FATTOHHON.COM
« Все новости 
“Алишер Навоий” киносаройида франциялик фотограф, киноижодкор Марион Сталенс билан ижодий учрашув бўлиб ўтди. У кўплаб ажойиб фильмларни суратга олган бўлиб, улардан бири, III Олтин Гепард кинофоруми доирасида, Франция фильмлари дастури бўйича, намойиш қилинган “Жюльет Бинош бизнинг нигоҳимизда” фильмидир. Мазкур фильм жуда ҳам, таъсирли ва ҳаққоний суратга олинган бўлиб, у томошабинларга ҳақиқий Жюльет Биношни ортиқча ҳашамларсиз кўрсатиб бера олган. Фильмда машҳур актрисанинг ҳақиқий ҳаёти ҳаёти, унинг туйғулари, муҳаббати ва ижоди ҳақида ҳикоя қилинган.
Фильмда Жюльет Бинош шундай ҳикоя қилади: - Роль ижро қилиш истаги менга ҳаттоки яшашга ҳам халал берган. Менда роль ижро қилиш истаги мактабда ўқиётган вақтимда пайдо бўлган эди. Мен ўшанда ўз спектаклимни саҳналаштирганман. Ўзим декорациялар ўйлаб топганман, ўзим режиссёр ва ўзим актриса бўлганман! Ўшандаёқ, менинг хаёлларим чегара билмас эди!
Улғайгач, у ўзини кинодан топишга уриниб кўрди. Турли кастингларга қатнашди. Лекин, бари муваффақиятсиз эди. Унга кўпинча, “ташқи қиёфанг кинога мос эмас” дейишарди. Жюльетга кўпинча, кино шаҳри бўлган Лос-Анжелесга кўчиб ўтишни маслаҳат беришарди. “Ўша ердагина муваффақиятли карьера қилишинг мумкин”, дейишарди. Лекин, Жюльет Бинош қайсар эди, бундай маслаҳатларга жавобан “Ҳеч қачон! Мен француз актрисасиман ва шу ерда қоламан. Қаерда ҳоҳласам, ўша ерда суратга тушаман!” дерди.
Жюльет Бинош бизнинг нигоҳимизда” фильми томошабинларда катта таассурот қолдирди. Фильм мавзуси, Биношнинг ҳаёти барчани ҳайрон қолдирди.
“Қандай қилиб ўз гўзаллигингни асраб қолгансан?” деган саволга актриса жавобсиз кулиб қўяди.
“Мен аслида уй ва ижод ўртасидаги аёлман холос”, дейди у, фильм давомида, Кундалик уй юмушлари билан ўзи шуғулланаётган актриса. Шу тарзда, у баъзи саволларга ўз ҳаракатлари билан жавоб қайтаради.
Фильмда томошабинлар машҳур актрисанинг яна бошқа ижодий қирралари билан ҳам танишдилар. Жумладан, унинг рақс ва рассомлик борасидаги маҳоратларидан! У бетакрор суратлар чизади. Бу у учрашган, бирга фаолият олиб борган инсонлар, ижодкорларнинг суратларидир. У бу суратларда ўша инсонлар билан илк учрашувдаги таассуротларни, уларнинг кўзларидаги туйғуларни акс эттиришга ҳаракат қилади.
Марион Сталенс: - Мен бу фильмда, экранларда ўз образлари билан намоён бўлган Жюльетни Биношни ортиқча ҳашамларсиз, самимий қиёфасини очиқ-ойдин. Ортиқча бўёқларсиз кўрсатишга ҳаракат қилдим. Гўёки камалак ранглари оғушида, унинг кундалик ҳаёти, туйғулари, кечинмалари акс этган. Томошабинлар фикри мен учун муҳим, албатта. Ҳар бир томошабин бу фильмни ўзича талқин қилади, лекин шу билан бирга ўзи учун Жюльет Биношнинг қайсидир бир қиррасини кашф эта олади, деб ўйлайман. Бу фильм билан шуни айтмоқчиманки, Жюльет қанчалик машҳур бўлса ҳам, актриса, рассом, раққоса, барчасидан ҳам аввал у инсон! Ҳақиқий инсон! Бу фильмда унинг инсоний жиҳатларини, оддий бир инсон сифатидаги ҳаётини ҳам акс эттиришга ҳаракат қилдим.
Фильм давомида, Жюльет Биношнинг эмоцияси рақс билан кўрсатиб беришга ҳаракат қилинган. Унинг туйғулари, ички кечинмалари...
Унинг сирли ва меҳнатга тўла ҳаёт йўли! У қандай образга киради? Ҳар бир фильмдаги ролига қандай тайёргарлик кўрган? Ролни ўрганиш, ҳис этиш жараёнлари... У нуфузли “Оскар” мукофотини қўлга киритган лаҳзалар... унинг кўзёшлари... Унинг фильмларидан парчалар... У суратга олган биринчи қисқа метражли фильмнинг ишланиш жараёнлари... барчаси, Жюльет Бинош ҳақида ҳикоя қилади. Фильм томошабинларга улар билган Жюльет Биношнинг улар билмаган тарафларини кўрсата олган!
Фильм тугаши билан томошабинлар томонидан Марион Сталенсга саволлар ёғилиб кетди.
- Фильмда Жюльет Бинош “режиссёрга бутунлай тобеъ бўлиш керак эмас, унга қаршиликлар ҳам кўрсатиш керак” деди. У сизга ҳам қаршилик кўрсатган, бўйсунмаган вақтлари бўлдими?
- У актриса! Биз унинг одатий кунларини ва ижодий жараёнларини суратга олганимизда, у тарафидан ҳеч қандай қаршиликлар бўлмади! Лекин, унинг суратлари кўргазмаси бўлганида, у кадр ортида қолишни сўради, чунки у жуда ҳам ҳаяжонда эди! Шуни айтишим мумкин, Жюльет жуда ҳам таъсирчан, меҳрибон инсон. У ўзи киришган ҳар бир лойиҳа ва ишга, ўзини бутунлай бахт этади!
- Бу фильмда Жюльет Бинош ҳақида нафақат актриса, балки сизнинг опангиз сифатида ҳам, сўз кетмоқда. Ўз опангизда фильмни суратга олиш вақтида қандайдир бир ўзгача жиҳатларни сездингизми?
- Бу фильмни суратга олиш вақтида, мен ўзим ҳам бутунлай бошқача Жюльет Биношни кўра олдим! Уни актриса ва инсон сифатида, янада чуқурроқ имкониятларини, жиҳатларини кўра олдим.
Ижодий учрашув бир нафасда ўтди, дейиш мумкин. Томошабинлар Марион Сталенсдан ажралишни истамаётганликлари кўриниб турарди. Фильм уларнинг қалбига чуқур кириб борганлиги, билиниб турарди.
Актриса Жюльет Бинош ҳақида маълумотлар:
1964 йил 9 март куни Франциянинг Париж шаҳрида туғилган.
Отаси Жан-Мари Бинош ҳайкалтарош ва театр режиссёри, онаси Моник Стэленс театр актрисаси. Жюльет болалигидан расм чизишни яхши кўрган ва профессионал театр актрисаси бўлишни орзу қилган.
Париждаги Миллий Драматик санъат консерваториясида таҳсил олган. 1980 йилдан буён профессионал саҳнада. 1982 йилда илк марта, “Ажойиб озодлик” фильмида суратга тушган! Кўплаб фильмларда роллар ижро қилган. 1997 йилда “Инглиз бемори” фильми учун “Оскар” мукофотига сазовор бўлган. Шунингдек, бу фильмдаги роли учун у Берлин фестивали мукофотига, Буюк Британия Академияси мукофотига ҳам сазовор бўлган!
Жюльет Биношга халқаро машҳурликни поляк режиссёри Кшиштоф Кислёскийнинг “Уч ранг: Кўк” фильми келтирган. У бу фильмдаги роли учун “Сезар” мукофотини ҳам олган.
Жюльет Бинош 2 фарзанднинг онаси, 1993 йилда ўғли Рафаэль дунёга келган, 1999 йил 16 декабрда эса, қизи Ханна туғилган.
Саида Вахобова
Феруза Фаттохова
МАЗКУР УЧРАШУВ ҲАҚИДА ОН-ЛАЙН ТИЗИМИДА, ҚУЙИДАГИ ИЖТИМОИЙ ТАРМОҚЛАР ОРҚАЛИ ҲАМ КУЗАТИШИНГИЗ МУМКИН.
ИНСТАГРАММ - http://www.iphoneogram.com/u/297223664
ФЕЙСБУК- https://www.facebook.com/feruza.fattokhova?ref=tn_tnmn
ТВИТТЕР - https://twitter.com/FeruzaFattohova
В КОНТАКТЕ - http://vk.com/fattokhova
ИНСТАГРАММ - http://www.iphoneogram.com/u/390779250
ФЕЙСБУК - https://www.facebook.com/saida.fattohhoncom
ТВИТТЕР - https://twitter.com/SaidaVahobova