FATTOHHON.COM
« Все новости 
Бу концерт Манзуранинг 18 йиллик ижодида ўзига хос сарҳисоб бўлди. Шу куни унинг фан-клуб аъзолари ҳам келиб, қўллаб-қувватлаб туришди.
Концерт кунлари давомида Дилшодбек Каттабеков Манзура ва концерт меҳмонларидан ўзига хос видеорепортаж тайёрлади.
Концерт дастури 3 та блокдан иборат бўлиб, унда Манзура 5 хил либосда намоён бўлди.
Концерт декорациясига алоҳида эътибор қаратилган, аввалига саҳна фони қизил атиргулли парда бўлган бўлса, иккинчи блокдан парда кўтарилиб, зинали ва тўрида экран билан катта декорация намоён бўлди.
Концертни Манзура “Асра бахтимизни” қўшиғи билан бошлади. Сўнг, “Афсусдаман”, “Сохта туйғу” қўшиқларини ижро этгач, томошабинлар билан саломлашиб, бу концерт 18 йиллик ижодидаги балоғат ёши эканлигини айтиб ўтди ва барчага миннатдорчилик билдирди.
Сўнг, Манзура концертни “Жудаям соғиндим”, “Севги синов”, “Борсан”, “Бер Имкон”, ҳамда “Сени сени” қўшиқлари билан давом эттирди. Биринчи блокда Манзура ва унинг қўшиқларига рақсга тушган раққос, раққосалар ҳам, ўрта асрдаги Европача либосларда эдилар. Қўшиқлардан бирида ҳаттоки, селфи таёқчаси билан кўриниш ҳам амалга оширилди!
Манзура ота-онасига ҳам алоҳида эҳтиром кўрсатиб, уларни жуда яхши кўришини айтиб, болалик билан боғлиқ хотираларни ҳам эслаб ўтди ва саҳнадан тушиб, уларга гуллар ҳам тақдим қилди.
Биринчи блокдан сўнг, саҳнага “Гап йўқ” триоси таклиф қилинди. (Концертнинг биринчи кунида улар иккинчи блокдан сўнг чиқишган эди) “Гап йўқ” триосининг 3 иштирокчиси ҳозирги кун қўшиқларини ўзбек фильмларидаги эсда қоларли жумлалар билан боғлаган ҳолда, чиқиш қилишди.
Иккинчи блок, атиргулли парда кўтарилиб, Манзура “Қўғирчоқ” қўшиғини ижро қилган ҳолда бошланди. Ранг-баранг чироқлар ёғдуси порлади.
Манзура бу блок давомида “Бер дарак”, “Тасодиф эмас”, “Тушларимга кир”, “Нетай”, “”Лайли ва Мажнун”, “Мени сев”, “Ўнгимда кўрай”, “Резе-резе”, “Қизғонаман” қўшиқларини ижро этди. Шўх қўшиқлар давомида раққос ва раққосалар билан бирга рақсга ҳам тушди.
Шундан сўнг, журналист ва радиобошловчи Акмал Мирзо, “Божалар” Жаҳонгир Позилжонов ҳамда, “Миллион” жамоаси аъзоси, бошловчи ва концерт ташкилотчиси Даврон Кабулов биргаликда “эстрадага дух бағишлайдиган”)))) қўшиқлардан куйлашди. Шунингдек Сардор Мамадалиевнинг қўшиғини ўзгартирилган ҳолда, Ўзбекистон Миллий Терма жамоасига бағишлаб ижро қилишди!
Манзура учинчи блокни миллий қўшиқларимиздан “Жанон бўламан деб” билан бошлади. Хонанданинг ўзи ҳам, бу қўшиққа мос либосда эди.
Учинчи блок давомида, “Сеники бўлай”, “Хоразмча” қўшиқларни куйлагач, дуэтларга ўтди.
“Элдидо” гуруҳи билан,
Улуғбек Раҳматуллаев,
“Божалар” Жаҳонгир Позилжонов,
ҳамда Ўзбекистонда хизмат кўрсатган артист Мавлуда Асалхўжаева билан дуэтлар куйлади.
Сўнг, “Аламларимсан” қўшиғини куйлагач, барча ҳамкасбларига, мухлислар ва томошабинларга миннатдорчилик билдирди.
Концерт якунида Манзура Ватан ҳақидаги қўшиғини куйлади ва барча концерт ижодкорлари саҳнага чиқишди. Концертга ўз ҳиссасини қўшган барча ижодкорларга миннатдорчилик билдирилди.
Саида Вахобова
Феруза Фаттохова
Фотолар учун фотограф Сулхон Ниёзов Weddingtime.uz. SD Studioга миннатдорчилик билдирамиз
