FATTOHHON.COM
« Все новости 
Art Week Style Uz 2013 санъат ҳафталигидаги энг ёрқин ва энг кутилмаган либослар намойиши, деб эътироф этилган дизайнер STEFANO RICCIнинг Тошкент циркида ўтказилган оламшумул шоусидан сўнг, мазкур бренд муаллифи Stefano Ricci билан матбуот анжумани ўтказилди ва унда ОАВ вакиллари қатнашдилар.
Машҳур дизайнер, нима учун ўз либослари намойиши шоусини циркда ўтказгани билан ўртоқлашди.
Нима учун айнан циркда?
Стефано Риччи: - Циркда ўз либосларим намойишини шоу тарзида ўтказиш бу менинг болаликдан ният қилган, энг катта орзуйим эди! Ўзбекистонга келганимда, жуда ҳам ўзгача шоу ўтказиш ниятида эдим. Буни амалга оширишимга ёрдам берганликлари учун Ташкилотчиларга миннатдорчилик билдираман. Ўзбекистон менга жуда ҳам маъқул бўлди, (самимий кулиб) бу ерда бемалол ишлаш, ижод қилиш мумкин!
Стефано Риччи бренди либослари!
Стефано Риччи: - Стефано Риччи бренди, эркаклар либослари ишлаб чиқариш билан шуғулланади. Менинг моделларим, мен билан тенгдош. Биз ҳаммамиз биргаликда, эркак киши ҳар қандай ёшда ҳам элегант бўлиши мумкинлигини намойиш қилиб, аёлларнинг эътиборини торта оладиган ҳақиқий жентельмен қиёфасини яратишга ҳаракат қиламиз.
Циркдаги намойиш шоу қандай амалга оширилди?
Стефано Риччи: - Циркда либосларим намойишини ўтказиш учун, жуда катта тайёргарлик кўрилди. Бу ерга биз катта ижодий гуруҳ билан келдик, булар моделлар, цирк усталари, акробатлар, ёрдамчилардан иборат эди. Бундан ташқари, бу ердаги шоу намойиши учун италиялик циркчилар билан бирга, ўзбек цирк усталари ҳам таклиф қилинди. Акробатлар ҳавода ўз номерларини кўрсатаётган вақтда, моделлар ўз либосларини намойиш этишлари керак эди. Намойиш вақтида, Италия байроғи билан бирга Ўзбекистон байроғи ҳам олиб чиқилиб, баланд кўтарилди! Шунингдек, махсус Медиче династияси давридаги байроқдан фойдаланган ҳолда амалга оширилган номер ҳам бор. Бундай байроқ, Италияда омад рамзи ҳисобланади. Либосларимни италян моделлари намойиш қилишди. Чунки, Ўзбекистонга бугун тонгда етиб келдим. Ўзбек моделлари билан ишлашга эса, менга вақт керак бўларди. Шунинг учун ҳам, ўз моделларимни бирга олиб келдик. Қолаверса, мен ҳақиқий италян маҳсулотини намойиш қилмоқчи эдим. Бизни келажакда, модалар намойишимизда ўзбек моделларидан ҳам фойдаланиш ниятимиз ҳам бор. Агар эътибор қилган бўлсангиз, бугун намойишда иштирок этган 2 та модел қизлар, Ўзбекистонлик! Италян эркаги ва ўзбек аёли, бу жуда чиройли уйғунлашув бўлди, деб ўйлайман!
Стафано Риччи ўзи яратаётган либосларида ўзбек матоларидан фойдаланиши мумкинми?
Стефано Риччи: - Ўзбек матолари чиндан ҳам жуда юқори сифатга эга! Ўйлайманки, келажакда биз албатта, ўз либосларимизда бу матолардан фойдаланишимиз мумкин! Мен буни ўрганиб чиқаман ва амалга ошираман.
Ўзбек дизайнерларига айтадиган сўзларим:
Стефано Риччи: - Биринчи навбатда мен барча ёш ўзбек дизайнерларига омадлар тилайман! Улар келажакда дунё тан олган дизайнерлар бўлиб етишадилар! Бунда уларда етарли иқтидор ва имкониятлар бор, деб ўйлайман.
Стефано Риччи Флоренцияда, мода оламидаги тадбиркор оиласида дунёга келган. Болалигидан мода оламига қизиққан, болалигидан илк қизиқиши бу эркаклар галстуклари бўлган ва шу тарзда ўзининг биринчи коллекциясини яратган! Отаси ўғлидаги қизиқишни қўллаб-қувватлаган. 1972 йил эса, у эркаклар модаси оламида, ҳозирги кунга қадар энг муҳим тақдимот бўлган Pitti Immagine Uomo ярмаркасида, расмий равишда, мода оламига таништирилди! Бу унга Халқаро бозорга йўл очди! Айнан, Стефано Риччи туфайли, галстуклар эркаклар либосларининг муҳим элементига айланди! Дизайнер, ўз галстуклари учун фақат олий навли мато ишлатиши ҳам сир эмас. Шунингдек, у яратган баъзи галстук моделлари чекланган миқдорда ишлаб чиқарилади ва энг қимматбаҳо галстуклардан ҳисобланади.
Жаҳондаги энг нуфузли ва машҳур инсонлар, дизайнернинг мижозларидир. Жумладан, Нельсон Мандела, Бруней Султони, Ҳолливуд юлдузлари ва бошқалар...
Стефано Риччи мода оламида фақатгина галстуклар ишлаб чиқариш билан чекланиб қолмаган. У ўзи раҳбарлик қилаётган бренд остида, энг юқори дидли харидорларнинг ҳам талабини қондира оладиган эркаклар кўйлаклари, парфюми, турли либослари ва акссессуарлари ишлаб чиқаради.
Саида Вахобова
Феруза Фаттохова
Фотолар учун X Frame Media Production студияси фотографи Аҳрор Назировга миннатдорчилик билдирамиз.
