FATTOHHON.COM
« Все новости
"ЎКИНЧ" ФИЛЬМИ 21 СЕНТЯБРДАН КАТТА ЭКРАНЛАРДА! Фильмда бош роллардан бирини актриса Севара Солиева ижро этди. Актрисанинг бу фильмдаги роли унинг бошқа ролларидан фарқ қилади. 
- “Ўкинч” (ишчи номи “Аланга”) фильмидаги ролингизнинг сиз учун энг қийин бўлган жиҳатлари?
Севара Солиева:- "Ўкинч" фильми премьерасини кутяпман. Чунки, унда бемор қиз ролини ижро қилдим, унинг драматик ҳолатларини чиқариб бериш қийинроқ бўлди, бемор ролини ижро қилишнинг ўзи қийин, фильм давомида, жуда кўп йиғлашимга тўғри келди!
“Ўкинч” (ишчи номи “Аланга”)да жуда кўп тўйиб йиғладим. “Ўкинч” (ишчи номи “Аланга”)нинг менга ёққан жиҳати, фильм ака ва сингил, қариндошларнинг ўзаро меҳру оқибати ҳақида, мен учун қизиқарли бўлди. Қолаверса, фильмда касаллик ҳам сўз боради, ҳаётда бундай беморлар бор, кимдир тузалиб кетади.
Бу фильмда мен учун қийин бўлгани, жуда кўп йиғлаганим сабаби эса, одатда бошқалар йиғласа, кўзи бир муддат қизариб туради ва бемалол суратга тушиб олиши мумкин. Менда эса, ўша қизариш бир пасда ўтиб кетади. (кулади) Қарабсизки, кейинги дублда кўзларим қизарганини олиш учун, яна йиғлашим керак. Натижада, ҳар бир дубль учун, умумий план ва ҳатто деталлар учун қайта-қайта йиғлашимга тўғри келди! Мен ўзим ҳам ҳаммаси табиий бўлишини истаганим учун ҳам, глицериндан фойдаланишни истамадим ва росмана йиғладим.Саид Мухторов кучли актёр ва режиссёр, ўша ҳолатни чиқариб бермагунингизча қайта дубль қилаверади. Талабчанлик кучли, мен эса, талаб кучли бўлишини яхши кўраман, чунки, ўша ҳолатнинг экранда кўриниши, бу сизнинг юзингиз ва экранда у ишончли чиқиши керак! Баъзилар бир-икки дубль қилиб, “бўлди” дейди. Натижада эса, эртага катта экранда, ролингиз сунъий чиқиб қолиши мумкин. Мен ана шуни ҳоҳламайман! Албатта, фильмда суратга тушиш қийин жараён, лекин, ролни юзаки ижро қилиб бўлмайди, деган фикрдаман. Чунки, касбимнинг қийинчиликлари менга ёқади.
- “Ўкинч” фильми мавзуси ҳақида фикрингиз?
Севара Солиева: - “Ўкинч” фильмида меҳр-оқибат, қариндошчилик ришталари кўтарилган, хасталик кўрсатилган, бу ҳаётда учрайдиган ҳолат. Ҳаётда ҳар хил мавзулар кўп! Кинода ҳам шуларни кўтариш ва кўрсатиш керак, деб ўйлайман.
-Фильмдаги қаҳрамонингиз тақдири ҳақида...
Севара Солиева: - Бу ҳақида, албатта, фильм катта экранда намойиш қилингач, билиб олиш мумкин.
Саида Вахобова