FATTOHHON.COM
« Все новости 
Италиянинг Brunello Cucinelli бренди намойиши 25 октябрь куни Тошкентнинг “International Tashkent” меҳмонхонасида бўлиб ўтди.
Brunello Cucinelli авваламбор, ўзининг кашемир жемперлари билан машҳур бўлиб, каръерасини биринчи бўлиб, мана шу жемперлардан бошлаган эди. Албатта, Тошкентдаги намойишда ҳам, бу анъана четлаб ўтилмади.
Brunello Cucinelli нинг Тошкентда Art Week Style Uz санъат ҳафталигида намойиш қилинган “Куз/Қиш коллекцияси”да ҳақиқий куз муҳитини, кузги сокинлик ва романтикасини ҳис этиш мумкин эди.
Пианинода чалинган сокин классик мусиқа оғушида, подиум бўйлаб қадам ташлаётган моделларнинг эгнидаги либосларда ҳам, кузга мос ранглар, кўк, кулранг, жигарранг, қора ранглар доминантлик қиларди.
Аёллар учун куз кунлари асосан, шим билан калта ва узун пиджаклар, қалин шарф, ҳамда бош кийим учун турли фасондаги унча катта бўлмаган шляпалар тавсия этилди. Шунингдек, гамаж ва туника, уларнинг устидан эса калта курткалар билан биргаликда уйғунлаштириб кийиш, енги йўқ жемпер, узун свитер ҳамда, катта ёқали, лекин калта пальтолар, аёллар либослари, асосан шулардан иборат эди. Асосий жиҳати, пальтолар, пиджаклар, курткалар ва туникаларнинг ҳаммаси белдан пастга томон кенг тикилган бўлиб, бундай либосларни тўла жуссали аёллар ҳам бемалол кия олишлари мумкин. Оёқ кийимлари эса, 3 хил фасонда, баланд пошнали туфлилар, крассовкасифат оёқ кийимлари, ҳамда паст пошнали, қўнжи узун этиклар. Барча либослар, одатий кунларда кийиладиган бўлиб, баъзилари офис ходималари учун мос келади. Бунга мос равишда, моделларнинг соч турмаги ҳам, содда кўринишда ва ўзлари кундалик макияжда эдилар.
Эркаклар либослари эса, жиддий костюмлар билан почаси қайрилган жинси шимлар, тиззадан баланд узунликдаги пальтолар нақшли жемперлар, калта пиджаклар, классик костюм-шимлардан иборат. Эътиборни ўзига қаратгани эса, барча моделларда шимларнинг почаси қайрилган, оёқ кийимлари яққол кўриниб туриши кераклигида эди. Бу либослар ҳам кўпроқ кундалик кунда кийиш мумкин бўлган, асосан, иш учун қулай эди.
Brunello Cucinelli либослари асосан, консерватив услубга эга бўлиб, ўзгача дизайни ва кундалик кунда ҳам кийиш мумкин бўлган ўта қулайлиги билан ажралиб туради! Яна бир ўзига хос жиҳати эса, мазкур бренд либослари ҳеч қачон арзон нархда сотилмайди.
Ҳозирда “Кашемир қироли” деб ҳисобланган италиялик дизайнер Брунелло Кучинелли ҳаётидаги ҳамма муваффақиятларга ўз иқтидори ва тинимсиз меҳнат туфайли эришган. 1953 йил деҳқон оиласида туғилган Брунелло аввалига ўз модельер дизайнерлик фаолиятини 40 кв метрли кичик трикотаж фабрикасида бошлаган. Ҳеч ким уни келажакда машҳур дизайнер бўлиб, мода оламининг кўзга кўринган брендга асос солишини кутмаган ҳам эди... Лекин, унинг тинимсиз меҳнатлари беиз кетмади, унинг яратган либослари аввалига Европани, сўнг Американи ҳам забт этди. Унинг муваффақият сири ҳам оддий, асосийси унинг либослари тайёрланадиган асосий мато ҳисобланмиш кашемир матоси ишлаб чиқаришга мўлжалланган юқори сифатли материаллардир. Бугунги кунда унинг бош офиси Соломео шаҳрида жойлашган XIV асрда қурилиб, у қайта таъмирлатган қасрдир. Шундан буён, ўрта аср қасрлари тасвири, Брунелло Кукинеллининг логоти ҳисобланади. У ўз брендига 1978 йилда асос солган.
Каниза хонанда: - Брунелло Кукинеллининг либослари менга қулайлиги билан маъқул бўлди. Бу либосларни кундалик кунда бемалол кийиш мумкин. Айниқса, бугунги кунги коллекция либослари, ҳозирги куз кунларига жуда ҳам мос. Майин классик мусиқа ва кулранг либосдаги моделлар, менга кузнинг булутли кунларини ва ёмғирни эслатди.
Эльвира ёш дизайнер: - Брунелло Кукинеллининг либослар коллекциясини кўриб, тўғриси илҳомландим, десам ҳам бўлади. Мен бу бренднинг либосларини кўпинча интернетдан кузатиб боришга ҳаракат қиламан. Бу бренд либосларида биринчи навбатда мижоз учун қулай бўлишига аҳамият берилади. Яъни, сиз бу бренд кийими билан бемалол офисга ҳам, жиддий учрашувларга ҳам боришингиз мумкин. Қолаверса, бу бренд либослари ўта сифатли ҳамдир.
Саида Вахобова
Феруза Фаттохова
Фотолар учун X Frame Media Production студияси фотографи Аҳрор Назировга миннатдорчилик билдирамиз
