FATTOHHON.COM
« Все новости 
10 сентябрь куни «Истиқлол» санъат саройида ёш хонанда “Ниҳол” мукофоти совриндори Шерзодбекнинг илк яккахон, жонли ижродаги концерти бўлиб ўтди.
Концерт бошланиш вақти, зал томошабинларга тўлди. Улар орасида Шерзодбекни қутлаш учун келган ҳамкасб шоу бизнес вакиллари бўлган меҳмонлар ҳам бор эдилар.
Жумладан, Ўзбекистон Халқ артисти Насиба Абдуллаева,
хонанда ва актриса Муниса Ризаева,
хонанда, бастакор ва шоира Шаҳноз,
хонанда Али Отажонов, радиобошловчи Насриддин Асриддинов ва бошқалар...
Залда, саҳнанинг икки ён тарафларига Шерзодбекнинг фан клуби аъзолари (яшил кийимда) олқишлаб, қўллаб-қувватлаб туришди.
Концертни “Zamin FM” радиосидан Дилбар Охунова, Зиёвуддин Аҳмаджонов олиб боришди. Шунингдек, Боситжон Саримсоқов ҳам, концерт давомида, вақти-вақти билан томошабинларга ўз фикрларини билдириб турди.
Концерт декорацияси саҳна тўрида катта экран, икки ёнда эса, яна қўшимча 2 та кичик экранлардан иборат бўлиб, тўрида катта экран атрофида созандалар, ўнг тарафда бэк вокал жойлашган эди. Чап тарафда эса, пианиногача бор.
Катта экранда, Шерзодбекнинг клипларидан лавҳалар бериб борилди, икки кичик декорацияда эса, қўшиқлар мусиқасига мос ёрқин лавҳалар намойиш қилиб турилди.
Концерт дастурини Шерзодбек “Дармоним” қўшиғи билан бошлади! Унинг ҳаяжонда эканлиги билиниб турарди. Ҳаяжонланмаслик мумкинми, ахир “Истиқлол”дек санъат саройидаги илк яккахон концерт дастури бўлса!
Шерзодбек илк қўшиғидан сўнг, томошабинлар билан саломлашиб, барчага миннатдорчилик сўзларини айтди.
Концерт 2 та блогдан иборат бўлиб, 20 тага яқин қўшиқлар ижро қилинди.
Жумладан, 1 блог “Дармоним”, “Юрагим ичра мангу”, “Сенга”, “Фарғоналик”, “Билгин жоним бу тақдир”, “Ҳиндча”, “Келади”, “Тановар”, “Онажон” (онаси билан бирга), “Отам рози бўлармикан...”, “Зебо пари”.
2 блогда эса, “Тановар” “Хоразмча”, “Лочин” (Озарбайжонча Насиба Абдуллаева билан дуэт), “Нолаларимни тингла”, “Онажон”, “Ҳаяжонда”, “Омон ёр” (янги талқин), “Куйингда маст”.
Концерт дастури тўлиқ жонли ижрода бўлишидан ташқари, яна кўплаб ёрқин воқеаларга бой бўлди!
“Фарғоналик”, “Куйингда маст”, “Тановар” каби бир неча қўшиқлар рақсида, Америка Қўшма Штатларидан “Nomad dancers” гуруҳи раққосалари, ўзбек миллий либосларида, ўзбекча рақсга тушишди! Рақсларни саҳналаштирувчи хореограф Олимжон Бекназаров.
Концертнинг ҳаяжонли дақиқаларидан бири... Шерзодбек онажониси Туҳфанисо опани саҳнага таклиф қилди ва миннатдорчилик билдирди” Туҳфанисо опа ҳам ўз навбатида барчага миннатдорчилик билдирдилар.
Шерзодбек “Тасвир” газетасига берган интервьюсида онасининг ҳам ёқимли овози борлигини айтган эди. Бу нарса, концертда ўз исботини топди!
Шерзодбек, концертда онасига махсус сюприз тайёрлаганлигини айтиб, яъни, онаси ўзи ёзган шеърига тайёрланган “Онажон” қўшиғини, онаси билан биргаликда куйлашди.
Қўшиқлар оралиғида Дилбар Охунова томонидан ўқилган “Ўлсам жанозамни булбул ўқисин!” шеъри ҳам таъсирли бўлди.
Шерзодбек “Отам рози бўлармикан...” қўшиғини куйлаган вақтида, саҳнадаги катта экранда раҳматли отасининг суратлари, оилавий суратлар намойиш қилинди.
Ўртадаги созандалар ижросидаги мусиқий танаффусдан сўнг, Боситжон Саримсоқов, “Шерзодбекнинг ижодини ким юз фоиз билади?” дея савол берди ва бу саволга жавоб тариқасида қўл кўтарган инсон, яъни Шерзодбекнинг устозини саҳнага таклиф қилди.
Сўнг, Шерзодбек саҳнада устозига миннатдорчилик билдирди ва устоз-шогирд саҳнада бирга “Тановар”ни куйладилар.
Шерзодбек куйлаган сокин тароналарнинг бирида созандалардан бири томонидан, махсус мусиқа асбоби ҳам чалинди.
Ўзбекистон Халқ артисти Насиба Абдуллаева саҳнада Шерзодбекни шогирдим дея, унга яхши тилаклар билдирди, “Лочин” қўшиғини Шерзодбек Озарбайжонда гастрол вақтида, ундан ўрганганлигини айтиб берди,
ҳамда устоз ва шогирд биргаликда Озарбайжонча “Лочин” қўшиғини дуэт тарзида куйладилар!
Хонанда Муниса Ризаева концертда қўшиқ куйламаган бўлса ҳам, Шерзодбекни самимий табриклади.
Шунингдек, Шерзодбекни фан клуби аъзолари ҳам қутлашди.
Концерт якунида барча концерт ижодкорлари таништириб ўтилди, жумладан, “Nomad dancers” гуруҳи раққоса қизлари ҳам!
Концерт тугагач, саҳна ортида ҳам, Шерзодбекни кўплаб дўстлари табриклашди.
Ўз навбатида Шерзодбек ҳам, концертга келган “Nomad dancers” гуруҳи раққосаларига алоҳида миннатдорчилик билдирди.
Шундан сўнг, йиғилган барча ижодкорлар, дўстлари Шерзодбекни осмонга отиб табриклашди!
Шерзодбек ёш хонандалар ичида биринчи бўлиб яккахон жонли ижрода концерт ўтказиши ва ёш бўлса ҳам, ўз кучига, маҳоратига ишонганлиги, жонли ижрода концерт ўтказишга журъат қила олганлиги таҳсинга лойиқ! Унинг қўшиқлар сўзларини аниқ ва тушунарли талаффуз қилиши ҳам эътиборни тортди.
“Ниҳол” мукофотининг муносиб совриндори Шерзодбек келажакда санъат оламида янада юқори чўққиларни забт этиб, азим санъат чинорларидан бирига айланишига тилакдошмиз!
Фотолар учун Х Frame Media Production студияси фотограф Аҳрор Назировга миннатдорчилик билдирамиз.
Саида Вахобова
Феруза Фаттохова
КОНЦЕРТДАН ЭНГ ЁРҚИН ЛАҲЗАЛАР ФОТОЛАРИ ЯҚИН СОАТЛАРДА....