FATTOHHON.COM
« Все новости 
Отабек Муталхўжаевнинг “Дунё учун севма мени” клипининг суратга олиш ишлари, хонадонда давом эттирилди. Бу ерда мол-мулк борасидаги ҳолатлар акс этган саҳналар, бассейн саҳнаси, бош қаҳрамоннинг оилавий ҳолати акс этган саҳналар суратга олинди.
Клип режиссёри Темур Пиримқулов: - Отабек Муталхўжаев билан биринчи марта бирга ишлашимиз! Аввал ҳам яхши таниш бўлганмиз ва биргаликдаги ижодий режаларимиз бўлган. Отабекнинг актёрлик маҳорати жуда ҳам кучли. Мен ўзи актёрларга маълум бир вазифа бериб, уларнинг хатоларини жойида тўғрилашга ҳаракат қиламан.
Лекин, Отабек Муталхўжаевга вазифани қисқа тушунтирганимнинг ўзидаёқ аъло даражада бажармоқда! Барча керакли ҳолатларни юракдан чиқариб бермоқда! Унда образга кира олиш қобилияти кучли экан!
Клип фақат сюжетдан иборат. Клипда бир инсон тақдири акс этган. Ўша инсоннинг қисқа муддат ичида нимагадир эга бўлиб, ниманидир йўқотиши, бу ҳаётнинг ўйинида, бу вақтда унинг энг яқин инсони бўлмиш рафиқасини унга бўлган садоқати кўрсатилади. Биринчи навбатда бу ўзгача қўшиқ ва шу қўшиқнинг руҳиятидан келиб чиқиб, клип ҳам ўзгача чиқмоқда. Клипда бассейн саҳнаси ҳам бор, чунки клипдаги қаҳрамоннинг ҳаётида бир вақтнинг ўзида ҳамма нарсасидан айрилган вақтида, ўша дардларини нимадир билан кўнглидан чиқариши керак эди. Ана шуни сув ёрдамида ювиб юбориши учун ҳам, клипда бу саҳна керак. Клип 2 кун давомида суратга олиниши мўлжалланган.
Продюсер ва киношунос Феруза Нодирова: - Мени назаримда, ижодда янгилик қилиб туриш керак! Янги услублар ва янги йўналишлар зарур. Шуни эътиборга олган ҳолда, Темур Пиримқулов ижодини кузата туриб, шу йигит билан ҳамкорлик қилиш фикри туғилди. Темурнинг ҳам ўзига хос бир услуби бор. Отабекнинг ғояси билан, Темур мана шу қўшиқнинг руҳиятини сюжет орқали яхши очиб бера олади.
Мен Темур Пиримқуловда ўз ишига профессионал ёндошувни кўрдим. Унинг ўзига хос дунёқараши бор. Мана бугун суратга олиш жараёнларини кузатяпмиз, мен умуман суратга олиш жараёнларини яхши кўраман. Чунки, ижодкорлар бир-бирлари билан кўришишади. Клипмейкерлар билан фикрлашамиз, янги актёрлар, янги қиёфалар, объектлар... Барчаси яна бир клип жараёнидек, фақат бу мини-фильм, дейиш мумкин. Клип суратга олишнинг ҳам ўз машаққати, ўз роҳати бор. Ўз аураси бор, мана шу аура ичида ижод қилиш, ўйлайманки, ҳар бир ижодкорга ўзига яраша завқ бағишлайди! Мана шу ижодий онлар натижаси, клип томошабинларга тақдим этилади.
Клипдаги қаҳрамон қиз Нозимахоннинг қаҳрамонини ҳам, ўзига яраша ижодий “юк”и бор.
У садоқатли рафиқа ролини ижро этмоқда.
Клипда Отабек бир неча хил имиджда чиқади.
Визажист Лидия Андре
Мураккаб саҳналардан бири, албатта бассейн саҳнаси. Чунки, барибир бассейнга бор бўйи билан ўзини ташлаш хавфсиз эмас. Сабаби, бассейн етарли даражадаги чуқурликда эмас. Аммо, Отабек клип учун таваккал қилишга тайёр эди...
Қолаверса, Отабек бош қаҳрамоннинг руҳий изтиробларини ҳам жуда табиий чиқариб бера олаётгани, режиссёрга у билан ишлашда ҳеч бир қийинчилик туғдирмади.
Азиз Раметов ва Камолиддин Қосимов ижросидаги саҳналар ҳам, бирма-бир суратга олина бошланди.
Олдинда эса, яна бошқа объектлар ҳам бор эди. Клипни суратга олиш ишлари ярим тунга қадар мўлжалланган.
Демак, тахминан 10 кунларда Отабек Муталхўжаевнинг “Дунё учун севма мени” клипи тайёр бўлади.
Клип премьерасини кутиб қоламиз.
Саида Вахобова
Феруза Фаттохова
