FATTOHHON.COM
« Все новости 
Алишер Узоқов актёр, режиссёр, хонанда, футболчи: - Мустақиллик нафақат менинг ҳаётимда, балки барча инсонларнинг ҳаётидаги энг муҳим ва йўқотгиси келмайдиган бахти, деб ўйлайман! Мустақиллик бизнинг Ватанимизга жуда кўп нарса берди. Буни санаб, саноғига етиб бўлмайди! Мустақиллик бу оддий сўз эмас! Уни битта сўз билан таърифлаб бўлмайди! Мустақиллик, бу эркинлик, озодлик, ҳаммага нарсага ўзимиз эгалик қиламиз, эркимиз ўзимизда, ўзимизга хон, ўзимизга бекмиз! Мустақиллик шахсан менинг ўзим учун, ҳеч қачон йўқотгим келмайдиган туйғу! Ҳар йили Мустақиллик байрами келганида, мен Мустақиллигимизнинг нишонланаётган йиллари кўпайиб бораётганидан хурсанд бўламан! Мана бугун ҳаммаёқда 22 рақамига кўзим тушяпти, бир пасда Мустақиллигимизга ҳам 22 йил бўлди! Кўнглимдан шундай сўзлар ўтди: “Бир пасда 22 йил бўлибди!” Шу сўзлар кўнглимдан ўтдию, ич-ичимдан, қалбимдан эса, Мустақиллигимиз абадий бўлишини, ҳоҳладим!
Жаҳонгир Позилжонов хонанда, актёр, режиссёр: - Мустақиллик деганда, ҳар бир инсоннинг мустақил ҳаёт кечириши, ўзи мустақил фикрлаши, мустақил равишда фарзандларига тарбия бериши, умуман, мустақил ҳаёт кечирадиган, ҳамма имкониятларга эга бўлган эркин инсонларни тасаввур қиламан. Шубҳасиз, мана шу имкониятлар, бизнинг юртимиз инсонларида бор! Бу эса, назаримда, энг катта бойлигимиз, бахтимиз! Мустақиллик байрамимиз бу ҳар бир инсон ҳис қиладиган энг катта хурсандчилик, Мустақилликни кутиб, унга эришиш йўлида, не-не инсонлар ўтиб кетмаган, қанча қийинчиликлар бўлган! Бу кунларга етиша олмаган, кўрмаганлар бор. Бизнинг энг катта хурсандчилигимиз, бахтимиз, мана шу фаровон Мустақилликни кўрганимиз! Мен ўзимни бемалол мана шу Мустақиллик фарзандиман, дея оламан. Чунки, Мустақилликка эришилганидан кейин берилган имкониятлардан фойдалана олдим! Мана шунинг натижаси, бугунги ютуқларга эришдим!
Мурод Ражабов актёр Ўзбекистон Халқ артисти: - Мустақиллик ҳақиқатдан ҳам, энг улуғ байрам! Чунки, бизнинг Мустақиллигимиз, Истиқлолимиз, бизга жуда ҳам катта, буюк неъматлар берди! Масалан, биз ижодкорларга жуда катта ҳуқуқ, ижод эркинлигини берди. Айниқса, ёшларимиз учун жуда катта имкониятлар яратилди. Ўзбек эстрада, кино, театр олами учун, имкониятлар беқиёс бўлди. Биз, ҳар бир ижодкор бугунги кунда ҳоҳлаган мавзуйимизга мурожаат қилишимиз мумкин! Ижодкор ўз юртида эркин ижод қила олса, бу унинг жуда катта бахти, десак ҳам бўлади Мен жуда кўп сафарларда бўламан, жуда кўп инсонлар билан учрашаман, мени ҳар йили қувонтирадиган нарса, юртимизда бўлаётган ўзгаришлар! Мана яқинда водийни айланиб чиқдик. Шунчалик водий ўзгарганки, ҳаттоки энг узоқ бир туманларига борсангиз ҳам бирор бир таъмирланмаган хонадонни кўрмайсиз! Энг муҳими инсонларнинг ҳаётга бўлган муносабати ўзгарди! Ўзига бўлган талаби, муносабати ўзгарди! Ҳар бир инсон ўз қадрини, Ватан қадрини топа билди! Энг муҳими, менинг назаримда, биз Мустақилликнинг қадрига етадиган бўлдик! Инсонларнинг дунёқараши ўзгарди. Юртимиз жаҳонга юз тутди! Мана шуниси жуда ҳам қувонарли! Албатта, юртингнинг энг улуғ, энг азиз байрами кунлари, сен мана шулар ҳақида ўйлайсан, фикр юритасан! Мен истардимки, Мустақиллигимиз боқий бўлсин! Ҳамманинг бахтига юртимиз ҳамиша тинч бўлсин! Ҳаммамизнинг хонадонимизда қувонч бўлсин! Айниқса, яхши фильмларимиз, яхши қўшиқларимиз, яхши спектаклларимиз кўпайсин! Яна бир бор юртдошларимизни чин қалбимдан, энг улуғ байрамимиз билан табриклайман!
Гулсанам Мамазоитова Ўзбекистон Халқ артисти: - Мустақиллигимиз абадий бўлсин! Ҳеч қачон кўз тегмасин! Осмонимиз мусаффо бўлсин! Бизнинг ўлкамиздек ўлка, дунёнинг ҳеч бир ерида йўқ, топилмайди! Авлиёлар юрти бўлган, бу гўзал диёримиз Оллоҳ ҳамиша ўз паноҳида асрасин! Ҳамиша юртимиз тинч, фаровон бўлсин!
Гули Асалхўжаева хонанда: - Мустақиллик бу энг улуғ, энг азиз неъмат! Барчани Мустақиллигимизнинг 22 йиллиги билан табриклайман! Ўзбекистонимиз гуллаб-яшнаяпти, янада гуллаб яшнасин! Кўз тегмасин, Ўзбекистонимиз ҳамиша тинч! Ҳамиша тинчлик бўлсин! Биз санъаткорлар ҳам ҳамиша халқ хизматида бўлиб, мана шундай қувончли шодиёналарда ўзимизнинг чиройли қўшиқларимизни тақдим этайлик! Халқимизда, ҳар бир оилада файз-барака бўлсин, фарзандларимиз соғ-саломат, оиламиз тинч, турмушимиз ҳамиша обод ва фаровон бўлсин!
«Саҳро» гуруҳи хонандалар: - Мустақиллик деганда, ҳақиқий эркинликни ҳис қиламиз! Бизнинг юртимиз мустақил! Бизда сўз эркинлиги, фикр эркинлиги бор! Бу бизнинг ҳаётимизга яхши маънода, ниҳоятда катта таъсир кўрсатади. Ҳар йили Мустақиллик байрами келганида, биз фахр-ғурур, ифтихорни ҳис қиламиз! Ҳақиқий ҳайрат, қувонч ва энг муҳими кўнгил хотиржамлигини ҳис қиламиз! Чунки, тинч, фаровон, обод ва Мустақил Ватанда яшаяпмиз! Бу эса, катта бахт!
Сарвар ва Комил (“Беном” гуруҳи) хонандалар: - Мустақиллик сўзи янграганда, кўз олдимизга Мустақиллик тантаналари, Мустақиллик шодиёналари кўз олдимизга келади! Мустақиллик бизнинг ҳаётимизда, ўчмас байрам, ўчмас фахр, ғурур! Биз жуда Мустақил юрт фарзанди эканлигимиздан жуда ҳам фахрланамиз! Албатта, бу Мустақиллигимизга осонликча эришилмаган! Мустақилликка эришиш йўлида жон куйдирган боболаримиз, меҳнат қилган бизнинг фахрли инсонларимизга раҳмат, деймиз. Ҳар доим ўзбекнинг ичида ўчмас ғурури бўлади. Мустақиллик нафақат биз, балки биздан кейинги авлод, бизнинг болаларимиз, невараларимиз фахрланадиган олий туйғу! Мустақилликни таърифлаш учун сўз камлик қилади! Ҳар йили Мустақиллик байрами келганида, кўнгилда бир ўзгача ғурур, ифтихор, қувонч бўлади! Сабаби, бизнинг юртимизнинг Мустақиллиги яна бир ёшга улғаймоқда! Мустақиллигимиз янада мустаҳкамланиб, янада илдиз отмоқда! Мана шундан қувонамиз!
Рухшона хонанда: - Мустақиллигимиз, ҳар бир ижодкор, ҳар бир инсон учун катта аҳамиятга эга! Буни таърифлашга тил ожиз! Чунки, Мустақиллигимизни қанча таърифласак, шунча кам, деб ўйлайман! Мустақиллигимиз, айниқса, биз ёшлар учун биринчи ўринда жуда катта имконият! Негаки, ҳақиқатдан ҳам, бизга ҳеч қаерда йўқ имкониятлар берилмоқда! Масалан, мен ўзим 19 ёшдаман, ёш бўлишимга қарамай, бемалол қўшиқ куйлаяпман. Санъаткор бўлиш орзуйим эди ва бу орзуйим амалга ошди! Менимча, бошқа жойларда ёшлар учун бунчалик имкониятлар берилмаган, деб ўйлайман. Мустақиллик сўзини эшитганимда, қалбим таъсирланиб, ифтихордан титраб кетади! Мустақиллик бу бизнинг энг катта бойлигимиз! Тўғрисини айтсам, энг катта орзуларимдан бири, бу Мустақиллик байрами тадбирида иштирок этиш ва Мустақиллигимиз ҳақида озгина бўлса-да қўшиқ куйлаш! Бу орзуйим амалга ошади, деган ниятдаман. Қачон Мустақиллик байрами тадбирлари кўрсатилганда, телевизорнинг олдида ўтириб оламан ва “менга ҳам мана шу устозларимизнинг йўлидан насиб қилсин!” деб астойдил ният қиламан!
Саида Вахобова
Феруза Фаттохова