FATTOHHON.COM
« Все новости 
24 август куни «Алишер Навоий» (собиқ Панорама) киносаройида режиссёр Жавлон Шодмоновнинг “Хазина операцияси” фильми премьераси бўлиб ўтди!
Премьера куни залда кўплаб кино ижодкорларни ва шоу бизнес вакилларини кўриш мумкин эди.
Фильм ижодкорлари саҳнага таклиф қилиндилар.
Продюсер Жасур Шодмонов
Фильм режиссёри Жавлон Шодмонов
Бош ролларда Жаҳонгир Позилжонов, Толиб Мўминов, Собиржон Отажонов. Шунингдек, Санжар Шодиев, Тўти Юсупова, Жумадилла Раметов, Ҳосият Ҳусанова, Турсунбой ва бошқалар...
Монтаж режиссёри Муҳбилло Убайдуллаев
Овоз режиссёри Камолиддин Раҳимов
Ижодкорлар таништирилганидан сўнг, сўз севимли устоз актриса Тўти Юсуповага берилди.
У киши барчани премьера билан табрикладилар ва Жавлон Шодмоновга алоҳида миннатдорчилик билдирдилар.
Саҳнадан тушгач эса, Жавлон Шодмоновни актриса Ҳалима Иброҳимова алоҳида табриклади.
Фильм намойиши бошланди.
Фильм комедия жанрида суратга олинган бўлиб, лекин жиддий мавзуни ўзида ифода этган. Яъни, ота-онага меҳрибон бўлиб, уларни розилигини олиш, уларга ҳурмат, эҳтиром кўрсатиш кераклиги таъкидланган. Инсон улғайиб, оила қургач, ота-онадан узоқлашиши турли эпизодларда ишонарли кўрсатиб берилган. Масалан, ўғилларни уйга келиб, ота-она билан бирга овқатланишни истамай, рафиқаси билан уйга кириб кетишлари, ота-онаси бирор нарсага чақирганда, келмай баҳона топишлари...
Фильмда костюмлар ва грим жуда яхши чиққан, масалан, Аватар, Астерикс ва Обеликс қаҳрамонлари қиёфалари худди ўзидек ўхшатиб, яратилган.
Актёрлар ансамблидан Жаҳонгир Позилжонов ва Толиб Мўминов ўз ролларини маҳорат билан ижро этишган.
Лекин, бошқа актёрлар ижросида негадир камерага ишлаш кучлироқдек... Иш бор жойда камчилик ҳам бўлади дегандек, баъзи бир камчиликлардан ҳам ҳоли эмас. Масалан, мантиқан олинганда, “болали уй бозор” деган нақлга кўра, ҳар қандай болали уйда бирор янги нарса тинч турмайди, албатта, болалар ўша нарсаларга тегиб кўришади. Аммо, фильмда 3 қаҳрамон қўғирчоқ қиёфасида, янада ҳовлида очиқчасига турса ҳам, уй эгаси ҳам, болалар ҳам, ҳаттоки бу қўғирчоқлар совға қилинган бола ҳам, келиб уларга қўл билан тегиб кўрмайди! Ана шуниси бироз ишончсизроқ, назаримизда. Ёш болалар минг таъқиқ қўйсангиз ҳам, “тегма” десангиз ҳам, катталарга билдирмай келиб, тегиши табиий ҳолат. Тўғри, комедияда бўрттиришлар бўлиши мумкин, аммо, мана шу эпизоднинг ўзида режиссёрда мана шу 3 қаҳрамон билан янада кулгили ва динамик ҳолатларни ишлаш имконияти бор эди, деб ўйлаймиз.
Фильм мазмунан тарбиявий аҳамиятга эга. Ота-онага меҳр ва ҳурмат кўрсатиш эса, ҳар бир фарзанднинг бурчидир.
“ХАЗИНА ОПЕРАЦИЯСИ” ФИЛЬМИ 24 АВГУСТДАН КАТТА ЭКРАНЛАРДА НАМОЙИШ ҚИЛИНМОҚДА!
Саида Вахобова
Феруза Фаттохова
Фотолар учун Дилмурод Манноповга миннатдорчилик билдирамиз.
