FATTOHHON.COM
« Все новости
Ойхон Ифорзода “Ёр-ёр” қўшиғига клип суратга олдирди. “Ёр-ёр” клипида миллийлик ва замонавийлик уйғунлашган бўлиб, у ноанъанавийликни ўзида намоён қилган. Клип режиссёри Сарвар Исаев, оператор Иззатилла Лутфуллаев, рассом Акмал Саидов. Клипдаги келинчак ролини Ойхоннинг синглиси Зулайҳо Ифорзода ижро этди. Клипда Ойхон Ифорзода инсон қиёфасида чиқмаганлигини таъкидлайди. Барчасига, Ойхон Ифорзоданинг ўзи ойдинлик киритди.
Ойхон Ифорзода: - “Ёр-ёр” қўшиғимга ишланган клип 7 май куни “Ўзбекфильм” павильонида суратга олинган. Клип учун павильонда 2 ҳафта давомида, 3 та махсус декорация қурилди. Ундан олдин эса, бир ой давомида, Продюсерим яъни, акам Жаҳонгир Мирзо, опам Райҳон Уласенова, онамлар, ҳамда режиссёр, оператор ва рассомлар билан биргаликда, қандай клип суратга оламиз, деган фикрда, изланишда бўлдик, қандай жанрда, трэкми, сюжет бўладими, қандай ранглар ишлатилади, барчасини яхшилаб ўйлаб чиқдик. Клипни суратга олиш ишлари кечқурун соат 20.00 да бошланиб, эрталаб 10.00 га қадар ҳеч қандай танаффуссиз суратга олинди.
Райҳон Уласенова опамлар ўша куни кундузи репетицияда, кейин кинопробада, сўнг спектаклда банд эдилар. Шунга қарамай, барча ишларидан кейин келиб, синглим Зулайҳога актёрлик маҳоратидан сабоқлар бериб, қўллаб-қувватлаб, кечаси билан ухламай ёнимда турдилар. Опам оилали инсон, ўша куни турмуш ўртоқларининг туғилган кунлари эди! Шунга қарамай, менинг илк катта клипим бўлгани учун, оиласини, фарзандларини ташлаб келиб, мени ёнимда эрталабгача қўллаб-қувватлаб, ҳам руҳан, ҳам маънан катта ёрдам бердилар. Бунинг учун улардан миннатдорман!
Синглим Зулайҳо Ифорзодани бу клипда илк бор жиддий ва катта ролда чиқиши бўлди. Ундан аввал кичкиналигида фильмларда эпизодик ролларда ва “Тож” гуруҳининг клипида суратга тушган эди. “Ёр-ёр” клипидаги келинчак роли, Зулайҳонинг илк катта дебют роли бўлди! У ҳозир 17 ёшда ва Ўзбекистон Давлат Консерваторияси қошидаги иқтидорли болалар лицейида, эстрада хонандаси йўналиши бўйича таҳсил олмоқда. Бу йил 3 курсга ўтди. У санъатга жуда қизиқади ва мусиқа мактабида пианино бўйича ҳам таҳсил олган. Ундаги актёрлик маҳоратини кўриб, биз унга Санъат ва маданият институтига киришни маслаҳат беряпмиз.
Сабаби, Зулайҳо Ифорзода “Ёр-ёр” клипидаги ролини жуда ҳам яхши, таъсирли ижро қилди, қолаверса, суратга олиш жараёнида образга кириб ростдан йиғлади, кўз ёши ҳам табиий чиқди. Қандайдир сунъий йўллардан фойдаланмади!
Сюжет қисми суратга олиб бўлингандан сўнг, кейин менинг трэкларим суратга олинди.
Клипни суратга олиш жараёнида энг қийини, бу қум билан ишлаш бўлди! Кадрлардан бирида мен оқ кўйлакда ётишим ва атрофимда қум ўйнаши керак эди. Чангдан аллергияси бўлмаган инсон бўлса ҳам, албатта чанг жойга кирганда йўталиши табиий. Мен эса шундай ҳолатда эдимки, “Камера, мотор” дегандан, то “Стоп” дегунга қадар, клип суратга олинаётган энг катта павильон чангга тўлиб кетди! Ҳаттоки, орқа эшикларни очиб шамоллатишга ҳам тўғри келди! Ана шу чангдан жуда ҳам қийналдим. Қўшиқ айтаётган, яъни менинг трэкларим суратга олинаётган вақт, қумни сачратишаётгани учун, менинг кўзларимгача кириб кетди, лекин мен камерага ишлашга мажбур эдим. Натижада клипни суратга олиш ишлари тугаганда, менинг иккала кўзларим ҳам қип-қизил бўлиб қизариб кетганди...
Клипни суратга олиш жараёнида, бутун гуруҳ учун эсдан чиқмайдиган бир воқеа ҳам бўлди. “Камера, мотор” деганидан сўнг, мен ўша қумли жойда, ётган ҳолда ўз трэкларимни куйлаётгандим, “Стоп” дейилгач, ўрнимдан турсам, қарасам камеранинг олдида ҳеч ким йўқ! Фақат Райҳон опам турибдилар, лекин улар режиссёр ва оператор эмаслар. Қарасам, ҳамма пастдаги қумни кадр учун ўйнатиш ва сачратиш билан овора, ҳаттоки режиссёр ва оператор ҳам! (самимий кулади) Улар қумларни қоқиб, чиқишгач, билсам, кадрлар статик ҳолатда суратга олинганлиги учун, камерани тўғрилаб қўйиб, ўзлари бемалол кадрни яхши чиқиши учун хизмат қилишаётган экан!
Менинг молиявий продюсерим туғишган акамлар Жаҳонгир Мирзо! Уларни, маънавий ҳамкорим ҳам, дейман. Биз бир оиламиз. Акамларга мен доим ўз ҳоҳишларимни айтаман, лекин бюджетини, қанча маблағ кетишини сўрамайман, улар ҳам айтмайдилар.
Ўзи бу клип суратга олинишидан олдин, менга 3 та қўшиқ тавсия этилганди. “Асрагин мени”, “Сен” ва “Ёр-ёр” эди. “Сен” қўшиғини бироз олдин куйлагандим, оммалашганди, лекин у сокин ва маҳзун тарона ва менинг ижодга қайтиш қўшиғим бўлганди, чунки мен маълум бир сабаб, 2 йил ижод қилмай, бироз тўхтаганлигим учун, ёрқин бир чиқишимни ҳоҳлаб, оила аъзоларим клип суратга олиш учун мана шу “Ёр-ёр” қўшиғимни танлашди! Қўшиқнинг матн муаллифи Мадинахон, аранжеровка Жасур Бадалбоев.
Клип ғояси устида ҳаммамиз бош қотирдик, ҳамма ўз ҳиссасини қўшди, десам муболаға бўлмайди! Лекин, энг катта ҳисса қўшган бу клип режиссёримиз Сарвар Исаев бўлди! Операторимиз Иззатилла Лутфуллаев ҳаммалари келишган ҳолда клип устида ишлашди. Биз ҳам деталларигача аҳамият бердик. Масалан, синглим Зулайҳо, келинчакнинг қўлидаги сўлиган гул тўғрисидаги детални қўшди. Ҳаттоки, гул олиб сўлитиб қўйган экан! Шунчалик ўз ишига масъулият билан киришганидан, ўзидан ҳам нимадирлар қўшишни истаган. Ўша гулни суратга олиш майдонига олиб келиб, “шуни ҳам қўшайлик, бу мени севган инсон томонидан берилган гул бўлади ва мен уни гербарий каби сақлаб қўйган бўлай” деб, таклиф киритди! Клипга бу деталь ҳам киритилди ва таъсирли кадр бўлди.
Шуни алоҳида таъкидлаб ўтмоқчиман, бу қўшиқни ҳам, клипни ҳам, менинг шахсий ҳаётимга ҳеч қандай алоқаси йўқ! Бу қўшиқни бошида айтганимдек, айнан ўзим, ўз ҳоҳишим билан танламадим.
Бу қўшиқ менга акам Жаҳонгир Мирзо томонидан совға қилинганди. Бу қўшиқ уларга ёққан экан! “Ёр-ёр”нинг янгича талқини, қулоққа ёқимли тарона, замонавий талқин, деб менга совға қилдилар! Шунинг учун ҳам, қўшиқ куйладим. Ўзи менинг принципларим бор эди, яъни, тўй ҳақидаги қўшиқни турмушга чиққанимдан кейин айтаман, она ҳақидаги қўшиқни она бўлгач айтаман, дегандим. Лекин, “Ёр-ёр” менга акамнинг совғаси ва қолаверса ўзимга ёққани учун ҳам куйладим. Аммо, ҳаётимга алоқаси йўқ!
Клип учун либослар борасида, синглим Зулайҳонинг либослари устида дизайнерлар Дилноза Умрзоқова, менинг эгнимдаги либослар эса, Шоҳиста Раметовага (актриса Саида Раметованинг келини) тегишли. Либослар дизайнини ўзим танладим. Бу борада жуда ҳам инжиқман ва ўзимга ёқадиган нарса чиқмагунича қўймайман! Макияж ва соч турмаклари эса, визажист Лидия Андрэ томонидан амалга оширилди.
“Ёр-ёр” клипига хос бўлган энг муҳим жиҳатни айтиб ўтмоқчиман, бу клипдаги ролимга, чиқишимга инсон сифатида қарашларини ҳоҳламайман! Бу клипда мен ўша турмушга чиқаётган ёш қизнинг қалби қиёфасида чиққанман! Агар аҳамият бериб қаралса, ўша қиз билан ҳаракатларимиз ва эмоцияларимиз боғланиб кетган! Йигит қизнинг сочларига қўл текказганида, ундаги сесканиш, менинг трэкларимдаги ҳаракатлар орқали берилган! Ҳаммаси бир-бирига боғлиқ! Атрофидаги қумларнинг сакраши, тўфон каби ҳолатлар, барчаси, ўша ёш турмушга чиқаётган қизнинг қалбида бўлаётган тўфонни акс эттирган! У қиз жим тургани билан унинг қалби дод солиб, фарёд уриб, бутун оламга сиғмаётгандек! Унинг қалби туғён уриб, ундаги ҳиссиётлар, ҳолатларни ўзида намоён қилади! Биз клипга мана шундай ноанъанавий тарзда ёндошишга ҳаракат қилганмиз! Афсуски, қўшиқ вақти чегараланган бўлганлиги учун, бошқа кадрлар клипга сиғмади...
Бу клипда иши кўп бўлишига қарамай, ёнимда мени қўллаб-қувватлаб турган опам актриса Райҳон Уласеновага, продюсерим акам Жаҳонгир Мирзога, онам ва синглимга миннатдорчилик билдираман! Бизда ҳамма иш оилавий муҳокама қилинади. Бизнинг ижодий ва ҳаётий кучимиз, энг катта бойлигимиз ҳам, бу бизнинг оиламиз!
Саида Вахобова