда, ҳаттоки жигарчиликни ва ўзига яхшилик қилган инсонларни ҳам унутиб юборишлари, ҳаққоний кўрсатиб берилган.
Фильмда бош қаҳрамонлардан бири Содиқ ролини актёр Камолиддин Қосимов ижро этди. Камолиддин Қосимов шу кунгача “Имкон”, “Гирдоб”, “Суперкуёв”, “Кундош” фильмларида турли ролларни ижро қилган. “Аланга” фильмидаги роль унинг илк бош ролидир.
- Нима деб ўйлайсиз, сизнинг образингиздан томошабин ўзи учун нима олиши мумкин?
- Одатда, томошабинлар фильмни, ундаги ролни кўриб хулоса чиқарадилар. Менинг образим, баъзи ўзининг босар-тусарини билолмай, ўзини боса олмай қолган, тез келган бойликдан ўзини йўқотиб қўйган, ўзини босолмай, оиласини, ўзининг туғишганларини унутиб қўйган, яқин дўстларини менсимай юрган инсонларни юзига ойна тутади, деб ўйлайман. Мен шундай манман инсонларни ўз ролим орқали очиб беришга ҳаракат қилдим. Чунки, кеча-кундузда шундай инсонлар жуда ҳам кўп. Санашга бармоқ ҳам етмайди. Бойлик кўзини кўр қилиб қўйган, ҳовли-жой, молу мулкни туғишганидан афзал билади, бошқа ҳеч нарсани кўрмайди! Мана шундай инсонлар “Аланга” фильмидаги ролимни кўриб, қаҳрамонимнинг ҳаракатлари уларга оз бўлса ҳам таъсир қилиб, бироз бўлса ҳам ижобий тарафга ўзгаришса, сал бўлса ҳам меҳр-оқибат тушунчаларини тушуниб ета бошласалар, мен ўз мақсадимга эришдим, деб ҳисоблайман.
- Ролингизни ўзингиз учун энг қийин бўлган жиҳатлари?
- Менинг қаҳрамонимнинг ўта бир ноҳақлик қиладиган эпизоди бор. Агар бу ҳақида очиқроқ гапирсам, фильмнинг мазмунини ошкор қилиб қўйишим мумкин. Лекин, бу саҳна инсонийлик туйғулари билан боғлиқ бўлиб, мен учун жуда ҳам оғир бўлди! Фильмнинг айрим сюжетлари ҳаётдаги реал воқеалардан олинган. Мен ижро қилган саҳна ҳам, ҳаётда бўлган экан... Тўғриси, қандай қилиб, ўша инсон, яъни мени қаҳрамонимнинг прототипи бу ишни қилганлигидан ҳайронман. Бу саҳнадаги ноҳақликни амалга ошириш учун инсон ўта худбин ва бағритош бўлиши керак, назаримда. Афсуски, ҳаётда шундай инсонлар бор. Мен эса, ҳаётда бунчалик бағритош эмасман, балки шунинг учун ҳам, бу саҳнани ижро қилишим жуда ҳам ўзим учун қийин бўлди! Ўзимни ўша ҳаётдаги прототипнинг ўрнига қўйиб кўришга ҳаракат қилдим. Билмадим, мен ўзим ҳаётда шундай вазиятга тушсам, шундай қила олармидим? Менимча, йўқ! Мен шошилинч қарор чиқармай, аввал ўйлаб, кейин иш қилган бўлардим!
- Бошқа соҳа вакили экансиз, кино оламига кириб келишингизга нима сабаб бўлди?
- Кинога ёшлигимдан қизиқардим. Лекин, бошқа соҳада фаолият юритишимга тўғри келди. Аммо, вақт ўтиши билан барибир, кино олами, мени ўзига оҳанграбодек тортиб олди! Режиссёр Саид Мухторов менга устозлик қилди. Сўнг, кичикроқ ролга таклиф қилдилар. Ишончларини оқладим шекилли, кейин яна бошқа ролларга ҳам таклифлар бўла бошлади. Шу кунгача бир неча фильмларда роллар ижро этдим.
- “Аланга” фильмида режиссёр Саид Мухторов билан яна биргаликда ишлай қандай бўлди? Қолаверса, бу илк бош ролингиз бўлгани учун ҳам, сиздан катта масъулият талаб қилганлиги аниқ. Режиссёр Саид Мухторов-чи? Сизнинг ролингиздан қониқдими?
- (самимий) Режиссёр Саид Мухторов билан ишлаш жуда қийин! Чунки, у киши характерли инсон, жуда ҳам талабчан ижодкор! Сизга ролни тушунтириб бераётганда беихтиёр ўша қаҳрамонни ўзи ижро этиб юбораётгандек бўлади. Ролингизнинг мазмун-моҳиятини, характери ва ҳолатини, тўлиқ, мукаммал тушунтириб беради. Кейин эса, ўша ролни чиқариб бермагунингизча қўймайди! Баъзи режиссёрлар ролни осонгина, “мана буни, буни қил” деб, суратга олиб ташлайверади. Саид ака эса, ундай эмас! Ўша ролни чиқариб бермагунингизча, қўймай, керак бўлса, йиғлатишгача боради! Ўша актёрни образ ҳолатига киргазиб, ўзига керакли ролни чиқариб олади.
- Бу фильмда актёр Улуғбек Қодиров билан партнёр сифатида роль ижро қилдингиз. Фильм сюжети бўйича ҳам дўст, ҳам душмансизлар. Улуғбек Қодиров билан роль ижро қилиш қандай кечди?
- Улуғбек Қодиров маҳоратли актёр. У мени қаҳрамонимга қайсидир маънода рақиб. Ҳаётда эса, Улуғбек Қодиров яхши инсон. У билан бирга роль ижро қилиш қийин кечмади. Ўз қаҳрамони ҳолатини бир зумда чиқариб бера олади.
- Биринчи бош роль ва яна айнан салбий қаҳрамон экан. Томошабинлар сизни ёмон кўриб қолишларидан чўчимадингизми?
- Биласизми, менинг қаҳрамоним ўта салбий қаҳрамон эмас! У жиддий, характерли образ, деб ўйлайман. Агар томошабинлар бу ролдан кейин мени ёмон кўриб қолишса, демак, мен ўз ролимни маромига етказган бўламан ва бу актёр учун катта ютуқ, деб ўйлайман. Мен ўз ёшимга мос қаҳрамон ролини ижро қилишга ҳаракат қилдим. Ёшимга муносиб бўлмаган равишда севиб қоладиган, томошабиннинг ғашини келтирадиган ёки ёшимга ярашмаган бачкана бир қаҳрамон яратганим йўқ, деб ўйлайман! Қолаверса, менимча, ҳақиқий актёр ижобий ёки салбий деб, роль танлаб ўтирмаслиги керак. Агар ўша қаҳрамонни юракдан ижро қилса, ҳаттоки салбий қаҳрамонга ҳам томошабинлар меҳр қўйиб қолишлари мумкин. Ёки, ўша салбий қаҳрамоннинг ҳолати уларга сабоқ бўлиб, ўзларига яхши хулоса чиқаришлари ҳам мумкин. Менинг қаҳрамонимни қай даражада салбий ва ижобий жиҳатлари борлигига эса, фильм экранга чиққач, томошабинлар баҳо берадилар, деб ўйлайман.
- Айнан шу фильмнинг ўзи, ролингиз, суратга олиш жараёнлари, режиссёр Саид Мухторов билан биргаликда ишлаш, сизга нима бера олади?
- “Аланга” устозим режиссёр Саид Мухтор бошчилигида суратга олинди. Ролимни суратга олиш жараёнлари менга жуда ҳам кўп нарса берди! Маънавий, тарбиявий тарафдан таъсири катта бўлди, деб ўйлайман. Яна шуни айтишим мумкинки, бу фильм катта экранларга чиққанда, “кўзлари кўр” яъни рамзий маънодаги “кўр”, бойлик ва манманлик кўзини кўр қилиб қўйган, меҳр кўзларини парда қоплаган инсонлар, бу фильмни кўриб, маънавий тарафлама кўп нарса тушунишлари ва олишлари мумкин, назаримда.
Саида Вахобова
