FATTOHHON.COM
« Все новости 
Art Week Style.Uz-2013 санъат ҳафталиги доирасидаги намойишлардан, таниқли икки ака-ука Дин ва Дэн Кейтенларнинг Dsquared2 бренди намойиши ҳам ўрин олган бўлиб, Dsquared2 сўзининг ўзи мода ихлосмандлари учун, муҳим аҳамият касб этади.
Бу номни мода ихлосмандларига таништиришнинг зарурати йўқдек. Чунки, Dsquared2 бу, мода оламида ранг ва либосларнинг ўзгача комбинацияси, аёллар ва эркакларнинг ёрқин креатив либослари, оёқ кийимлари, кўзойнаклари, парфюмерия ва косметика, ҳамда, ташқи қиёфа борасидаги қатъий тажриба, демакдир.
Dsquared2 маҳсулотлариннг муваффақият сири нимада?
Dsquared2 маҳсулотлари, инсоннинг ўзига бўлган ишончини оширувчи, мустақил, қатъиятли ва гўзалликни янада яққол ифода этиши билан эътиборни тортади.
Dsquared2 намойиши 23 октябрь куни Тошкентнинг “International Tashkent” меҳмонхонаси, “Амир Темур” залида бўлиб ўтди.
Намойиш мини-фильм тарзида бўлди. Уни ташкиллаштиришда, Ҳолливуд фильмларидан илҳом олинганлиги сезилиб турарди.
Залда биринчи бўлиб кўзингиз тушадиган нарса, бу саҳнага жойлаштирилган махсус декорация бўлиб, у чайлага ўхшаш бар тарзда бунёд қилинган бар эди. Бу худди Говайи оролларини, у ердаги барларни, ҳамда пляжни эслатарди. Бармен худди ҳозирнинг ўзида, сиз истаган ичимликни қуйиб узатадигандек, мижозлар хизматига шай турарди. Ташқарида, салқинлик ҳукм сурган куз оқшомидаги бу ҳолат, барчанинг ёдига, иссиқ ёз ва пляжни эслатиб юборган бўлса ажаб эмас. Ўша барга олиб борувчи орқа тарафдаги йўл эса, моделлар саҳнага чиқиб келадиган алоҳида подиум эди.
Мусиқа янграши билан, пляжда сайрга чиққандек, мана шу бар ёнидан, бирма-бир моделлар ўз либосларини намойиш қилган ҳолда ўта бошладилар. Биринчи бўлиб, калта, нафис кўйлакли модел намойишни бошлаб берди. Моделлар шунчаки либосларини намойиш қилибгина қолмай, балки баъзи бир ҳаракатларни амалга ҳам оширардилар. Масалан, улардан 3 нафари, бар ёнидаги ўриндиқларга ўтириб олганча, бармен йигит билан суҳбат қуриб, ўз либосларини намойиш қилаётган моделларга гоҳ қизиқиш, гоҳида эса, бепарволик билан назар ташлаб қўярдилар.
Намойиш учун мусиқа ҳам мос танланган бўлиб, пляжни ва барни акс эттирувчи бу декорация ҳамда, унга мос моделлар, томошабинларни бир зум бўлса ҳам, Гавайи оролларига хаёлан сайр қилдиргандек... Ҳаттоки, пляж ҳолати янада аниқ чиқиши учун, махсус чироқлар билан ёритиб ҳам турилди.
Моделлар эгнидаги либослар бир вақтнинг ўзида аниқ бичимлари, ёрқинлиги, нафислиги ҳамда, 70 йилларга хос услуби билан барчанинг эътиборини тортди.
500 дан ортиқ томошабинлар бу либосларга мафтун бўлганча, саҳнадан кўз узишмасди.
Улар орасида таниқли дизайнерлар, шоу бизнес олами вакиллари, ҳамда, хорижий меҳмонлар ҳам бор эдилар.
Гепард терисини эслатувчи матодан тайёрланган комплектлар, сумкалар, белдан пастга томон кенгайувчи ва ўртача узунликдаги қора, ёз мавзусимига мос аёллар кўйлаги, гепард терисига ўхшаш материалдан тайёрланган, белни маҳкам сиқиб турган камар билан уйғунлашган бўлиб, шунингдек капалакнусха ёзга мос қора кўзойнаклар, аёлларнинг пляжбоп панама шляпалари, барчанинг олқишига сазовор бўлди.
Аёллар либосларида асосан, 3 та рангли матолар доминантлик қилган, қора, оқ ва гепард терисини эслатувчи йўл-йўл матолар. Умуман, дизайнерлар бу гал, мазкур намойишдаги аёллар либосларида гепардни эслатиб, бу каби либосларда аёлларни қатъиятли гепард билан қиёс этган бўлишлари ҳам мумкин. Шунингдек, баъзи аёллар либосларида ҳам, шляпаларга ёрқинликка янада урғу бериш учун, ярқироқ матолардан ҳам иккиламчи сифатда фойдаланилган. Узун кўйлакларга мос равишда ёрқин макияж танланган.
Намойиш қилинган аёллар кўйлакларида сиз, ёзда учрашувларга, турли кечаларга боришингиз мумкин. Баъзи комплектлар эса, айнан пляжбопдир.
Эркакларнинг аниқ бичимдаги костюм-шимлари ҳамда соч услублари эса, Ҳолливуд актёри Ричард Гир ижросидаги “Чикаго” мюзиклини ҳам эслатиб юборди. Икки қатор тугмали (двух бортный) башанг эркаклар костюмлари, костюм рангидаги капалакнусха бўйинбоғлар билан уйғунлашган. Бундай костюм-шимда, кўзойнак таққан жиддий эркаклар қиёфалари, ҳақиқий жентельменларни акс эттирган. Пляжга дам олгани келган аёллар қиёфалари ёнида, жиддий костюм-шимдаги йигитлар, кўз олдингизда гўёки ҳозиргина бирор жиддий иш юзасидан учрашувга, ёки бирор тақдимотга кетаётган тадбиркорларни эслатади. Баъзи моделлар эса, кечки сайр учун ҳам мос. Ҳар бир либос ўзида ҳашамдорлик ва сиполикни муносиб равишда уйғунлаштира олган.
Намойиш сўнггида, икки ака-ука Дин ва Дэн Кейтенларнинг ўзлари ҳам, томошабинлар ёнига таъзимга чиқдилар ҳамда,
Фонд Форум Васийлик кенгаши Раиси Гулнора Каримовага ўз миннатдорчиликларини билдирдилар.
Андрей Михай Соатсозлик бўйича Швейцария компанияси вакили: - Dsquared2 намойишида биринчи марта иштирок этишим ва бу намойишда иштирок этиш насиб этганлигидан жуда ҳам хурсандман. Бугунги намойиш жуда ҳам ёрқин рангларда бўлди ва менга жуда ҳам манзур бўлди. Либослар, акссессуарлар билан жуда ҳам мос равишда уйғунлаштирилган. Эркаклар либосларидаги элегант услуб, айниқса, кўзойнаклар менга манзур бўлди. Art Week Style.Uz бу ҳақиқий санъат ҳафталиги экан, чиндан ҳам ҳафта давомида, санъат ва мода оламидан тўлиғича бохабар бўлиб, жуда катта маънавий базага эга бўлиш мумкин.
Antonio Garcia Lopes дизайнер Испания: - Ҳаммаси ниҳоятда ажойиб ўтди! Менга жуда ҳам ёқди! Ҳаммаси Европа услубида! Кўнглимда кечаётган ҳисларни таърифлашга сўз топишим ҳам мушкул. Бу намойишда ўзига хослик бор, шунчаки подиумдаги либослар намойиши эмас! Намойишга креатив ёндошилган. Ҳар бир либос ўзига хос! Кутилмаган услубдаги ажойиб намойиш бўлди! Умуман, менга нафақат Dsquared2 нинг либослар намойиши, балки Art Week Style.Uz ҳафталигининг ўзи жуда ҳам маъқул бўлди! Қисқа вақт ичида кўплаб тадбирлар, ёрқин намойишлар, маҳорат дарслари, барчаси моҳирона ташкиллаштирилган! Таҳсинга сазовор! Ташкилотчиларга ўз миннатдорчилигимни билдираман.
Саида Вахобова
