FATTOHHON.COM

“ТИЛИМ ҚУРСИН” ФИЛЬМ ПРЕМЬЕРАСИДАН! 18.01.2013 12:07

18 январь куни соат 17.00 да “Киночилар уйи”да “Замин фильм” студиясининг навбатдаги янги фильми бўлган, режиссёр Жаҳонгир Аҳмедовнинг “Тилим қурсин” фильмининг премьераси бўлиб ўтди.

Киноижодкорларни саҳнага таклиф қилишдан аввал, актёр, режиссёр ва хонандаАлишер Узоқов ҳамда, Нилуфар “Тилим қурсин” фильми учун тайёрланган саундтрек қўшиқни саҳнада куйлаб беришди.

Шундан сўнг, “Тилим қурсин” фильмининг ижодий гуруҳи саҳнага таклиф қилиндилар.

Фильм режиссёри: Жаҳонгир Аҳмедов

Бош ролларда: Матёқуб Матчонов, Шоҳида Узоқова, Севара Солиева, Асқар Ҳикматов

Шунингдек, ролларда Муҳаммадисо Абдулхаиров, Дилбар Икромова, Доно Бобохонова, Иброҳим Аҳмедов (Гранд радиоси бош муҳаррири) ва бошқалар...

Ижодкорлар таништирилгач, фильм режиссёри Жаҳонгир Аҳмедовга сўз берилди.

Режиссёр Жаҳонгир Аҳмедов “ҳамма режиссёрлар премьерада, ўз ижодий гуруҳидан съёмка вақтида койигани учун узр сўрайди. Мен эса, бирор марта узр сўрамабман. Мана бугун сўрайман” деб, узр сўради ва “тилим қурсин” деб қўшимча ҳам қилиб ўтди.

Фильм намойиши бошланди.

Фильм комедия жанрида суратга олинган бўлиб, унда ҳаётда учраб турадиган ҳолатлар комедик тарзда кўрсатиб берилган. Масалан, ёлғончи ва ишни чўзадиган усталар, қуда тарафни алдаб, бойликни кўзлаб ўғил уйлантирмоқчи бўлаётган совчилар, ота-онасини алдаб, бирор йигит билан учрашишларини яширадиган қизлар, эрини алдаб пул оладиган аёллар, ўз дўстига панд берганлар...

Фильм воқеалари ҳаммаси биргина чойга боғлаб кўрсатилган ва бироз эртакона дейиш ҳам мумкин. Чунки, ўша чойдан ичганлар, фильм сюжети бўйича фақат ва фақат ҳақиқатни айтадилар, натижада ўз айбларини битта қолдирмай гапириб берадилар.

Фильм тарбиявий аҳамиятга ҳам эга бўлиб, бу билан барибир ёлғон эртами кечми фош бўлиши ҳақида билдирилади.

Албатта, актёрлар ансамбли ўз ролларини ишонарли ижро қилишган.

Фильм тугагач, баъзи ҳамкасбларимиз томонидан “агар фильмдаги чойдан бўлгандами, шоу бизнесда баъзиларга ичириб, бир интервью олган бўлардик” деган фикрлар ҳам билдириб ўтилди)))))

Хуллас, минг марта эшитгандан бир марта кўрган афзал дегандек...