FATTOHHON.COM
« Все новости 
Хонанда Ёдгор Мирзажонов эстрада оламида ўз ўрнига эга хонандалардан бири. У бугунги кунда ҳам, тинимсиз ижод билан банд. Унинг продюсери Феруза Нодирова билан ҳамкорлигига ҳам бу йил 10 йил тўлди. Шоубизнес оламида продюсер ва хонанданинг бундай узоқ муддат ҳамкорлиги, камёб ҳодисалардан ҳисобланади. Бу ҳақида, МАҚОЛА да хабар қилгандик. МАҚОЛАГА ЎТИШ!
Ёдгор Мирзажонов билан бугунги суҳбатимиз орқали эса, у билан бугунги кун ҳақида суҳбатлашдик.
- Сизнингча, ҳақиқий эркак санъаткор қандай бўлиши керак?
- Биринчи навбатда ўзини ҳурмат қила билиши керак. Ўзини ҳурмат қилган инсон, бошқаларни ҳам ҳурмат қилади. Камтар бўлиши керак. Камроқ гапириб, кўпроқ ижод қилиши керак. Бачканаликни эркак санъаткор умуман ишлатиши керак эмас, деб ўйлайман. Ҳамма нарсада меъёр бўлиши керак. Кийинишида, ўзини тутишида, имиджида эркак санъаткор, ўзига эътиборлироқ бўлиши керак, деб ўйлайман.
- 10 йил давомида, ўзингизни олдингизга қўйган мақсадларингизнинг неча фоизига эришдим, деб ўйлайсиз?
- Шукр, секин–секин олдинга қараб бормоқдамиз ва ўша ўйлаган орзу-мақсадларга етишиб келмоқдамиз. Ҳали олдимизда яна жуда ҳам катта мақсадлар турибди. Улар томонга интилиб кетмоқдамиз. Энди битта поғонага қадам қўйдик, десак ҳам бўлади.
- 10 йил олдинги қарашларингиз билан ҳозирги қарашларингизнинг ўртасидаги фарқ нимада?
- Мисол учун, 10 йил олдин биз бошқача ўйлаган бўлсак, ундан кейин бизни бошимиздан қанча ишлар ўтди. Ҳаёт бизлар ўйлагандек эмас. Ҳар доим ҳам, ҳамма нарса бир текисда эмас. Ҳаётда ҳар доим пасту баландликлар, бурилиш ва қайрилишлари ҳам бор. Демак, албатта қарашларда ўзгариш бўлиши табиий. Масалан, ўтган йиллар давомида ҳаётий ва ижодий тажрибамиз ортди, оқ-қоранинг фарқини англадик, санъаткор бошқалар ўйлагандек фақат чиқиб қўшиқ куйлаш ва ўйин-кулгидан иборат эмаслигини билдик. Санъаткор бўлиш бу катта масъулият, тинимсиз ижод ва кўп меҳнатдан иборат.
- Ижодингиздаги маълум танаффусдан сўнг, рейтингингизни аввалгидек тиклай ололдингизми?
- Йўқ! Аввалги даражада тиклай олдим, деб айта олмайман. Чунки, ҳозирги замон талаби бутунлай бошқача. Мисол учун, олдин қўшиқ йўналиши, талаби бутунлай бошқача бўлган, умуман олганда, имидж йўналиши ҳам бошқача бўлган. Ҳозир эса йўналиш ва талаб бутунлай бошқа. Ҳозирги кунда оқимга қараб эмас оқим билан биргаликда, ўша рейтингга чиқишга ҳаракат қилиб юрибман. Талабга мос қўшиқлар куйлашга ҳаракат қиляпман. Аммо, ижодий портлаш қила олмаётганим рост, чунки, менинг йўналишим бошқача.
- Нима деб ўйлайсиз, мана бугунги кунда кетма-кетликда янги қўшиқ ва клиплар чиқармоқдасиз, тўғри мухлисларга манзур бўлмоқда, лекин ўша биринчи чиққан пайтингиздагидек, хит бўлмаяпти, бунинг сабаби нимада, деб ўйлайсиз?
- Ўшани мен ҳам била олмаяпман, тўғрисини айтсам. (кулади). Барибир ҳаммаси аввало Оллоҳдан, деб ўйлайман. Агар омад берса ҳеч гап эмас, битта қўшиқ билан ҳам рейтинг кўтарилиб кетиш мумкин!
- Санъатга илк кириб келган вақтингизда, қўшиқларингизга қай даражада аҳамият берардингиз? Балки, ҳозир у даражада аҳамият бера олмаётгандирсиз?
- Ҳозир жуда ҳам аҳамият катта! Мисол учун, олдингига қараганда янада кучлироқ. Ҳозир олдинги қўшиқларимнинг баъзиларини эшитадиган бўлсам, шу қўшиқларни айтганим учун, баъзида ўзим ҳам уялиб кетаман.
- Нима учун?
- Чунки, у вақтларда баъзи нарсаларга аҳамият бермаган эканман. У пайтларда ўша қўшиқлар тингловчиларга ёққан. Ҳозир энди талаб бутунлай бошқача.
- Сиз мухлисларингиз билан ўртангизга қанақадир чегара қўйгандексиз? Бу бошқалардан фарқли равишда ўзингизни рейтингингизни ушлаб туриш учунми?
- Мен мухлисларим билан ўртамизга парда қўймаганман. Буни қандай тушунтирсам экан? Мен шунчаки мухлисларим, менинг ижодимга қизиқишини ҳоҳлайман, оилавий ҳаётимга ёки, шахсий ишларимга эмас. Улар менинг ижодимга, қўшиқларимга, клипларимга умуман олганда, менинг санъатдаги ижодимга қизиқишларини ҳоҳлайман. Тўғри, омма учун санъаткорнинг шахсий ҳаёти ҳам қизиқ туюлади, аммо, менимча санъаткор ҳам инсон ва уни ҳам ўз шахсий ҳаётини бошқалардан сир тутишга ва дахлсиз сақлашга ҳаққи бор, деб ўйлайман.
- Фильмда роль ижро қилгандингиз, кейин бошқа таклифлар ҳам бўлдими?
- Таклифлар бўлди. Лекин, олдинги фильмдаги ролимдан қониққаним йўқ.
- Нимадан? Фильм савиясиданми, ёки ўзингизни ижроингиздан?
- Фильм жуда ҳам яхши чиққан, савияси ҳам яхши. Лекин, мен ўзимни бошқа кўринишларда кўргим келганди. Ҳар бир инсоннинг юрагида, бир бошқача образлар яратгиси келади, ўйлаб қўйган роллари бўлади. Мен ҳали шундай сценарийни қўлга олмадим. Агар шундай роллар бўлса, мени ижро қилиш ниятим бор. Бўлган таклифларни продюсерим Феруза опам билан бирга кўриб чиқдик, лекин тўғри келмагани учун, рад жавобини бердик.
- Шоу бизнесга кириб келиб, ўзингизнинг қайси одатингиздан воз кечдингиз?
- (озгина ўйланиб) Олдин уйқучи эдим. Ҳозир шундан воз кечганман. Доим барвақт туришга ва кам ухлаб, кўпроқ ижод қилишга одатланганман.
- Бир суҳбатлашганимизда, янги йилдан жонли ижрога тайёрланиб, фақат жонли ижрода куйлайман, дегандингиз. Қанчалик режангизни амалга ошира олдингиз?
- Жонли ижрода бемалол қўшиқ куйлай оламан. Мисол учун, жонли ижрода тўйхонага бориб ҳам қўшиқ куйлашим мумкин. Лекин, ўша тўйхонада ўтирган созандалар, менинг ўша қўшиғимни, ўшандоқ, менга керак ва мос даражада чалиб бера олмайди. Натижада, мен ўзимнинг созандаларимни олиб юришим керак. Ўзимнинг созандаларимни тўйларга бирга олиб юришим эса, менга жуда ҳам катта харажатга тушиб кетади. Аввал айтганимдек, олдин маълум бир муддат шундай қилдим ҳам, бир неча созандам билан, бир неча тўйда жонли куйладим. Ишонасизми, биров билиб, биров билмади. Қайтанга менга, “фонограммангиз ёмон ёзилган экан” дейишди... Аммо, мен жонли ижрода куйлашдан ҳеч қачон қочмайман ва мен бу нарсани балки, келажакда амалга оширарман. Режаларим, ўй-хаёлларимда турибди.
- Агар вақтни орқага қайтариш имконияти бўлса, қайси хатони қилмаган бўлардингиз?
- (сал жилмайиб) Кўп хатоларни қилмаган бўлардим. Ҳаётда мисол учун, катта-кичик хатоларингиз бўлади, албатта. Лекин, айнан ҳозир бирортасини эслай олмайман. Ҳар доим шукур қиламан. Берилган ҳаётим шундай ўтаётганига ва ҳар бир кунимга шукур қиламан. Ҳаммамиз ҳам инсонмиз ва қандайдир хатолар қиламиз. Балки ўша хатоларнинг ҳам ҳикмати бордир? Мен бир иш ўхшамай қолса ҳам, яхшиликка, дейман. Бу ёқда бошқа бир яхши нарса кутиб тургандир, деб ўйлайман.
- Тўлиқ жонли ижрода концерт бериш ниятингиз борми?
- Ниятим бор. Бемалол ўтказаман. Фақат, репититция қилиб олсам бўлди. Яхши репертуар қилиб олишим керак.
- Унда қачонларга яккахон концерт ўтказишигиз мумкин?
- Куз ойига ният бор эди. Ҳомийлик томонлари ҳал бўлса, жонли ижрода концерт ўтказиш ниятим бор.
-Овозингиз, 10 йил аввал қандай бўлса, ҳозир ҳам шундай. Уни асраш учун қандайдир бир йўллар қиласизми?
- (самимий) Муздекроқ нарса ичсангиз, овозингиз ярқироқ чиқади. Агар сиз иссиқроқ ичсангиз, томоғингиздаги товуш пайчаларни куйдириб қўйишингиз мумкин! Мен мисол учун, томоғимни ўргатганман. Овозимни жуда бир аяб, у-бу нарсалар қилмайман. Яқинда, операчи устозлар билан гаплашганимда, уларнинг айтишича, уларнинг устозлари олдин муздек ичимликни ичиб, кейин бемалол овозини ишлатаверар экан. Аммо, айтиб бўлгандан кейин, муздек ичимлик ичиб бўлмас экан, товуш пайчаларига таъсир ёмон бўлади. Қўшиқ айтиб бўлгандан, кейин илиқроқ ичимлик ичиш керак.
- Кўпинча, санъаткорлар ўртасида дўстлик бўлмайди, дейишади. Сизни-чи, санъаткорлар орасида ишонадиган дўстларингиз борми?
- Дўстларим кўп! Санъаткорлани ўртасида дўстлик бўлмайди, дейишса, у бекорчи гап! Санъаткорлар ҳаммаси бир-бирини ҳурмат қилишади. Санъаткорлар орасида дўстларим кўп, деярли кўплари ўзим билан бир вақтда чиққанлар, Шароф Муқимов, Фирдавс Пазлитдинов, Абдували Ражабов, Достон Убайдуллаев... энди ҳар биттасини исмини номма-ном айтиб ўта олмайман, кўп вақт кетади. Мен билан бир вақтда чиққанларнинг ҳаммаси дўстларим! Мендан олдин чиққан санъаткорлар, мен учун устоз ҳисобланадилар. Мендан кейин ва ҳозир чиқаётган хонандалар эса, менинг укаларим, деб биламан ва мен уларга яхши муомаладаман.
- Ўзингиздаги ўзингиз ёқтирмаган жиҳатлар ҳам борми?
- Бор. Кўнгилчанглигим. Аммо, буни ўзгартира олмайман.
- Бугунги кундаги қўшиқлар ёшлар тарбиясига таъсир кўрсатяпти, деб ўйлайсизми?
- Албатта. Ҳозирги кун санъаткорларига қўйилган талаб, сўзга кўпроқ эътибор бериш, мазмунли матн танлаш, айниқса, клипларга эътиборли бўлиш керак. Бу дегани аҳлоқ бузадиган клиплар эмас, қўшиқни сўзлари албатта бирор бир маънога эга манавий озуқа бера оладиган, умуман олганда санъаткорни ўзини тута билишлари. Ҳаммаси мужассам бўлган нарсалар ҳозирга кунда Ўзбекнаво тарафидан талабга қўйилган. Бу нарсалар ўша ёшларга келажак авлодларга таъсир қилаётгани учун-ки шунақа талаблар қўйилди. Бу нарсалар ўша ёшларни тарбияга чақиришга ҳам қўл келса керак деб ўйлайман.
- Юлдузлик касали сизга қанчалик яқин ва узоқ?
- Юлдузлик касали менга узоқ. Такрор айтаман, бизни бошқалардан ортиқ жойимиз йўқ, биз санъаткорлар, хонандалар ҳам, оддий инсонмиз.
- Онангизга, энг ёқтирган ва танқид қилган қўшиқлари?
- Онамга энг ёққан қўшиғим “Отажоним”! Уларга ёқмаган қўшиғим йўқ, ҳаммаси ёқади.
- Продюсерингиз Феруза опага-чи, ёққан ва ёқмаган қўшиқларингиз?
- Энг ёққан қўшиғим “Сени қизғонаман”. Феруза опамларнинг бир одатлари бор. Уларга ёқмадими, “шу қўшиқ устида ишлама”, дейдилар. Мен ўзимча ишлаб, у бу нарса қилсам ҳам, ўша клип ҳам, қўшиқ ҳам барибир нимадир бўлиб чиқмай қолади. Ҳозир номини эслай олмаяпман, лекин қайсидир бир қўшиғим шундай бўлиб чиқмай қолиб кетган.
- Бахт тушунчаси сиз учун?
- Ҳар кунимизнинг ўзи бахт! Эрталаб туриб, кўзимизни очганимизда, нафас олиб турганимизнинг ўзи бахт! Тинч ва фаровон ҳаётда яшаётганимиз, бирор нарсани режалаштириб, белгиланган вақтда, ўша режани амалга ошира олаётганимизнинг ўзи бахт! Ахир ер юзидаги баъзи мамлакатларда, яна қайтиб эрта тонгда кўз очишни, ҳаттоки бир кун бўлса ҳам, тинч яшашни орзу қилган қанча инсонлар бор.
- Ўтган вақтга назар ташласангиз, нималарни қўлдан бой бердим ва нималарга эришдим, деб ўйлайсиз?
- Мен ҳеч қачон қўлдан бой берилган нарсага ачинмайман! Чунки, сўнги пушаймон ўзингга душман, деган гап бор. Уни ўйлаб, соғлиғимни кетказиб, ўзимни ўзим сиқиб, нима қиламан? Ундан кўра келажакка интилиб яшайлик, мақсад сари янада олға интилганимиз яхши, деб ўйлайман.
- Ҳаётингиздаги энг қадрли кун?
- Санъатда ютуқларга эришилган кунлар, бизлар учун қадрли кунлар, ҳисобланади. Бир эмас, бир неча кунлар. Масалан, биринчи саҳнага чиққан куним, “Ниҳол” мукофотини олган куним, “Тарона” мукофотини олганман, кўплаб тадбирларда иштирок этганман.
- Санъаткор сифатидаги ютуқларим нимада, деб ўйлайсиз?
- Ҳар бир қўшиғим менинг ютуғим, санъатда топган обрўйим, озми кўпми мухлислар қалбидан жой олганим, буларни ҳаммаси менинг ютуқларим.
- Ҳаётда сир сақлайдиган инсонмисиз?
- Вой, мен қудуқман (самимий кулади). Менга бирор инсон сир айтдими, умуман ҳеч кимга айтмайман. Ичимда қолиб кетади.
- Саҳнага чиққан илк кунингизни эслай оласизми?
- “Гўзалим” деган қўшиғим билан Истиқлол санъат саройининг саҳнасига, “Наврўз” радиосининг туғилган кунида чиққанман. 2003 йил 4 январ эди.
- Ким билан дуэт куйлашни орзу қиласиз?
- Бу ҳақида ўйлаб кўрмаган эканман.
- Қайси созларни чала оласиз?
- Пианино ва гитара чала оламан.
- Рекламага қанчалик эътиборлисиз?
- Олдин жуда эътиборли эдим, ҳозир эътиборим сал сусайиб қолган.
- Нима деб ўйлайсиз, бугунги кун тингловчиларига қандай қўшиқлар керак?
- Бугунги кун тингловчиларига қандай қўшиқ кераклигини, ҳозир билиш қийин. Мана бу қўшиқни айтса, хит бўлади, деб айта олмайман. Ҳозир тингловчиларнинг диди нозик бўлиб кетмоқда.
- Тингловчиларингиз аудиториясини неча ёшдан нечи ёшгача, деб ўйлайсиз?
- Мен буни белгиламаганман. 2 ёшли мухлисларим ҳам бор ва худа катта ёшли мухлисларим ҳам бор. Аниқ мана шу ёшдагилар, деб айта олмайман.
- Ошхонада қандайсиз? Овқат қилишни биласизми?
- Овқат тайёрлашни биламан. Ҳаммасини биламан, деб айта олмайман, лекин қўлимдан келади. Энг яхши тайёрлай оладиганларим, менимча димлама ва картошкани яхши қовураман. (кулади)
- Бир ўзингизни телебошловчиликда ҳам синаб кўрдингиз...
- Тўғри, бошловчиликда ҳам ўзимни синаб кўрдим ва журналистлик қанчалик қийинлигини ўша ерда билдим ва тушундим! Қанчалик маъсулият, қанчалик қийинчилиги кўплигини ҳис қилдим. Аммо, бу сабабли тўхтатмадим. Шунчаки, маълум бир сабаблар туфайли тўхтади. Лекин, яна давом эттириш ниятим бор. Феруза опам билан бир-иккита янги лойиҳалар устида ўйлаяпмиз. Балки, ўша лойиҳалар амалга ошса, бирор янги кўрсатув қиламиз.
- Ҳозирги кунда нималар билан бандсиз?
- Ҳозирда энг улуғ байрамимиз Мустақиллик байрамига тайёргарлик кўрмоқдамиз! Ҳозирги кунда, 2 та янги дуэт ёзяпман. Дуэтдошим яна Ширин Маматова. Талаб тушгани учун ҳам куйлаяпмиз. Яна бошқа нарса ўйлашмасин. Ундан ташқари, яккахон куйлаш учун “Азобида” деб номланган янги қўшиқ ёздим. Бу қўшиғим муаллифи Илҳом Маматов, сўзлари Дониёр Мирзога тегишли. “Азобида” қўшиғимизга яқин кунларда, Шуҳрат Мавлонов билан клип олиш ниятидамиз.
- Келажакда Ширин Маматова билан битта дуэт бўлиб қолмайсизларми?
- (кулади). Йўқ. Бу дуэтлар талаб борлиги учун куйланмоқда. Телеэкранларга реклама учун эмас!
- Шу кунгача шогирд ҳам чиқардингиз?
- Мисол учун, ўзим устоз эмасман. Менга ҳавас қилиб келишади. Уларнинг кўнглини қолдириб, “кет” дея олмайман. Лекин, уларга устозлик ҳам қила олмайман, фақат йўл- йўриқ кўрсатаман, деб айтаман. Албатта, қўлдан келганча йўл-йўриқ кўрсатиб, йўналишга солиб юбораман.
- Ҳаётингизда бўлган шу вақтгача ҳеч кимга айтмаган бирор бир воқеани мухлисларингиз билан бўлиша оласизми?
- Иккита воқеани айтишим мумкин. Биринчисини аввал ҳам айтганман, иккинчисини эса, ҳеч қачон ҳеч қаерда айтмаганман! Биринчиси, мактаб пайтларида бўлган бир қизиқ воқеа. Бир куни қўлим билан катта қовоқ арини уриб ўлдирганман! Ўзимча қизларни ҳимоя қилмоқчи бўлганман-да! (кулади). Ўша қовоқари қўлимни чақиб олган ва қўлим шишиб кетган, ҳатто иситмам чиққан! (кулади). Ҳозир ўша вақтларни эсласам, ўшанда бирор нарса, масалан, оёқ кийимимни олиб урсам ҳам бўлардию, дейман. Лекин, ўшанда шошиб қолиб, ўйламай, қўлим билан урганман. (кулади)
Яна бир воқеа ҳеч эсимдан чиқмайди! Бир куни институтда диплом спектакли қўйишимиз керак эди. Ўшанда 5 курс эдим, якунловчи курс! Диплом спектаклида “Бобур” қўйяпмиз. Мен бош ролда эмасдим, вазир ролини ўйнашим керак. Хуллас, репитиция вақти белгиланди. Мен ўша куни, ўша вақтда концертдан келаётгандим. Шундоқ институтга келсам, мухлислар мени гуллар билан кутиб олишди. Гулларни олдим, қўлим гулга тўлиб кетди! (кулади ва кўрсатиб беради). Шунча гулларни энди отиб, ёки ташлаб юбормайман-ку, ҳаммасини қўлимга кўтариб олдим. Шунда гул берган мухлисларим ҳам, ортимдан залга эргашиб киришди. Ҳаммаси кириб, гур этиб ўтириб олишди. Қарасам, ўқитувчимиз, талабаларга роль ўргатаётган экан. У киши мени кўрди-да қотиб қараб қолди. Мен ҳам, уларга қараб, “Ассалому алайкум! Яхшимисиз?” дедим. Ёнимда бирга ўқийдиган оғайним ҳам бор эди ва у ҳам вазир ролини ўйнаши керак эди. Мен қўлимда гуллар билан турибман. Шунда, ўқитувчимиз менга “бу ёққа кел” деди. Мен ҳам бордим-да, “мана бу гуллар сизга, аслида сиз шу гулларга муносибсиз” дедим ва у кишига гулларни бердим. Шунда кутилмаган иш бўлди! Ўқитувчимиз гулларни шундоқ қўлимдан олди-да, отиб юбориб, мени тарсиллатиб уриб кетса бўлдими?! (кулади). Залда ўтирган мухлисларим, бу ҳолатни кўриб, ташқарига йиғлаб чиқиб кетишди! Лекин, ҳозир ўйлаб кўриб, ўша устозимдан миннатдор бўламан. Биласизми, нега? Чунки, бизларга ўшанда тўғри йўлни кўрсатган эканлар! Ҳозирдан юлдузликка берилмасин, умри мана шундай гулларга ишқибозлик билан ўтиб кетмасин, мен ҳаммадан баландман, деган фикрлар ҳозирдан бўлмасин, бир нечта мухлислар, гул кўтариб келиб мақтаса, шундан ҳаволаниб, ҳалитдан ўзига ишониб кетмасин, аксинча, юлдузлик ҳам, мухлислар олқишию, бунақа гуллар ўткинчи бўлишини, ҳозирдан тушунсин, деб шундай қилган эканлар! Қолаверса, институтда тартиб-интизом хонандами, бошқами, ҳамма учун баробарлигини ҳам тушунтирмоқчи бўлганлар. Шунинг учун ҳам, мен бугун сенга чалинаётган қарсаклар эртага бошқага чалиниши мумкин, деган ҳақиқатни тўғри англайман! Ҳақиқий санъаткор, юлдузлик ва машҳурликка берилмай, аксинча, камтарлик билан ижодда янада изланиши керак, деб ҳисоблайман! Ҳар қандай вазиятда ҳам, буни унутмасликка ҳаракат қиламан!
Саида Вахобова
Феруза Фаттохова
