FATTOHHON.COM
« Все новости 
1 июнь Халқаро болаларни ҳимоя қилиш куни учун махсус “Бола кулса, олам кулади” фото лойиҳаси,
фотограф Сардор Азимов нигоҳида!
Мазкур лойиҳа хонанда, актёр ва режиссёр Жаҳонгир Позилжонов хонадонида амалга оширилди!
1 июнь бу хонадон учун қўшалоқ байрам, чунки 1 июнь Халқаро болаларни ҳимоя қилиш куни, Жаҳонгир Позилжоновнинг рафиқаси Дилдорахоннинг туғилган куни ҳамдир.
Жаҳонгир Позилжонов: - Бу кунни албатта, қувонч, хурсандчиликда ўтказамиз! Бу куннинг ўзига хослиги шу куни ҳовли ўртасига бассейн ўрнатамиз! Чунки, 1 июнь ёзнинг биринчи куни ҳам! Фарзандларимнинг ҳаммаси хурсандчиликни яхши кўришади! Уларнинг ҳаммаси ижодкор, қўшиқлар ёдлаб, куйлашади. Баъзида ишдан кеч қайтганимда ҳам, ёки кундуз кунлари вақтим бўлганида улар билан бирга ўтирсам, аҳамият бераман, ижодга қизиқишлари катта! Бирга ўтирганда мен билан бирга куйлашади ҳам. Кичик ўғлим кўпроқ мен билан бирга вақт ўтказгиси келади, катта ўғлим эса аксинча, “мен билан ишхонага бирга борасанми?” десам, “йўқ” дейди. (самимий кулиб) Бу вақтда кичиги “мени олиб кетинг” деб туради! Катта ўғлим, мен ҳовлида дарахтларга қараб, шохларини кесиб, ерларни чопиб, ҳовлига қарасам, кузатиб, кутиб туради. Мен кетганимдан кейин, ерларни баттар чопиб, ҳаммаёқни бузиб, шохларни кесиб қўяди! (кулади) Деҳқончиликка, кўпроқ боғга қарашга жуда қизиқади! Кичик ўғлим эса, доим ҳовлида велосипед ҳайдаб юради! Катта қизим ҳам велосипед ҳайдашга қизиқади. Қолаверса, ҳозир онасига яхшигина ёрдамчи бўлиб қолган! Кичик ўғлимни кўпроқ ишхонага олиб бораман. Кичик қизим ҳали кичик бўлса ҳам, ҳовлига чиқишни яхши кўради, ҳовлига чиқмаса, жанжал қилади! Хуллас, ҳаммаси қувноқ ва ўзига яраша шўх! 1 июнь рафиқамнинг ҳам туғилган куни, шу куни унинг кўнглини олишга ҳаракат қиламан! Лекин, баъзида уйда бўла олмай қоламан. Ўзи 1 июнь байрам куни бўлганига, уйда бўлиш ҳам қийинроқ. Аммо, барибир бу куннинг шукуҳи ўзгача! Бутун дунёдаги болажонларни бу ажойиб кун билан табриклайман! Кулишдан, хурсандчиликдан ҳеч қачон тўхташмасин! Ҳаммаларига бахт, омад ҳамиша ёр бўлсин!
Лойиҳани амалга оширишдаги ёрдам учун Позилжоновлар хонадонига миннатдорчилик билдирамиз
Лойиҳа муаллифлари Саида Вахобова
Феруза Фаттохова
