FATTOHHON.COM
« Все новости 
6 май куни Discovery магазинида “Ниҳол” мукофоти совриндори Манзуранинг янги альбом тақдимоти бўлиб ўтди. Мазкур тақдимотда нафақат унинг мухлислари, балки шоу бизнес оламидаги дўстлари, ҳамда ОАВ вакиллари ҳам иштирок этишди.
Жумладан, “Эътироф” ва “Ниҳол” мукофотлари совриндори Улуғбек Раҳматуллаев,
Ўзбекистонда хизмат кўрсатган артист Самандар Ҳамроқулов,
хонанда Ирода Дилроз,
хонанда Ойбек (Ойбек ва Нигора дуэти),
актёр ва режиссёр Дилшодбек Каттабеков, актриса Феруза Собитова,
стилист Февзи,
хореограф Наримон ва бошқалар...
Альбом тақдимоти давомида Манзура шу йил бошида бўлиб ўтган илк яккахон концерти, қўшиқлари ва клиплари ҳақида, ҳам шу кунлардаги ижодий янгиликлари тўғрисида маълумотлар бериб ўтди.
Шу куни Манзуранинг 3 та диски сотувга чиқарилганлиги маълум қилинди. Яъни, унинг тўлиқ клиплар DVD тўплами, унинг қўшиқларидан иборат МР3 тўплами, ҳамда бўлиб ўтган яккахон концерт дастурининг DVD диски.
Мазкур тақдимотда Манзуранинг фан-клуби аъзолари ҳам фаол иштирок этишди.
Тақдимотда Манзура барча дўстлари ва ОАВ вакилларини номма-ном ёнига чорлаб, уларга алоҳида миннатдорчилик билдирди.
Ўз навбатида улар ҳам Манзурани самимий табриклаб, унинг келгуси ижодий фаолиятига омад тилашди.
Тақдимотдан сўнг ҳам, Манзура журналистларнинг айрим саволларига алоҳида жавоб бериб ўтди. Шунингдек, махсус таклифнома билан таклиф этилган ОАВ вакиллари ва бошқаларга Манзуранинг янги альбомларидан тақдим қилинди. Тақдимот кўтаринки руҳда ўтди.
-Янги концерт дастурингизни DVD диски сотувга чиқди. Ҳозирда концерт дастурини экран орқали кузата туриб, ўзингиз қайси жиҳатларидан қониқмадингизу, қай жиҳатларидан кўнглингиз тўлди?
Манзура: - Мен ҳеч қачон ўзимдан қониқмайман! Концерт ҳақида айтишим мумкин, биринчи навбатда чиройли дуэтлар бўлди! Бу Мавлуда Асалхўжаева, Улуғбек Раҳматуллаев, “Божалар” ва “Элдидо” гуруҳлари билан куйлаган дуэтларим, ҳамда улар билан ўша номерлар менга жуда ҳам ёқди. Чунки, уларда нафақат менинг меҳнатим, балки уларнинг ҳам меҳнати сингган. Бундан ташқари, хореограф Наримоннинг рақс гуруҳи жуда ҳам чиройли ишлади. Қолаверса, менга ўзимни “Ўнгимда кўрай” қўшиғим бошқача ёқади, балки бу қўшиқни мен яхши кўрсам керак? Энди концертни мени қониқтирмаган жиҳатларига келсак, менимча, буни минус, деб бўлмайди. Ҳар бир йўл ўзича тўғри, муҳими интилиш, ҳаракат ва гўзалликни тақдим эта олиш! Лекин, келгуси концертимда экранлар билан кўпроқ ишлашни ҳоҳлардим. Чунки, бу ҳозирги кунда замон талаби. Қолаверса, ҳамкасбларим Шахзода, Шохруххоннинг концертларида бўлдим ва бу нарса менга жуда ҳам ёқди.
-Бир йўла 3 та диск чиқариш ғояси қаердан келди?
-Клиплар тўпламини 2-3 йилдан буён чиқармаётган эдим. МР3 тўпламимни эса, аввал чиқарганимда бир студия билан ишлаган эдим. Аммо, менга сифати умуман ёқмади! Ўйлайманки, бизнинг ўзбек мухлисларимиз сифатли маҳсулот олишга ҳақли, чунки улар бунинг учун пул тўлашади. Диск чиқараётган компания эса, авваламбор ўзини ҳурмат қилиши керак. Чунки, чиқарилаётган маҳсулот, диск, бу уларнинг юзи! Аввалги чиқарган аудиоальбомимда эса, масалан, машинада эшитмоқчи бўлишса, нечанчидир трек ўқилмаяпти, диск “сакраяпти”. Дисклар машина танлади! “Лицензион диск машина танлайди”, деган баҳона. Нормал диск, машина танламайди! Шунинг учун ҳам, мен қарор қилдим ва аудиоальбомимни ҳам бошқатдан чиқардим ва дискларни “сакраш-сакрамаслигини” текшириб ҳам кўрдим. Ҳаммаси жойида! Жуда ҳам сифатли диск!
- Клиплар тўпламингиздаги энг кўнглингизга яқин клип?
- “Ўнгимда кўрай” қўшиғимга суратга олинган клип. Клип режиссёри Мансур Васатига раҳмат айтаман. “Севги синов” қўшиғига ва Бунёдбек билан куйлаган “Дастингдан” дуэтига суратга олинган клиплар, “Борсан” клипи ҳам ўзимга ёқади. Санжар Маткаримов суратга олган, уларга ҳам алоҳида раҳмат!
Саида Вахобова
Феруза Фаттохова
Фотолар учун Сардор Азимовга миннатдорчилик билдирамиз
