FATTOHHON.COM

МАДАНИЯТ ВАЗИРИНИНГ БИРИНЧИ ЎРИНБОСАРИ ОЗОДБЕК НАЗАРБЕКОВ СИРДАРЁ ВИЛОЯТИДА! 24.02.2019 00:16

Маданият вазирининг биринчи ўринбосари Озодбек Назарбеков 23 февраль куни Сирдарё вилояти Боёвут туманида жойлашган Мусиқа ва санъат мактабида бўлиб, ёш истеъдод эгалари билан учрашув ва маҳорат дарслари ўтказди. Ўтказилган маҳорат дарслари кўтаринки руҳда бошланиб, мусиқа ва санъат мактаби ўқувчиларида бир олам таассуротлар қолдирди.

 

Озодбек Назарбековнинг ёшларни мусиқа ва санъат мактабида етарли даражада мукаммал билим олишлари учун зарурий шароитларни янада яхшилаш борасидаги жон куйдиришлари, ўқувчиларнинг саволларига жавоб қайтариб, зарурий маслаҳатлар берганлиги, улар билан бирга куйлаб, қўллаб-қувватлашлари, ёшларда мусиқа ва санъат соҳасига қизиқишни янада оширди.

Таълимга қаратилган бугунги юксак эътибор келажакка қўйилган сармоядир. Шунинг учун ҳам, юртимиз таълим масканларидаги ўғил-қизларнинг тўлақонли таҳсил олиб, баркамол авлод бўлиб вояга етишлари учун кенг қамровли ишлар амалга оширилмоқда. Жумладан, Республикамиздаги болалар мусиқа ва санъат мактабларида ёшларнинг истеъдодини янада ривожлантириш, уларни янги асарлар билан таништириш, миллий мумтоз мусиқа намуналаридан баҳраманд этиш, ижро маҳоратини ошириш, ҳамда, оммавий-маърифий тадбирларда истеъдодли ёшлар билан санъаткорлар ўртасида ижодий ҳамкорликни мустаҳкамлаш мақсадида, ижодий учрашув ва маҳорат дарслари мунтазам равишда ўтказилиб келинмоқда.

Ёшларга билдирилаётган юксак ишонч, ҳамда бундай ижодий учрашув ва маҳорат дарсларининг ўтказилиши, бугунги ўсиб келаётган ёшлар қалбида мусиқа ва санъатга бўлган қизиқишни янада кучайтириб, келажакда юртимизга муносиб авлод бўлиб етишишлари, маданият ва санъат соҳасининг етук мутахассиси бўлиб, келажакда ўзлари танлаган касбда муваффақият қозонишларига туртки бўлиши шубҳасиз.  Келажакда бу  истеъдодли, интилувчан ёшлардан Ватанимиз довруғини оламга ёядиган санъаткорлар етишиб чиқса ажаб эмас.

Саида Вахобова