FATTOHHON.COM
« Все новостиДАВОМИ 2-ҚИСМ!
“Оллоҳимга айтиб бер” қўшиғини санъаткор тайёр бўлиши билан томошабинларга илк бор тақдим этар экан, қўшиқ олдидан қуйидаги сўзларни айтиб ўтди: - Интернет орқали, Суриядаги уруш қурбони бўлган ёш боланинг сўнгги сўзлари, бутун оламни ларзага солди, десам хато бўлмайди! Шифокорлар оғир яраланган боланинг ҳаётини сақлаб қолишга қанча уринишмасин, барча ҳаракатлар беҳуда кетди. Эндигина 3 ёшга кирган норасида ўзининг ўлишини сезиб, ўлим олдидан кўз ёшлари юзини ювиб, шундай деди “Ҳаммангизнинг устингиздан Оллоҳга арз қиламан, ҳаммасини унга айтиб бераман.”
Санъаткор томошабинларга агар қўшиқ уларга манзур бўлса, репертуарда қолдиришини айтди ва қўшиқ илк марта ҳеч қандай роликсиз тақдим этилди. Лекин, санъаткорнинг таъсирли ижроси ва дардли қўшиқ томошабинларни шунчалик ҳайратга солдики, қўшиқ тугаб улгурмай қарсаклар тинмади ва шу ернинг ўзида томошабинлар қўшиқ репертуарда қолишини талаб қилишди! Натижада, қўшиқ репертуарда қолдирилиб, концертнинг 3-4 кунларидан саҳнадаги экранда унга мос видеоролик ҳам тақдим этила бошланди. “ОЛЛОҲИМГА АЙТИБ БЕР” ҚЎШИҒИНИ ВИДЕОСИ ВА МР3, МАҚОЛАГА ЎТИШ!
Озодбек Назарбеков қўшиқдан сўнг урушни қоралаб, шундай деди: - Ер юзида ёш, норасида болаларнинг қонини тўкишдан кўра оғирроқ жиноят бўлмаса керак! Наҳотки, шуларни кўриб, инсонлар ақлини йиғиштирмаётганлигига ҳайронман! Энг муҳими, биз Юртимиздаги тинчликни асрайлик, Юртимизни асрайлик! Бундай офатлар ҳеч қачон бизнинг Юртимизга соя солмасин! Бунинг учун албатта, ҳар биримиз масъулмиз! Ҳар биримиз мана шу фаровон ҳаётнинг қадрига етиб, унинг ҳар бир дақиқасини кўзимизга суртиб, яшайлик. Бугунги бахтимизни англашимиз керак! Чунки, биз излаган бахт, аслида шу тинчлигимиз, Юртимиз тинчлиги! Мана, қаранглар 2 соатдан буён концертдамиз, ҳеч ким оиласи, фарзандлари, уйи ҳақида ўйлаб, хавотир олиб, ташвиш чекаётгани йўқ, чунки биламиз, уйимиз тинч, фарзандларимиз хотиржам, сабаби тинч ва фаровон юртдамиз! Шу юртда яшаётганлигимизнинг ўзи бахт! Бизнинг фарзандларимиз биздан ҳам, бахтли яшашсин! Фарзандларимизни тинч, фаровон Юртимизда биздан ҳам бахтли бўлишларига ишонамиз! Ер юзидаги энг бахтли халқ бўлса, бу бизнинг халқимиз! Ана шу бахтимизга кўз тегмасин!
Бу қўшиқ концертнинг ҳар бир кунида томошабинларни ларзага солди, тинимсиз, баъзи кунлари бир неча минутлаб тўхтовсиз қарсакларга сабаб бўлди! Қўшиқни тинглаб, Юрт тинчлигига шукрона айтганлар ҳисобсиз эди...
“Гулғунчасан”, “Лайли”, “Гулюз”, “Мени ул бевафо қотил, бу оқшом телбаю қилди” (Огаҳий ғазали), “Қорли-қорли”, “Жонинг соғ бўлсин”, “Мени ул бевафо қотил, бу оқшом телбаю қилди” (Огаҳий ғазали), “Шайдо қилибсен”, “Атиргул”, “Қалдирғоч” қўшиқларига “Тумор” рақс гуруҳи томонидан рақслар ижро қилинди.
“Мени ул бевафо қотил, бу оқшом телбаю қилди” (Огаҳий ғазали) қўшиғидан сўнг, санъаткор бу қўшиқни ижро қилиш сабабини изоҳлаб, агар буюк шоирларимизнинг ғазаллари куйга солиниб, ижро қилинса, авлоддан авлодга ўтиб боришини, ёшларимиз ҳам, улардан баҳраманд бўлишлари мумкинлигини айтиб ўтди.
“Оёғингни қучиб йиғлагим келди” қўшиғи томошабинлардан сўровномага кўра ижро қилинган қўшиқлардан бўлиб, санъаткор уни куйлаш олдидан, қўшиққа оид таъсирли воқеани ҳам сўзлаб берди. Яъни, бир аёлнинг умр йўлдоши вафот этади ва унинг жасадини олиб келишганида, аёл уни бағрига босмоқчи бўлганида, уни “бу иш нотўғри” деб, қайтаришади. Шунда аёл “ҳеч бўлмаса оёғини қучиб йиғлай” деб, кўз ёш тўкади. Ана шу ҳолатдан таъсирланган шоира, бу шеърни ёзган экан.
“Онам бор-ку” қўшиғидан сўнг эса, санъаткор эса, “Онажонлар уйимизнинг фариштасисизлар! Бахтимизга соғ бўлинглар!” деб самимий тилакларини айтиб ўтди.
“Дўмбирам” қўшиғига эса, йигит раққослар миллий чопонларда, лекин замонавий брек денс услубида шўх рақсга тушишди!
Концертдаги ҳар бир қўшиқ учун, экранларда ўзига хос тасвирлар намойиш этиб борилди. Масалан, “Қорли-қорли” қўшиғи учун, раққосалар қор парчалари монанд кийинган бўлишса, экрандаги соат, нозик қор учқунлари қиш тароватини ёдга солди.
“Атиргул”да бир раққоса қизил, қолганлари сариқ гуллар ифода этилган либосларда чиқишди,
шунинг баробарида экранда очилаётган атиргул ва ёғилаётган гул япроқлари намоён бўлди.
“Девонаман” қўшиғида эса, экранда чироқлар ёғдуси турли рангларда берилди, ҳамда “Ул қаро икки кўзинг...” сатрида экранда кўзлар тасвири ҳам намоён бўлди.
Муҳриддин Холиқов репертуаридан куйланган “Ёнимда қол” таронасига санъаткор алоҳида ёндошганлиги сезилиб турарди. Қўшиқ ижроси вақтида санъаткорнинг ёнида Муҳриддин Холиқовнинг созандаси Искандар Муродов мусиқаси янгради.
Қўшиқ мусиқаси янграши билан оппоқ тутун саҳнадан худди денгиздек кўпириб, тошиб чиқиши жуда чиройли чиқди! Қолаверса, экранларда дарахт гуллари узра учаётган нафис капалаклар тасвири намоён бўлди ва қўшиққа янада ўзгача руҳ бағишлади! Қўшиқдан сўнг, янграган олқишларни санъаткор “бу устозимга бўлган ҳурмат, у кишининг ҳар бир таронаси мухлислар қалбидан ўрин олган” дея, эътироф этиб ўтди.
Бобур ғазали билан куйланган “Лола” қўшиғи янграши олдидан санъаткор чироқ усталаридан залдаги барча чироқларни ўчиришларини талаб қилди.
Чунки, қўшиқ ижроси бошланиши билан томошабинлар қўл телефонларини ёқиб, залда ёғдулардан ўзига хос романтик ҳолатни намоён этишди!
Бу вақтда экран орқали кенг лолазор тасвири намойиш этилди!
“Қалдирғоч” қўшиғи аслида Ватан ҳақидаги тарона бўлиб, унинг ҳар бир сатридан Ватанимизнинг самимий таърифи сезилади. Мазкур қўшиқ ижроси вақтида экраннинг икки четида Ватанимиз байроғи тасвири пайдо бўлди. Бу қўшиқ томошабинлар тилига шунчалик ўрнашдики, концертнинг ҳар бир кунида томошабинларнинг кўплари қўшиқ сўзларини такрорлаб ўтиришди.
Қолган шўх ва талаб қилинган қўшиқлар вақти экрандан чироқлар ёғдуси ҳамда, томошабинлар рақслари ўзига хос жўшқинлик касб этди. Саҳнадан ташқари, икки тарафдаги деворга ўрнатилган 2 та экранда санъаткор, созандалар ва раққосалар ўрин алмашиб, бевосита саҳнадан тасвирлар кўрсатиб борилди.
Озодбек Назарбековнинг томошабинларга қарата самимийлик билан: “Сизлар бизга куч берасиз! Сизларни қўллаб-қувватлашларингизсиз биз ҳеч киммиз!” деган сўзлари томошабинларни янада руҳлантириб юборди!
Тўлиқ жонли ижрода, юқори савияда ўтган концертининг ҳар бир кунида, Санъаткор концерт якунида “Қалдирғоч” қўшиғидан сўнг, томошабинларга қарата “Раҳмат! Ҳамиша соғ бўлинглар! Агар биздан камчиликлар ўтган бўлса узр! Ҳамиша яхши кунларда, байрамларда, тўйларда кўришиш насиб қилсин! Ҳар бирингиз мен учун қадрлисизлар! Ҳаммангизни яхши кўраман! Ўзингизни эҳтиёт қилинглар! Омон бўлинглар!” деб самимий хайрлашди.
Санъаткорнинг “Бизнинг халқимиз санъаткорни эътиқод қилиб яхши кўради, эъзозлайди! Шунинг учун ҳам, фарзандларига унинг исмини қўйиб, фарзандларини инсон сифатида ҳам унга ўхшашини истайди!” деган мазмунли сўзлари бор. 19 кун давомида бўлиб ўтган концертга, санъаткорнинг маданияти, маънавиятига, саҳнада ўзини тутишидан тортиб, айтаётган гапларигача аҳамият берсак, демак, Халқимиз қайси санъаткорни эътиқод қилиб, нима учун эъзозлашни яхши билади!
Чунки, Озодбек Назарбеков нафақат тиним билмай ижод қилиши, санъати, жонли ижроси, балки ҳақиқий санъаткорга, инсонга хос бўлган хислатлари билан ҳам барчага ўрнак бўлмоқда! “Агар биздан камчиликлар ўтган бўлса узр!”, бундай сўзларни фақат ҳақиқий санъаткоргина айтиши мумкин.
Шунча кун давомида тўлиқ жонли ижродаги концертлари томошабинлар томонидан юқори баҳоланаётган бир вақтда, уларнинг чексиз олқишларини кўриб туриб, камтарлик билан “камчиликлар” учун узр сўрай олиш, кибрга берилмаслик, ҳақиқий инсонларга хос хислат!
Чиндан ҳам, бу санъаткорни халқ эъзозласа арзийди!
Саида Вахобова
Феруза Фаттохова
Фотолар учун фотограф Муҳаммадалига алоҳида миннатдорчилик билдирамиз
Концертдан видеолар Инстаграм тармоғидаги Saida_Vahobova_Fattohhoncom профилида, ҳамда Fattohhoncom профилида
14 апрель куни Санъаткорни "Зиннура" фан-клуби аъзолари ҳам қўллаб-қувватлагани келишди!
