FATTOHHON.COM

« Все новости

“ВИЖДОН” ФИЛЬМИ, III ОЛТИН ГЕПАРД КИНОФОРУМИНИНГ “ТОМОШАБИН БИЛАН ҲАМНАФАС” ДАСТУРИНИНГ ИЛК ПРЕМЬЕРАСИ! 21.10.2013 11:23

III Олтин Гепард Кинофорумининг “Томошабин билан ҳамнафас” дастури (нодавлат студияларда суратга олинган фильмлар миллий фестивали) доирасида, 20 октябрь куни «Алишер Навоий» номли (собиқ “Панорама”) киносаройида режиссёр Аҳмаджн Унарбоевнинг “Виждон” фильми премьераси бўлиб ўтди.

Премьерадан аввал, анъанага кўра, “Виждон” фильми ижодий гуруҳи, ҳамда кўплаб таниқли ижодкорлар қизил йўлакчадан ўтдилар. Жумладан, Ўзбекистон Халқ артисти Эркин Комилов, Ўзбекистон Халқ артисти Турғун Азизов, Ўзбекистон Халқ артисти Лутфулла Саъдуллаев, Ўзбекистонда хизмат кўрсатган артистлар Гулчеҳра Саъдуллаева, Саида Раметова, актриса Ойша Жўраева, актриса Муяссар Бердиқулова, актёр Миролим Қиличев, актриса Муқаддас Саъдуллаева, режиссёр ва актёр Соҳиб Аббосхон, сценарист ва журналист Феруза Фаттохова, режиссёр Ориф Йўлдошев, актёр ва продюсер Камолиддин Қосимов, хонанда Динейра, “Манго” гуруҳи ва бошқалар...

Қизил йўлакда, таниқли телебошловчи (хонанда) Ойхон Ифорзода ва телерадиожурналист Акмал Мирзо барча ижодкорларни томошабинларга таништириб бордилар.

Кинотеатр фойесида ҳам, махсус концерт уюштирилиб, унда хонанда Динейра ўз қўшиқлари билан барчани қувонтирдилар.

Сўнг, кинотеатрнинг катта залида ҳам, мини концерт бўлиб ўтди. Унда хонандалар Умидахон, “Манго” гуруҳи, Нилуфар, ҳамда (актёр ва телебошловчи) Отабек Муталхўжаев ўз қўшиқлари билан томошабинлар олқишига сазовор бўлдилар.

Мини-концертни ҳам, телебошловчи (хонанда) Ойхон Ифорзода ва Телерадиожурналист Акмал Мирзо олиб боришди.

Нилуфар “Тилим қурсин” фильми саундтрекидан сўнг, “Тантанам мани” қўшиғи билан кўпчиликни рақсга туширган бўлса,

Отабек Муталхўжаев билан томошабинлар гўёки ҳинд киноси “Вир ва Зара” оламига саёҳат қилгандек бўлдилар. Чунки, Отабек Муталхўжаев, ҳозирги кунда кўпгина шов-шувларга сабаб бўлган “Вир ва Зара” фильми саундтрекларини Дилноза исмли ёш хонанда билан биргаликда дуэт тарзида саҳнада куйлашди.

Отабек Муталхўжаев ижодидаги бу янгилик ҳақида, аввал ҳам сайтимизда маълумот берганмиз. МАЪЛУМОТГА ЎТИШ!

Ҳозирда эса, Отабек Муталхўжаевнинг ижодида айнан шу ҳиндча қўшиқ сабаб, жуда катта ўзгариш бўлиши кутилмоқда! Аввалига бу қўшиқ билан Ҳиндистондаги қўшиқлар фестивалида қатнашган Отабекнинг ижоди, ҳозирда ҳинд режиссёри ва продюсери Умеш Меҳранинг эътиборини тортган ва Отабекка ижодий таклиф билан мурожаат ҳам қилди! Бу ҳақида, кейинроқ, батафсил сайтимизда!

Мини-концертдан сўнг, премьерани актёр Миролим Қиличев олиб борди.

Фильм ижодкорлари саҳнага таклиф қилиндилар.

Сўнг, биринчи бўлиб, сўз “Ўзбеккино” Миллий агентлиги Бош директори Жаҳонгир Қосимовга берилди.

Жаҳонгир Қосимов “III Олтин Гепард” Тошкент Халқаро Кинофорумининг ўзбек киноси учун қанчалик аҳамиятли эканлиги ва бугунги премьера қилинаётган фильм ҳақида ўз фикрларини баён этди.

Шундан сўнг, фильм ижодкорлари таништирилдилар.

Режиссёр Аҳмаджон Унарбоев

Бош ролда Ўзбекистон Халқ артисти Эркин Комилов

Шунингдек, ролларда, Ҳамид Тошпўлатов, Ойша Жўраева, Муқаддас Бердиқулова, Баҳодир Қосимов, Соҳиб Аббосхон, Миролим Қиличев, Ёрқиной Ғозиева ва бошқалар...

Ўзбекистон Халқ артисти Эркин Комиловга алоҳида сўз берилди ва у киши барчага ўз миннатдорчилигини билдирди.

Фильм намойиши бошланди.

Фильм соғлом оила шаклланишида маҳалланинг ўрни юксаклиги, ҳозирги кунда унинг кундалик турмушда амалга ошираётган ижобий ишлари, маҳалла оқсоқоли ва фаолларининг маҳалла ҳудудида истиқомат қилаётган маҳалладошларининг тинч-хотиржамлиги ва ёш авлодни маънавий ва ахлоқий тарбиялаш борасида масъуллиги, ёш оилалар тарбиячиси, маслаҳатдоши, кўмакчиси ва қалқони бўлаётгани ҳақида, ҳикоя қилади.

Томошабинлар мазкур фильмни, ҳозир эмас, декабрь ойида, кинотеатрларда кўришлари мумкн бўлади.

Саида Вахобова