FATTOHHON.COM
« Все новости
Хонанда Ёдгор Мирзажоновнинг продюсери Феруза Нодирова билан ҳамкорлигига бу йил 10 йил тўлди! Продюсер ва хонанданинг ҳамжиҳатликдаги ҳамкорлиги учун бу жуда катта муддат ҳисобланади.
Феруза Нодирова фикрлари:
Феруза Нодирова: - Мақташ эмас, лекин, Ёдгорнинг ўзига хос камтарлиги бор. У ҳеч қачон ҳаволаниб кетмаган. Масалан, бир плакатчи Зебо деган аёл, менга “мен Ёдгор Мирзажоновнинг плакатларининг фойдасидан участка қурганман! Бундай катта даромадни мен ҳеч қайси хонандадан кўрмаганман!”, дегандилар. Ёдгор бу гапларни эшитиб ҳам, ҳаволанмаган. Унинг ана шу камтарлигига қойил қоламан. Ҳар қанча ютуқларга эришса ҳам, ўша камтар ва оқкўнгиллигини йўқотмайди.
- Ёдгор Мирзажонов сизни ёнингизга биринчи келганларида, нима хаёлингизга келган?
- Биринчи кўрганимдаёқ тўғри маънода юрагим жизиллаган. Яъни, ўзи бўладиган хонандани продюсер ҳам сезади, дейишади. Ўша пайтда Ёдгорнинг кўзлари ёниб турганди. Кейин у менга ҳаётининг воқеасини айтиб бергандан сўнг, менга қаттиқ таъсир қилган! Мен барибир ҳам аёл кишиман-да! Аммо, билмадим, айтиб берганлари менимча, ҳар қандай инсонга таъсир қилган бўларди. Ўшанда қанақадир унга ёрдам беришни кўнглимга тугиб қўйганман. Унга ўз ўғлимдек меҳрим тушган. Ўша тушган меҳрим, кўнглимда ҳалигача бор!
- Сизнингча, узоқ йиллик ҳамкорлик сири, нимада?
- Кўпинча, ўзи менга, “шоу бизнесда, хонанда билан продюсер сифатида, сизнинг продюсер сифатидаги иш принципингиз нотўғри!” дейишади. “Сиз моддий манфаатни биринчи ўринга қўймагансиз. Продюсер билан хонанда ўртасида, продюсерда биринчи ўринда, моддий манфаат тушунчаси, бўлиши керак!” дейишади. Мен эса, бу тушунчани рад этган ҳолда, моддий манфаат ўз йўлига, лекин авваламбор, инсоний муносабат биринчи ўринда бўлиши керак, деб ҳисоблайман! Шунда ўша ҳамкорлик узоққа боради! Агар, сиз фақат хонандадан пул ишлашни мақсад қилсангиз, бундай ҳамкорлик ҳеч қачон узоққа бормайди! Пул аралашган жойда, барибир ажралиш бўлади. Тўғри, ҳисобли дўст айрилмас, дейишади. Бу ҳам керак. Аммо, бизларда ижодий ҳамкорлик ҳам бор, хонанда билан продюсер муносабатлари ҳам бор, лекин она-боладек бўлиб кетганимиз учун, ўша инсоний фактор биринчи ўринда бўлгани учун ҳам, бу ҳамкорлик 10 йилга чўзилди. Бундан ҳам, узоқ йилларга давом этади, худо ҳоҳласа. Ёдгор билан биз, ҳар доим бир -биримизни қўллаб – қувватлаймиз!
- Ёдгор Мирзажонов қўшиқ танлаганда, биринчи сиз билан маслаҳатлашадиларми?
- Қўшиқ танлашда, авваламбор, Ёдгорнинг ўзи мавзуси ва йўналишини танлайди. Менинг вазифам эса, йўл-йўриқ бериш! Мен ўзи мусиқа бўйича мутахассис эмасман. Лекин, барибир шу санъатнинг ичидамиз. Қайсидир маънода масалаҳат бераман, клипларнинг суратга олинишида ва бошқа керакли ҳолатларда фикрлашамиз. Лекин, мусиқа бўйича Ёдгорнинг ўзи профессионал, чунки у мусиқали драма факультетини битирган. Биз фақат маслаҳат билан иш тутамиз.
Ёдгор Мирзажонов фикрлари:
- Продюсерингиз Феруза Нодирова билан 10 йиллик ҳамжиҳатлик сири? Кўпчилик, ўз продюсери билан маълум бир вақт, яъни машҳурликка эришгунча бирга ишлайди ва сўнг, негадир кўпинча бирор баҳона билан хайрлашишади. Сиздаларда-чи?
Ёдгор Мирзажонов: - Биз 10 йилдан буён бир тан-у, бир жон бўлиб ишлаб келмоқдамиз. Мисол учун, мен ҳар доим Феруза опанинг маслаҳатларига қараб иш қиламан. Ҳеч қачон ўзбошимчалик қилмайман. (кулиб) Тўғри баъзи бир пайт айб иш қилиб қўйсам, Феруза опам уришадилар. Ўзи санъаткор продюсери билан аҳил бўлса, ижод ҳам яхши бўлади. Кўз тегмасин, биз улар билан ҳатто она ва боладекмиз. Мен уларни битта қарашларидан нима демоқчиликларини тушунаман.
- Илк марта қандай танишгансизлар, қандай келишувлар бўлган? Ҳамкорлик қандай бошланган?
- Мен бошида талабалик вақтимда ҳам, қўшиқлар тайёрлаганман, лекин матбуотга чиқмаганман. Мени матбуотга биринчи бўлиб, Ферзуа опамнинг шогирди Бекзод ака олиб чиққанди. У мени Феруза опам билан таништирган. У пайтларда Феруза опамлар “Ҳумо” газетасида бош муҳаррири бўлиб ишлардилар. Ўшанда Феруза опам мени кўриб, ҳолатимни тушунганлар. Улар “ўзим ёрдам бераман, қўллаб-қувватлайман” дедилар. Ўшанда улар билан самимий гаплашиб, бир-биримизни тушунганимиз учун, Феруза опам ҳам менга ёрдам бермоқчи бўлганлар. Шу билан бирга ишлаб кетдик. Феруза опам бошидан менга керакли маслаҳатлар бердилар, интервью, матбуотда мен ҳақимда ёритиладиган хабарлар борасида ўз ёрдамларини аямадилар. Улардан жуда ҳам миннатдорман.
- Мана шу давр ичидаги ижод давомида, наҳотки тортишувлар бўлмаган?
- Йўқ, ҳеч қачон катта тортишувлар бўлмаган! Баъзила кичик баҳслашувлар бўлган бўлиши мумкин, лекин ҳеч қачон қаттиқ тортишмаганмиз! Феруза опам ўз ишларини яхши биладиган инсон, қолаверса, бизда ўзаро меҳр ва ҳурмат ҳам кучли, балки шу сабабли ҳам, ҳеч қачон бир-биримиз билан хафалашиб қолмагандирмиз. Мана Феруза опамлар билан биргаликдаги ижодий ҳамкорлигимизга, бу йил 10 йил тўлди, энди ҳозир юбелей қиламиз, деб ўтирибмиз.
- Феруза опани хонанда Отабек Муталхўжаев билан ҳам ижодий ҳамкорлигига қандай қарайсиз? Улар биргаликда ишлашни бошлаганларида, сизда ижодий рашк бўлмаганми?
- (самимий) Бошида озгина ижодий рашк бўлганди. Чунки, албатта, аввал бор эътиборларини менга қаратгандилар-да. Лекин, мен тушуниб етдим, барибир бошида ижодни бошлаётган ижодкорга ёрдам бериш керак. Шунинг учун ҳам, Феруза опам ҳам мана шу болага ёрдам керак экан, деганларида қаршилик қилмаганман. “Чунки, мени ўзимнинг ҳам бошимдан ўтган. Мен бир нима дея олмайман” деб, ўшанда Феруза опамга ҳам айтганман. (самимий) Баъзи вақтларда тўғри, ижод борасида маслаҳат олмоқчи бўлиб, Феруза опамларни талашиб ҳам қолишимиз мумкин. Ҳаттоки, қай биримизга кўпроқ вақт ажратяптилар, деб ака-укалардек, бир-биримиздан рашк қилишимиз ҳам мумкин. Лекин, барибир биз битта оиладек бўлиб кетганмиз ва бир-биримизни тўғри тушунамиз.
- Отабек Муталхўжаев билан бир–бирингизнинг ижодингизга қанақа қарайсизлар?
- Бир–биримизни ижодимизга ҳурмат билан қараймиз. Отабек янги қўшиқ куйлаган бўлса, мен эшитиб кўраман, ёки менинг янги қўшиғимни у эшитиб кўради. Клип суратга олдирсак ҳам, бирга кўрамиз. Ёки мен клип суратга олдирсам, Феруза опам билан улар бирга кўришади. Айтишади-ку, битта калла яхши, иккита калла ундан яхши деб! Биз кўпчилик бўлиб, маслаҳатлашамиз.
- Феруза опа Нодировани қайси тарафлама ижодингизга ёрдам берганлар?
- Феруза опам бизларга умуман олганда, ҳар доим, ҳар томонлама ёрдам берадилар. Санъаткор ҳар доим, бир ўзи бўлса қийналади. Чунки, ҳамма ишни бир ўзи қила олмайди! Агар қиламан, деган тақдирда ҳам бир ўзи улгура олмайди. Феруза опам бизларга, ҳоҳ матбуот бўлсин, ҳоҳ телевидение бўлсин, ҳар томонлама бизларни қўллаб- қувватлайдилар. Мисол учун, қийналиб қолган жойимизда, яхши маънода қўлимиздан тортиб, йўлга солиб қўядилар.
- Келажакда яна қандай лойиҳаларни амалга ошириш ниятидасизлар?
Феруза Нодирова: - Ёдгорнинг анча йиллик орзуси, яхши бир кино лойиҳани амалга ошириш! Ҳам продюсер, режиссёр сифатида, ҳам актёр сифатида, ўзини синаб кўриш ниятида!
Шоубизнесда ўта камёб ҳисобланган ҳамжиҳатликка асосланган ҳамкорликнинг яна узоқ йиллар давом этишига тилакдошмиз!
Саида Вахобова
Феруза Фаттохова