FATTOHHON.COM
« Все новости 
Бугун 7 апрелдан йилнинг энг кутиладиган ва узоқ давом этадиган концерти, Ўзбекистон ва Қорақалпоғистон Халқ артисти Озодбек Назарбековнинг концертига старт берилади!
Концерт олди репетицияларнинг деярли якуний қисмлари эса, кеча “Истиқлол” санъат саройида ярим тунга қадар бўлиб ўтди!
Концерт режиссёри “Замин” студияси раҳбари Саъдулла Абдуллаев.
Ҳамма ўз иши билан банд.
Декорациялар ҳам деярли тайёр...
Бутунлай ўзгача декорация мураккаблиги билан ҳаттоки, уни бунёд этаётганларга ҳам бироз қийинчилик туғдирмоқда!
Созандалар эрта тонгдан шу ерда...
Санъаткор эса, шубҳасиз асосий урғуни репертуарга қаратган ва албатта тўлиқ жонли ижрода!
Лекин, концертнинг техник тарафларига ҳам бефарқ эмас...
Бу йил концерт репертуаридан кўплаб янги қўшиқлар ҳам ўрин олган! Жумладан, “Гулғунча”, “Мени тушларида кўрган қиз” ва бошқалар... (қолганлари концертда ...)
Озодбек Назарбеков: - Янги концертнинг асосий фарқларидан бири, бу йил асосан чироқлар билан ишлаймиз. Ҳозирги замонавий талаб ҳам шу. Лекин, менимча, концертда муҳими фақат қўшиқ бўлиши керак, тингловчиларга манзур бўладиган, чиройли, таъсирли, ёки шўх, ёки ўйлантирадиган, ёки йиғлатадиган қўшиқ, созандаларнинг чиройли ижроси, хонанданинг таъсирли ижроси! Мен учун муҳими репертуар! Жонли ижродаги концерт бўлганидан кейин созандалар мусиқани жонли чалади ва улар саҳнанинг энг қулай жойида ўтиришлари керак! Овоз, товуш уларга ҳамма томондан келиб туриши керак. Бу йил ҳам, репертуарда миллий ҳам, замонавий ҳам қўшиқлар бор. Масалан, 2-3 та янги “Буюклар бисотидан: Бобур” альбомидан ҳам қўшиқлар ижро қиламиз. Лекин, мухлисларга энг маъқул бўлган бошқа қўшиқлар ҳам, албатта ижро қилинади! Сўровнома асосидаги қўшиқлар албатта куйланади, бундан буёғига ҳам шундай бўлади.
Саҳнанинг завқи шундаки, биринчи навбатда инсон ўз ишидан ўзи роҳат топса, кейин ўшандан бошқа инсонлар ҳам роҳат топади! Агар ўша ўзим куйлаётган даврада тўғри маънода роҳат топсам, 5-8 соатлаб жонли ижрода куйлаган вақтларим ҳам бўлган! Лекин, агар ўзингизга ёқмаган давра бўлса, унда инсон қийналиши мумкин. Аммо, концертда асосан ўз мухлисларим бўлишади, керак бўлса, қўшиқларимни ёддан ҳам билишади, муносабат билдириб ўтиришади. Бунда эса ижодкор чарчамайди!
Репетиция жараёнлари вақтида “Зиннура” фан клуби аъзолари ҳам, санъаткорни янги концерт билан самимий табриклаб, қўллаб-қувватлаш учун келишди!
Шунингдек, репетиция вақтида санъаткорнинг шогирдларидан Ўзбекистонда хизмат кўрсатган артист Алишер Файз,
ҳамда хонанда Баҳром Назаров ҳам келиб-кетишди.
Ўзбекистон Ёзувчилар уюшмаси аъзоси, шоир Ботир Эргашев ҳамда, хонанда Сайёраи Жаҳон шу ерда бўлишди.
Бугун эса, концертнинг илк куни!
“Истиқлол” санъат саройида!
Соат 19.00 да!
Санъаткорга омад тилаймиз ҳамда, бу йилги янги “Ардоғимдасиз” концерт дастури ҳам файзли ва кўтаринки руҳда ўтишига тилакдошмиз!
Саида Вахобова
Феруза Фаттохова
Фотолар учун фотограф Сардор Азимовга миннатдорчилик билдирамиз
