FATTOHHON.COM
« Все новости“Дом стиля” Ўзбекистон дизайнерлари уюшмаси кўплаб дизайнер ёшлар учун ижод билан профессионал даражада шуғулланиш шароитини яратади. Шунингдек, пойтахт ва чекка ҳудудларда фаолият юритаётган дизайнерлар имкониятларини тенглаштириш чораларини ҳам амалга оширади.
“Дом стиля”нинг Бош дефилеси ҳамиша кутилган тадбир бўлиб, унда Европа ва Осиёнинг жаҳонга машҳур дизайнерларини, мода уйларининг вакилларини, фешн ва заргарлик брендлари раҳбарларини, жаҳон эстрада юлдузларини, мода журналлари муҳаррирларини ҳам томошабинлар қаторида кўриш мумкин.
Бу йил ҳам, “Ёшлар ижод саройи”да бўлиб ўтган тақдимотда “Дом стиля”нинг энг маҳоратли дизайнерлари ўз тўпламларини намойиш этдилар.
Тадбирни журналист ва бошловчи Нилуфар Сотиболдиева олиб борди.
Ўзига хос креатив тарзда безатилган подиумда одимлаётган моделлар эгнидаги либосларда, Шарқона жилолар билан биргаликда замонавийлик ва нафислик мужассам эди.
Биринчи бўлиб, дизайнер Артём Дробыш моделлари намойиш қилина бошланди.
Либослар учун асосан, яшил, кўк, сиёҳранг ранглардан фойдаланилган. Этаги пастга томон кенгайиб борувчи юбка, узун кўйлакларга урғу берилган. Либослар ичида заррин адрас кўйлак ва адрас юбка айниқса, эътиборни ўзига тортади. Ғайриоддий акссессуарлар, яъни белбоғ, билакузук, зирак ва маржонлар эътиборни тортади. Моделларнинг сочлари ҳам иккита ўрилган, кундалик макияжда.
Кейинги либослар тўплами дизайнер Лида Андрэга тегишли бўлиб, либослар учун асосан ёрқин ранглар танланган! Куз ва қишнинг сокин ва совуқ кунларида, бу либослар кайфиятини кўтариши шубҳасиз. Ёрқин қизил, оқ, яшил, сиёҳранг, кулранг ва қора ранглардан усталик билан фойдаланилган. Бу либосларни асосан, байрамлар, турли кечаларга кийиш мумкин. Узун креатив, башанг кўйлаклар, юбкалар айниқса, эътиборни тортади. Моделларнинг сочлари ҳам креатив кўринишда ва пардоз учун ёрқин креатив макияжлардан фойдаланилган.
Саодат Муродхўжаева либослари асосан, қиш фаслига мўлжалланганлиги ва креативлиги ҳамда, миллийлик билан моҳирона уйғунлашганлиги эътиборни тортади. Либосларда оқ, тўқ кўк, сиёҳранг, қаймоқранг, кулранг ва оқ ранглардан фойдаланилган. Калта адрас юбкалар, ўзгача креатив бош кийимлари билан биргаликдаги креатив пальтолар ва пиджаклар, қишнинг совуқ кунларида ҳам, байрамона либосларда юришни истаган мода ихлосмандларининг дидига жуда мос келади.
Муниса Асқарова либослари учун асосан сокин ранглардан фойдаланилган. Лекин, либослар ичида ёрқин қизил кўйлак ҳам бор. Шунингдек, атласдан тикилган комплект яъни, кўйлак билан чопон жуда ҳам ажойиб ва замонавий. Калта адрас юбкалар, туникалар, сумкалар, узун адрас кўйлаклар барчанинг эътиборини тортди.
Беҳруз Ҳамзаевнинг эркаклар учун яратган либосларида ҳамиша миллийлик ва замонавийликнинг уйғунлашувини кузатиш мумкин! Унинг янги либослар тўпламида ҳам шу жиҳатларга урғу берилган. Масалан, ўзбекона смокинг, тўпламнинг энг асосий хитларидан бири назаримизда. Шунингдек, либосларнинг деярли барчаси ўзбекона дўппи билан кийилиши, кўпгина либосларда оёқ кийими махси ва этик бўлиб, ўзбекона чопон, телпак ҳам, эътиборни тортади. Либосларда қора, кулранг, кўк ранглардан ва адрасдан фойдаланилган. Либослар кўпроқ жадидлар даврини эслатади. Моделлар эса, зиёли жадидлар қиёфасида, кўзларида кўзойнак, баъзилари қўлларида китоблар билан подиумга чиқишди.
Тўплам сўнггида эса, катта ёшли инсонларга ҳам мос бўлган моделнинг намойиш қилиниши, айниқса, олқишларга сазовор бўлди.
Таисия Чирсеран либослар тўплами эса, моделларнинг бошидаги тож ва ўта креатив либосларни миллий матолардан тикилганлиги билан эътиборни тортади.
Таисия Чирсераннинг иккинчи либослар тўплами эса, асосан узун оқшом либосларидан иборат бўлиб, креатив рангли соч турмаклари ярқ этиб кўзга ташланади. Кулранг, кўк қора ранглар, айниқса, қора атлас матосидан алоҳида дид билан фойдаланилган. Қора атласни шифон билан уйғунлаштирилганлиги жуда нафис чиққан.
Елена Миллерген либосларида ўзгача бир ёрқинлик мужассам. Ёрқин гулли юбкалар, кўйлаклар, шимлар ва ёрқин акссессуарлар либосларни ярқ этиб кўзга ташлантиради. Айниқса, узун креатив зираклар дарҳол эътиборни ўзига қаратади.
Дилдора Қосимова либослари асосан адрас ва атласлардан яратилган бўлиб, ўта ҳашамдорлиги ва шу билан бирга жиддийлиги билан эътиборни тортади. Соч турмаклари ҳам либосларга мос равишда турмакланган бўлиб, подиумда одимлаётган моделлар, бу либосларда ўрта аср маликаларини эслатадилар. Бу либослар айниқса, турли кечалар ва оқшомлар учун жуда ҳам мос.
Зулфия Султон либослари, ўта нафис ва нозиклиги билан эътиборни тортади. Асосан, шифон ва юпқа матолардан фойдаланилган бўлиб, нафис оқшом либослари, куз ва қишнинг совуқ кунларида, кўнгилга баҳор ҳароратини олиб киргандек бўлади.
Guli бренди либосларига навбат келганида, илк подиумга чиққан моделнинг либоси дарҳол эътиборни ўзига жалб этди! Аслар оша келаётган миллий анъаналаримизнинг замонавийлик билан бирдек профессионал уйғунлиги, бу либосларининг асосий жиҳатларидан бири, деб ўйлаймиз.
Миллий матолардан тикилган нафис юбкалар, қуроқдан тикилган бриджи, ёрқин кўйлаклар,
нафис оқшом либослари, ҳамда
адрас чопонлар,
креатив акссессуарлар, атлас клетч, катта нақшинкор сумкалар, барча учун ҳақиқий янгилик сифатида жуда ҳам манзур бўлди!
Либослар намойиши якунида Гулнора Каримова саҳнага чиққанида, барча тик туриб олқишлади.
“Менга бу ҳафталикнинг ниҳоясига етганлигини айтиш ҳам ҳаяжонли ва ҳам қийин. Чунки, барча бу ҳафталикни орзиқиб кутишган. Мен бу ҳафталик ўзига хос брендга айланганлигидан хурсандман. Фақатгина унда иштирок этадиганлар учунгина эмас, балки нафақат Тошкент, балки бутун Ўзбекистон учун ҳам ҳақиқий байрам. Чин дилдан барчангизга катта раҳмат!” деган сўзлар билан Гулнора Каримова Art Week Style.Uz-2013 санъат ҳафталигига якун ясади.
Шундан сўнг, Art Week Style.Uz-2013 санъат ҳафталиги лауретларини тақдирлаш маросими бўлиб ўтди.
Лауреатлар Дилноза Эркинова, Денис Тамилин, Моҳигул Каримова, Ирода Агзамхўжаева, Нилуфар Юнусхўжаеваларга, Гулнора Каримова томонидан Art Week Style.Uz-2013 санъат ҳафталигининг рамзи бўлган махсус статуэтка соврин ва дипломлар топширилди.
Шунингдек, Бош дефиле доирасида, лойиҳа муаллифи Гулнора Каримова томонидан, Миллий либослар фестивалининг энг яхши иштирокчилари Клара ва Рухшона, Нодира Арапова, Наргиза Хўжамқуловага янги тўпламлар яратиш учун махсус грантлар топширилди.
Лола хонанда: - Бундай тадбирда биринчи марта иштирок этишим. Ўзи доим иштирок этишни истардим, лекин бироз вақт етишмасди. Мана бугун, келиб, либослар намойишини кузатдим. Менга ҳамма коллекциялар ёқди. Бизнинг модельерларда профессионаллик даражаси юқори эканлигига, яна бир бор амин бўлдим. Бу мени жуда ҳам қувонтиради. Guli коллекцияси либосларини алоҳида эътироф этишга муносиб, деб биламан. Либослардаги ранг-баранглик, ўзига хослик бу коллекцияни дарҳол ярқ этиб кўзга ташлантиради. Ундаги либосларда миллийлик ва замонавийлик, жуда ҳам чиройли уйғунлашган. Модельер Зулфия Султоннинг либослари ҳам маъқул бўлди. Бу модельерни ҳам ҳурмат қиламан ва у билан ҳамкорликдаман. Бир неча либосларим айнан унинг коллекциясидан. Унинг либослари ҳам нафис, ҳақиқий хонимларга хос назокатга эга. Бугун ажойиб коллекцияларни мен ҳам биринчилардан бўлиб кўрганлигимдан хурсандман ва барча модельерларга келгуси фаолиятида омадлар тилайман!
Оксана Пушкина телебошловчи, актриса: - Менга бугунги модалар намойиши жуда ҳам маъқул бўлди. Айниқса, Guli коллекцияси! Guli коллекцияси бўлганлиги учунгина эмас, унинг либосларида ҳеч қаерда учратилмайдиган ўзига хослик мужассам. Бошқа коллекциялар ҳам, асли хориж модельерлариникидан устун бўлса устунки, лекин профессионалликда сира қолишмайди! Менга Art Week Style Uz ҳафталиги жуда ҳам манзур бўлди. Кўплаб тадбирларда қатнашишга ҳаракат қилдим. Кўплаб таассуротлар олдим.
Саида Вахобова
Феруза Фаттохова
Фотолар учун X Frame Media Production студияси фотографи Аҳрор Назировга миннатдорчилик билдирамиз.
